2 ءساۋىر كۇنى مەملەكەت باسشىسى قاسىم-جومارت توقاەۆ "اسكەري مىندەتتىلەردى جيىنعا شاقىرۋ" تۋرالى جارلىققا قول قويعان ەدى.

بۇل شارا كارانتين جاعدايىندا قوعامنىڭ قاۋىپسىزدىگىن قامتاماسىز ەتۋ جانە مەملەكەتكە توتەنشە جاعداي رەجيمىن ساقتاۋعا كومەكتەسۋ ءۇشىن قاجەت.

وسى ورايدا قازاقستاننىڭ ءار ايماعىندا ءتۇرلى قىزمەتتە ىستەپ جۇرگەن قازاقستاندىقتاردىڭ پىكىرىن بىلگەن ەدىك، دەپ حابارلادى Strategy2050.kz ءتىلشىسى.

مەملەكەت باسشىسى تاراپىنان قولعا الىنعان بۇل شارا قازاقستاننىڭ ءار ايماعىنداعى ازامتتاردان قولداۋ تابۋدا. سونىڭ ءبىرى - قاراعاندى وبلىسى جاستار رەسۋرستىق ورتالىعىنىڭ  ديرەكتورى راسۋل قاسەنحان. ول ەلىم دەگەن ءار ازامات زور جاۋاپكەرشىلىك تانىتىپ، ۇلكەن تاباندىلىقپەن وسى يگى باستاماعا ءۇن قوسىپ، اسكەر قاتارىنان تابىلاتىنىنا سەنىم ءبىلدىردى.

"بۇگىنگى تاڭدا بۇكىل الەمدى الاڭداتاتىپ وتىرعان پاندەمياعا، قاۋىپتى ىندەتتىڭ الدىن الۋعا بايلانىستى ءبىزدىڭ ەلدىڭ ايماقتارىندا توتەنشە جاعداي جاريالانعانى بەلگىلى. وسىنداي ەل باسىنا كۇن تۋعان سىن ساعاتتا حالىقتىڭ تىنىشتىعى مەن دەنساۋلىعى جولىندا ءار ازامات ءوز ادامگەرشىلىك، ازاماتتىق ۇستانىمىن ايقىن تانىتاتىن ءسات تۋدى. ەلىم دەگەن ءار تۇلعا زور جاۋاپكەرشىلىك، ۇلكەن تاباندىلىقپەن وسى يگى باستاماعا ءۇن قوسىپ، اسكەر قاتارىنان تابىلادى دەپ سەنەمىن", - دەدى راسۋل قاسەنحان.

ونىڭ سوزىنشە، وسىناۋ قيىن كەزدە ءار ازامات وتانىنىڭ قاۋىپسىزدىگىن قامتاماسىز ەتۋگە اتسالىسۋعا ءتيىس.

"ات باسىنا كۇن تۋسا، اۋىزدىقپەن سۋ ىشەر، ەر باسىنا كۇن تۋسا، ەتىگىمەن سۋ كەشەر" - دەگەن حالىق دانالىعى ەلىن، جەرىن سۇيگەن ءار پەرزەنتكە وسىنداي قيىن شاقتا نامىس پەن جىگەر وتىن سىيلايدى دەگەن ءۇمىتىمىز زور", - دەدى ول.

سونىمەن قاتار ول بۇعان دەيىن دە توتەنشە جاعدايعا بايلانىستى قاراعاندى وبلىسىنىڭ اكىمدىگىندە جەدەل ارەكەت ەتۋ ورتالىعى جۇمىس ىستەپ جاتقانىن اتاپ ءوتتى. ول قازىر ەرىكتىلىك قىزمەتتى ۇيلەستىرۋشى.

"وبلىس اكىمىنىڭ تاپسىرماسى بويىنشا جەدەل ارەكەت ەتۋ ورتالىعى (جاەو) اشىلدى. جاڭا قۇرىلىم وڭىرلىك جەدەل شتابتىڭ نەگىزگى شەشىم قابىلداۋ ورتالىعى. جاەو-عا ءبىز بارلىق جۇمىلدىرىلعان قۇرىلىمدار مەن قىزمەتتەر ماماندارىن: پوليتسيانى، سەق، اسكەري، وبلىستىق دەنساۋلىق ساقتاۋ باسقارماسى، وبلىستىق باسقارمالار مەن دەپارتامەنتتەر جۇمىلدىرىلعان. جاەو-نا وبلىستا نە بولىپ جاتقانى تۋرالى بارلىق اقپارات كەلىپ تۇسەدى. مەن مۇندا قازىر ەرىكتىلىك قىزمەتتى ۇيلەستىرۋشى بولىپ قىزمەت ىستەيمىن. قارت كىسىلەرگە حابارلاسىپ، ۇيدەن دۇكەنگە، دارىحاناعا شىعا الماي جاتقان ۇلكەندەرگە ەرىكتىلەر تاۋىپ بەرەمىن", - دەدى راسۋل قاسەنحان.

جاەو-ءنىڭ جۇمىس ءتارتىبى - 24/7. ونىڭ ايتۋىنشا، بۇل شتابتىڭ جۇمىسى ءىس-قيمىل بويىنشا ۇسىنىستاردى تالداۋ جانە ازىرلەۋ ءۇشىن وتە ماڭىزدى.

Abai.kz