وسى كۇندەرى ماعان جاس كاسىپكەرلەردى الەۋمەتتىك جاۋاپكەرشىلىككە شاقىرۋعا كوپتەگەن وتىنىشتەر جاسالۋدا. ياعني، كاسىپكەرلەر دارىگەرلەر مەن حالىققا كومەك كورسەتسە دەگەن وتىنىشتەر. وسىنداي ۇراندارى بار روليكتەرگە تۇسۋگە ۇسىنىس جاساپ جاتىر.

بۇل تۋرالى مەن نە ايتقىم كەلەدى. بۇل داعدارىستىڭ، اسىرەسە، كارانتيننىڭ، ەڭ اۋىر سوققىسى شاعىن جانە ورتا بيزنەسكە تۋرا كەلدى. كوپتەگەن كاسىپورىندار جابىلۋدا، كاسىپ يەلەرى قىزمەتكەرلەر سانىن قىسقارتۋعا، قالعان قىزمەتكەرلەرگە ايلىعىن نەمەسە ەرىكسىز ەڭبەك دەمالىسىن تولەپ بەرۋگە ءماجبۇر بولىپ وتىر. قارىزدارىن كەيىنگە شەگەرۋ بويىنشا بانكتەرمەن كەلىسىپ، تاۋاردى جەتكىزۋشىلەرمەن، ديستريبيۋتورلارمەن كەلىسۋ جانە وزگە دە ارەكەتتەر جاساۋعا ءماجبۇر. سول ارادا تەڭگە قۇنسىزدانىپ بارادى، ونىمدەردىڭ وزىندىك قۇنى ارتۋدا، ال باعانى كوتەرۋگە بيلىك رۇقسات ەتپەيدى.

قىسقاسى، قازىر، شىندىققا كەلگەندە، كاسىپكەرلەر ءوز تىرشىلىگىن ساقتاپ قالۋ قامىمەن قولدان كەلەر امال-ارەكەتتىڭ ءبارىن جاساپ جاتىر. مەن قازىر ۆوتساپ جانە تەلەگرامم جەلىلەرىندە بىرنەشە "انتيكريزيسنىي شتاب" چاتتارىندا تىركەلگەم. بۇل چاتتاردان كورىپ وتىرعانىم – كەم دەگەندە 95% كاسىپكەرلەردىڭ قازىرگى ءحالى مۇشكىل. بارىندە ءوز كاسىپتەرى ءۇشىن قورقىنىش پەن ۇرەي، كوپشىلىگى قانداي ارەكەت جاساۋ كەرەگىن دە بىلمەي وتىر.

وسىنداي جاعدايدا، كاسىپكەرلەرگە الەۋمەتتىك كومەك كورسەتۋشى، اقشا تاراتۋشى «قارجى تولعان قاپ» سەكىلدى قاراۋدى دوعارۋدى سۇرايمىن. ولاردى جىلدار بويى ەل ەكونوميكاسىنىڭ بار ءنارىن سىعىپ الىپ وتىرعان شيكىزات وليگارحتارىمەن شاتاستىرماڭىزدار. كاسىپكەرلەردىڭ كوپشىلىگى مۇنداي كومەك كورسەتە المايدى جانە وسى ءۇشىن ولاردىڭ دا قابىرعاسى قايىسىپ وتىر. جانە دە ءدال قازىر حالىقتى ازىق-تۇلىكپەن جانە بارلىق كەرەك-جاراقپەن قامتاماسىز ەتۋ بويىنشا ەڭ اۋىر كۇش وسى كاسىپكەرلەرگە ءتۇسىپ وتىرعانىن ەسكەرۋ كەرەك.
ەگەر كاسىپكەرلەر ءوز كاسىپورىندارىن ساقتاپ، جۇمىس ورىندارى قالپىندا قالسا جانە ولار وسى كۇندەرى ءۇزىلىسسىز جۇمىس جاسايتىن بولسا، وسىنىڭ ءوزى ءبىزدىڭ ەكونوميكامىزدى قۇتقارۋ مەن قاۋىپسىزدىگىمىزدى ساقتاۋدا ەڭ ۇلكەن ۇلەس بولار ەدى.

ءبارىمىز تۇتىنۋشى ەكەنىمىزدى ۇمىتپايىق، ءونىم ءوندىرۋشى مەملەكەت ەمەس، كاسىپكەرلەر. ولار دا كوروناۆيرۋسپەن كۇرەستە دارىگەرلەرمەن قاتار الدىڭعى شەپتە. ولاردان ودان ارتىق دۇنيە تالاپ ەتپەڭىزدەر.

P.S. مەن بۇل ارادا كاسىپكەرلەر دەپ ءونىم وندىرمەيتىن، مەديتسينالىق ماسكالار مەن وزگە دە كەرەكتى زاتتاردى ءۇش ەسە باعامەن قايتا ساتاتىنداردى ايتىپ وتىرعان جوقپىن. ولار سپەكۋليانتتار.

مارعۇلان سەيسەمبايدىڭ الەۋمەتتىك جەلىدەگى جازباسى

Abai.kz