ابدىحالىقوۆا اكىم بولدى. الەۋمەت نە دەيدى؟
كەشە عانا الەۋمەتتىك جەلىدە قىزىلوردا وبلىسىنىڭ اكىمى بولعان قۋانىشبەك ىسقاقوۆ پەن ونىڭ ماڭايىنداعى بىرنەشە ادامنىڭ ۇستالعانى جايلى اقپار تارادى. بۇعان قاتىستى قر ءىىم مەن سىبايلاس جەمقورلىققا قارسى قىزمەت ءالى ءۇنسىز.
ال بۇگىن مەملەكەت باسشىسى قاسىم-جومارت توقاەۆ قىزىلوردا وبلىسىنا جاڭا اكىم تاعايىندادى. ەندى سىر ءوڭىرىن گۇلشارا ابدىقالىقوۆا باسقارادى. بۇل تاعايىنداۋدىڭ ىسقاقوۆتىڭ ۇستالعانىمەن قاتىسى بار-جوعى بەلگىسىز. ناقتى مالىمەت الداعى ۋاقىتتا انىقتالادى.
قازىرشە جاڭا اكىم جايلى ەكى اۋىز ويىمىزدى ايتايىق. ەلىمىزدە العاش رەت ايەل ادام وبلىس باسقارعالى وتىر. ابدىقالىقوۆانىڭ اكىم بولعانىن ەل تاريحىندا ەلەۋلى وقيعا بولدى، دەپ ەسەپتەيتىندەر كوپ. مۇنداي پىكىردى العاشقىلاردىڭ ءبىرى بولىپ پرەزيدەنتتىڭ كەڭەسشىسى ايدا بالاەۆا ايتتى.
بالاەۆا حانىم Facebook جەلىسىندەگى جەكە پاراقشاسىندا ابدىقالىقوۆانىڭ اكىم كرەسلوسىنا ابدەن لايىق ەكەنىن جازا كەلە، ارىپتەسىنىڭ جاڭا قىزمەتىنە ساتتىلىك تىلەدى.
- گۇلشارا ابدىحالىقوۆانىڭ قىزىلوردا وبلىسىنىڭ اكىمى بوپ تاعايىندالعانى ەلىمىز ءۇشىن تاريحي وقيعا بولدى. تۇڭعىش رەت ايەل ادام ايماق تىزگىنىن قولىنا الدى. مەنىڭشە بۇل مەريتوكراتياعا قاراي جاسالعان باستى قادام، جىنىسىنا، الەۋمەتتىك جاعدايىنا قاراماستان لايىقتى ادامدار بيلىككە كەلەدى. ايەل وبلىسقا باسشى بولا المايدى دەگەن ستەرەوتيپ ەندى جوق، - دەدى ول.
بىراق ەلدىڭ ءبارى بالاەۆامەن بىردەي ويدا ەمەس. ابدىقالىقوۆانىڭ قىزمەت جولىنا قاراپ، ونىڭ ءبىر وبلىستى ەركىن باسقارىپ كەتەتىنەن كۇمانمەن قارايتىندار كوپ. الەۋمەتتىك جەلىدە پىكىر جازۋشىلاردىڭ كوبى، بۇكىل مانساپ جولىندا اقوردانىڭ اينالاسىنان ۇزاپ شىقپاعان كادرعا وبلىستىڭ ەكى تىزگىن، ءبىر شىلبىرىن تاپسىرۋ اسىعىستىق دەپ سانايدى.
گۇلشارا حانىم، ءۇش جىل مينيستر، بەس جىل مەملەكەتتىك حاتشى بولعان. ودان وزگە قىزمەتتەرىنىڭ كوبى ورىنباسار نەمەسە كەڭەسشى دارەجەسىندە. دەمەك، گۇلشارا ناۋشاقىزى قىزمەتتىك جولىندا العاش رەت اقوردادان ۇزاپ شىعىپ، ءوز بەتىنشە جۇمىس ىستەپ كورمەكشى.
