بۇنداي ىندەتتىڭ ناقتى اۋرۋدان باسقا، جاناما سالدارى بولادى. ال ول سالدارى، اۋرۋدىڭ وزىنەن دە اۋىر بولۋى ىقتيمال.

دۇنيەدە وبا، تىرىسقاق، سۇزەك، "يسپانكا" اۋرۋلارىنان كەيىن، ىلە- شالا اشتىق باستالعان. وسى الەۋمەتتىك ىندەتتىڭ الدىن الۋ جۇمىستارىن باستاۋ كەرەك.

بىزدە، وكىنىشكە وراي، ەڭ تومەن الەۋمەتتىك قورعالعان، ءوزىمىزدىڭ، قاراكوزدەر.
كرەديتكە تولى، قالادا پاتەر  جالداپ تۇرادى، بازاردا تاشكە تاسيدى نەمەسە جالدانىپ جۇمىس ىستەيدى.

ولاردىق قيىن ءومىر جاعدايعا تۇسكەنىنە بۇگىنگى زوبالاڭ كىنالى. تاعى دا، ادەتتەگىدەي، "ويباي بۇلار ارامتاماق، جاتىپىشەر" دەپ شۋلاۋدىڭ قاجەتى جوق.
ءدال سول ازاماتتاردىڭ قاتارىندا ءوزىمىزدىڭ قارىنداستار مەن باۋىرلار بار.
ءوزىمىزدىڭ باۋىر ەتىمىز. بەلدى بۋىپ، كومەكتەسۋ كەرەك!

ءوزىن - ءوزى جۇمىسپەن قامتيتىن 2,1 ملن ادام، رەسمي جۇمىسسىز 450 مىڭ ادام بار. مىنە، وسىلار مەملەكەتتىڭ رەسمي كومەكتەرىنەن سىرت قالۋى مۇمكىن.
ويتكەنى، باسىم كوپشىلىگى رەسمي ەشقايدا تىركەلمەگەن. ولار بار، بىراق، ولار جوق. وسى كىسىلەردىڭ جاعدايىنا ساق بولۋ كەرەك.

قازىردەن، بارلىق وبلىس ورتالىقتارىندا ءبىرىنشى قاجەتتى ازىق-تۇلىكتەردىڭ قورىن جاساپ، ادامدارعا تاراتۋدىڭ تەتىگىن دايىنداپ قويۋ ماڭىزدى.
اشتىق جونىندە بەلگى، قازىردىڭ وزىندە، كەلىپ جاتىر.

ء"ار-ءبىر قازاق جالعىزىم" دەگەن قاناتتى ءسوز بار.وسى ءسوزدى ءىس جۇزىندە دالەلدەۋگە دايىن بولۋىمىز كەرەك.

بيلىك پارتياسى 10 كۇندە حالىققا كومەكتەسۋدىڭ ۇلگىسىن كورسەتتى. قازاقستان بويىنشا 5 مىڭ ادامعا ازىق-تۇلىكپەن كومەك جاسادى.

قاراپايىم بيزنەس وكىلدەرى دە، ازاماتتار دا، ءوز كەزەگىندە، ايانىپ قالىپ جاتقان جوق. ءبارى، قازىردىڭ وزىندە، بىلەك سىبانىپ، جۇگىرۋدە. دۇرىس ونەگە. بۇل ۇردىسكە ءىرى بيزنەس وكىلدەرى دە قوسىلۋعا دايىن بولۋلارى كەرەك.

كوپتەگەن وبلىس اۋدان اكىمشىلىكتەرى كومەك سۇراپ كەلگەن ادامداردى بيۋروكراتياعا سالىپ، "اندا بار، مىندا بار" دەپ كوريدورلارعا قۋىپ ءجۇر. ەرتەڭ، حالىقتىڭ كارى اتادى. ناقتى كومەك جاساۋ كەرەك.

جۇت ەسكەرتىپ كەلمەيدى، "ساقتانساڭ ساقتايمىن" دەيدى. "بەتىن ارى اكەتسىن" دەپ تىلەيىك.

دەگەنمەن، ساقاداي ساق بولايىق، اعايىن!

ەرلان سايروۆتىڭ الەۋمەتتىك جەلىدەگى جازباسى

Abai.kz