مەملەكەت باسشىسى پاندەمياعا قارسى ەلىمىزدەگى كۇرەس جۇمىستارىن ۇيلەستىرەتىن ورتالىقتىڭ جۇمىسىمەن تانىستى. بۇل تۋرالى اقوردا سايتى حابارلادى.

دەنساۋلىق ساقتاۋ مينيسترلىگىنىڭ باسشىلىعى پرەزيدەنتكە الەمدە جانە قازاقستاندا كوروناۆيرۋستىڭ تارالۋىنا قارسى كۇرەستى ۇيلەستىرۋ جانە مونيتورينگ جاساۋ ادىستەرى، ونىڭ ىشىندە اۋىرعانداردى انىقتاۋ جانە ەسەپكە الۋ جونىندەگى جۇمىستاردا تسيفرلىق تەحنولوگيانى قولدانۋ تۋرالى باياندادى.

قاسىم-جومارت توقاەۆ اتالعان ورتالىقتىڭ الەمدەگى قولايسىز ەپيدەميولوگيالىق جاعدايىندا اتقاراتىن ماڭىزدى ءرولىن اتاپ ءوتتى جانە كۇش بىرىكتىرە وتىرىپ، وقيعانىڭ كەرى اسەرىنە توسقاۋىل قويۋعا سەنىم ءبىلدىردى.

پرەزيدەنت قازاقستاندىقتاردى تىنىشتىق ساقتاۋعا شاقىرىپ، ۇكىمەتكە ىندەتتىڭ تارالۋىنا بايلانىستى قاۋەسەتتەر مەن دۇربەلەڭگە توسقاۋىل قويۋ ءۇشىن ازاماتتاردى شۇعىل ءارى شىنايى اقپاراتتارمەن قامتاماسىز ەتۋ مىندەتىن قويدى. مەملەكەت باسشىسى وسىعان وراي قوعامعا قازىرگى احۋال مەن مەملەكەتتىڭ قابىلداپ جاتقان شارالارى تۋرالى اقپارات تاراتاتىن رەسمي ارنالاردى ايقىنداۋ جونىندە تاپسىرما بەردى.

جالپى قاسىم-جومارت توقاەۆ كوروناۆيرۋسقا قارسى كۇرەسۋ ءۇشىن قابىلدانىپ جاتقان شارالارعا وڭ باعا بەردى.

– ۇكىمەت از جۇمىس ىستەگەن جوق. مامانداردىڭ باعالاۋىنشا، ءبىز ەۋروپا ەلدەرىنە قاراعاندا ايتارلىقتاي شۇعىل ارەكەت ەتىپ جاتىرمىز. دەگەنمەن بىزگە ناتيجە كەرەك. حالىق ءالى تولىق اقپارات الا الماي وتىر، – دەدى مەملەكەت باسشىسى.

سونىمەن قاتار پرەزيدەنت مەديتسينالىق بەتپەردەلەردىڭ تاپشى ەكەنىن ايتتى.

– بىزدە ءالى كۇنگە دەيىن ءتيىستى كولەمدە بەتپەردەلەردىڭ جەتىسپەيتىندىگىن اتاپ ايتقىم كەلەدى. بىراق قاعاز جۇزىندە بارى جەتكىلىكتى. ءبىر جاعىنان حالىق ءدارىحانالاردا بەتپەردەلەردىڭ ءالى دە جوق ەكەنىن ايتىپ شاعىمدانۋدا. نەگە؟ بۇل الىپساتارلىق دەپ ويلايمىن، - دەدى قاسىم-جومارت توقاەۆ.

مەملەكەت باسشىسى حالىقتى بەتپەردەلەرمەن جەدەل قامتاماسىز ەتۋدى تالاپ ەتىپ، ەلىمىزدىڭ بارلىق ازاماتتارىن ۇنەمى انتيسەپتيكتەردى پايدالانۋعا جانە بەتپەردە تاعۋعا شاقىردى.

– ءبىز بارلىق قالالارداعى نەگىزگى كوشەلەردە ازاماتتارىمىزعا تەگىن ماسكا تاراتا الاتىنداي بولۋىمىز كەرەك. بۇل ۇكىمەتتىڭ الدىندا تۇرعان اسا جەدەل ءارى شۇعىل مىندەت، – دەدى پرەزيدەنت.

قاسىم-جومارت توقاەۆ پاندەميانىڭ 160-تان استام ەلگە تارالعانىن اتاپ ءوتىپ، شەكارالاس مەملەكەتتەردىڭ ۇكىمەتتەرىمەن ءىس-قيمىلداردى ۇيلەستىرۋدىڭ ماڭىزدىلىعىنا نازار اۋداردى.

– سوڭعى بىرنەشە كۇندە رەسەيدىڭ، وزبەكستاننىڭ، قىرعىزستاننىڭ پرەزيدەنتتەرىمەن سويلەستىم. نەگىزىنەن ءبىز ۇكىمەتتەرىمىزدىڭ تىعىز ىقپالداسا جۇمىس ىستەۋى كەرەكتىگى جايىندا اڭگىمەلەستىك. بۇل ورتاق ماسەلە بولعاندىقتان بىرلەسكەن جۇمىستاردى ارتتىرا ءتۇسۋىمىز كەرەك. بىرلەسە ارەكەت ەتكەن ءجون، - دەدى مەملەكەت باسشىسى.

قازاقستان پرەزيدەنتى ەلىمىزدە كارانتين رەجيمىن ساقتاۋدىڭ ماڭىزدىلىعىنا توقتالىپ، بارلىق ازاماتتاردى، ونىڭ ىشىندە، مەملەكەتتىك قىزمەتشىلەردى بەلگىلەنگەن ءتارتىپ بويىنشا جۇمىس ىستەۋگە شاقىردى.

– باقىلاۋ-وتكىزۋ بەكەتتەرىن قويعانىمىز ءازىل نەمەسە قويىلىم ەمەس. كارانتين رەجيمىن قاتاڭ ساقتاماي، ءبىز بۇل باعىتتا ەشقانداي تابىسقا قول جەتكىزە المايمىز. ءبىز كارانتين جاعدايىن قاتاڭ ساقتاۋعا ءتيىسپىز، – دەدى پرەزيدەنت.

قاسىم-جومارت توقاەۆ وتاندىق مەديتسينانى، سونىڭ ىشىندە، سانيتارلىق-ەپيدەميولوگيالىق قىزمەتتى جانە مەديتسينا عىلىمىن دامىتۋعا باسا ءمان بەرۋ كەرەك ەكەنىن ايتتى.

– قازىر بۇكىل الەمنىڭ جانە بۇكىل الەمدىك ەكونوميكانىڭ تاعدىرى عالىمداردىڭ قولىندا. بۇل ارتىق ايتقاندىق ەمەس. الەمنىڭ تاعدىرىن فۋتبولشىلار، شوۋ-بيزنەس وكىلدەرى ەمەس، عالىمدار شەشەدى. ءبىز وسى جاعدايدان ساباق الۋعا ءتيىسپىز، - دەدى مەملەكەت باسشىسى.

سوڭىندا قاسىم-جومارت توقاەۆ بارلىق مەديتسينا قىزمەتكەرلەرىنە كوروناۆيرۋس پاندەمياسىنا قارسى كۇرەسكە قوسقان ۇلەسى ءۇشىن ريزاشىلىعىن ءبىلدىردى.

Abai.kz