گۇلشارا ناۋشاقىزى كىم؟ وسى ۋاقىتقا دەيىن قانداي قىزمەتتەر اتقاردى؟ بۇل تۋرالى ەگجەي-تەگجەيلى اقپارات الەۋمەتتىك جەلىدە جەتەرلىك. ءبىزدىڭ ايتپاعىمىز، ابدىحالىقوۆانىڭ اكىم بولىپ تاعايىندالۋىنىڭ قانداي دا ءبىر ساياسي استارى بار ما؟ الەۋمەتتىك جەلىدەگى جۇرت نە دەيدى؟
بولات نۇرقوجاەۆتىڭ Facebook-تەگى جازباسى:
- مۇحتار قۇل-مۇحاممەد (2007-2008) اكىم بولىپ بار جوعى 1 جىلداي عانا وتىردى. كوپ نارسەنى باستاپ كەتتى. كوكسارايعا قارسى بولدى دەپ ەستىدىك.
ب.قۋاندىقوۆ (2008-2013) كەزىندە دە جالعىز تەمىرجول كوپىرىمەن قىلمىستىق ءىس بولدى...
ق.كوشەرباەۆ (2013-2019) كەلگەندە وبلىسقا جاڭا سەرپىن بەرۋ ءۇشىن كادر ساياساتىنا كەمىندە ءتورت جىل كەرەك دەپ جازعانمىن. مەنىڭشە ول كەرى كەتكەن سياقتى.. بىراق ول كىسىنىڭ بەدەلى مەن ىقپالى ارقاسىندا ۋاقىت بەلدەۋى ماسەلەسىن شەشىپ الدىق.
ق.ىسقاقوۆتى (2019-2020) 9 اي عانا قىزمەت قىلعانمەن جاماندىققا قيمايمىز. بىراق ءبىزدىڭ وبلىسقا كەلگەنگە جوعارىدا مىقتى تىرەۋى بولماسا قيىن..
ەندى جاڭا اكىمىمىز بولىپ (2020) گ.ابدىحالىقوۆا كەلدى..
جالپى ءبىزدىڭ وبلىستى قازاقستاننىڭ مينياتيۋرالىق كورىنىسى دەسە بولاتىن شىعار.. مۇنايعا تاۋەلدى، كۇرىش پەن مۇنايدان وزگە ءونىم شىقپايتىن، رۋشىلدىق، جەرشىلدىك پەن تۋىستىق قاتىناس قاتتى ءوڭىر..
ءبىر ادامنىڭ ارتىندا ەكىنشىسى تۇر، كلان-كلان، حالقى مومىن، توزگىش ءوڭىر دەسە بولعانداي..
ءبىر رۋدان، نە ءبىر اۋداننان باسشى كەلسە: "ووو، ءبىزدىڭ ادام كەلدى" ، - دەپ قۋانىپ قالاتىن، ءبىرى قىزمەتكە كەلسە ولار ءبىرىن-ءبىرى تانىماسا دا جاستارىنىڭ ءوزى: "پالەنشەنىڭ رۋلاسى، جەرلەسى عوي، سوسىن كەلگەن", - دەپ تۇجىرىم جاسايتىن ءوڭىرمىز..
ەڭ باستىسى وسىلاردان اۋلاق، ءوڭىردى ءبىر قوعام دەپ قارايتىن، ەلىنە ادال قىزمەت كورسەتەتىن باسشى بولسا بولدى-دا...، - دەپ جازعان.
ازاماتحان ءامىرتايدىڭ Facebook-تەگى جازباسى:
- قىزىلوردا وبلىسىنىڭ اكىمى بولىپ گۇلشارا ابدىحالىقوۆا تاعايىندالعان ەكەن. ەل داعدارىس الدىندا تۇرعان كەزدە كابينەتتەن شىقپايتىن "تاتەشكا" حالىق ءۇشىن نە ىستەي الادى؟، - دەپ جازدى.
Abai.kz
