ال قاراگوز باشيگۋلوۆا مەن اقليما تۋكسيكوۆانىڭ ارقايسىنا 26510 تەڭگەدەن ايىپپۇل سالىندى. شەشىمدى 21 ناۋرىزدا اقتوبە قالالىق مامانداندىرىلعان اكىمشىلىك سوتى شىعاردى. بۇل تۋرالى اقتوبە وبلىستىق سوتىنىڭ ءباسپاسوز قىزمەتى حابارلادى.

“بۇل ازاماتتار اكىمشىلىك كودەكستىڭ 476-بابىنىڭ 3-تارماعى (توتەنشە جاعداي رەجيمىن بۇزۋ) بويىنشا ايىپ تاعىلعان. ولار اقتوبە قالاسى مامانداندىرىلعان اكىمشىلىك سوتى عيماراتى جانىندا 18 ناۋرىز كۇنى جيىن وتكىزگەن. وسىلايشا قازاقستان پرەزيدەنتى [قاسىم-جومارت توقاەۆتىڭ] 15 ناۋرىزداعى توتەنشە جاعداي جاريالاۋ تۋرالى جارلىعىن ىسكە اسىرۋ جونىندەگى نۇسقاۋلىقتى بۇزدى” دەپ جازىلعان وبلىستىق سوتتىڭ حابارلاماسىندا

بۇل اقپاراتتى ازاتتىققا قامالعانداردىڭ ءبىرى الىبەك ءمولديننىڭ ايەلى جادىرا نۇعىمانوۆا دا راستادى.

- كۇيەۋىم الىبەك مولدين مەن وزگە دە بەلسەندىلەر 18 ناۋرىز كۇنى بەلسەندى اسىلحان جاۋباتىروۆتى ("پوليتسيانىڭ زاڭدى تالابىنا باعىنبادى" دەپ ايىپتالىپ، ءىس قوزعالعان. سوت وتىرىسى كەيىنگە قالدى - رەد.) قولداۋ ءۇشىن سوتقا بارعان. توتەنشە جاعداي رەجيمىنە وراي ولاردى سوت عيماراتىنا كىرگىزبەگەن. سىرتتا توپتاسىپ تۇرعان بەلسەندىلەردى بيلىك "توتەنشە جاعداي رەجيمىن بۇزدى" دەپ ايىپتاپ، قاماپ تاستادى، - دەيدى ول.

جادىرا نۇعىمانوۆا كۇيەۋى الىبەك مولدين مەن ونىڭ جاقتاستارى سوت الدىندا وزدەرىنە تاعىلعان ايىپتى مويىنداماعانىن ايتادى.

الىبەك مولدين، اسىلحان جاۋباتىروۆ، ايتجان تەمىرعازيەۆ وسىعان دەيىن دە بىرنەشە رەت بيلىككە قارسى نارازىلىق شارالارىنا قاتىسىپ، اكىمشىلىك جازامەن بىرنەشە رەت قامالىپ شىققان.

15 ناۋرىزدا قازاقستان پرەزيدەنتى قاسىم-جومارت توقاەۆ ەلدە كوروناۆيرۋس تابىلۋىنا بايلانىستى ساقتىق شاراسى رەتىندە توتەنشە جاعداي جاريالاعان. ەلدە ادام جينالاتىن شارالاردىڭ بارلىعىنا تىيىم سالىنعان.

22 ناۋرىز كەشكى دەرەككە ساي، قازاقستاندا بارلىعى 60 ادامعا كوروناۆيرۋس جۇقتى.

Abai.kz