قر اقپارات جانە قوعامدىق دامۋ ءمينيسترى داۋرەن اباەۆ COVID-19 پاندەمياسىنا بايلانىستى ەلىمىزدە ءدىني مەرەكەلەردى تويلاۋعا تىيىم سالىناتىنىن ايتتى. 

ءمينيستردىڭ ايتۋىنشا، ءساۋىر ايىندا قازاقستاندىقتار ءۇشىن ماڭىزدى بىرقاتار ماڭىزدى ءدىني مەيرام بار.

«ولار - ورازا، پراۆوسلاۆ، كاتوليكتەردىڭ پاسحاسى، ياھۋدەيلىك پەساح جانە تاعى باسقا. ءسوزسىز ولاردىڭ بارلىعى كوپتەگەن ازاماتقا ۇلكەن ماڭىزى بار. ءبىز ءدىن ۇستانۋشى ازاماتتارىمىزدىڭ ءدىني سەنىمە زور قۇرمەتپەن قارايمىز. الايدا كوروناۆيرۋس ىندەتى بارلىق ادامنىڭ دەنساۋلىعىنا، ومىرىنە قاۋىپ ءتوندىرىپ وتىر. سوندىقتان كوپتەگەن ەل ەپيدەمياعا قارسى بۇرىن-سوڭدى بولماعان شەكتەۋلەر ەنگىزىپ جاتىر. ۆيرۋس تارالماۋى ءۇشىن ادامدار جينالاتىن بارلىق شاراعا، ونىڭ ىشىندە ءدىني شارالارعا دا ۋاقىتشا تىيىم سالىنادى. سەبەبى، بۇل ءدىني شارالار كەزىندە عيبادات ورىندارىندا تۋىستارى جانە جاقىندارىمەن جينالادى. بىرگە مازار باسىنا بارادى»،-دەدى ول ونلاين-بريفينگتە.

سونىمەن قاتار، اباەۆ ءدىني مەيرامدار كەزىندەگى قاۋىپسىزدىك شارالارى بارىسىندا كارانتين رەجيمىن بۇزباۋ قاجەت ەكەنىن باسا ايتتى.

«قازىرگىدەي كۇردەلى ۋاقىتتا ەڭ باستى ماسەلە – ادامنىڭ دەنساۋلىعى مەن امانداعى. ەشقانداي ءدىن ادام ءومىرى مەن دەنساۋلىعىنا قاۋىپ توندىرگەندى ماقۇلدامايدى. وسى رەتتە بارلىق ءدىني جانە ەتنومادەني ۇيىمداردىڭ باسشىلارى مەن ازاماتتارىن تۇسىنىستىك تانىتۋعا شاقىرامىز. ءدىني مەيرام كەزىندە كارانتين رەجيمىن ساقتاۋدى سۇرايمىز. ءدىني بىرلەستىككە مەرەكەلىك ءدىني راسىمدەردى ونلاين رەجيمدە وتكىزۋگە ۇسىنامىز»، - دەدى اباەۆ.

ايتا كەتەيىك، بۇگىندە كوروناۆيرۋس ىندەتىن جۇقتىرعاندار سانى ەلىمىزدە كۇن سايىن ارتىپ كەلەدى. مەملەكەت تاراپىنان توتەنشە جاعداي جاريالانىپ، بىرقاتار قالالار كارانتينگە جابىلدى.

ال، سوڭعى مالىمەت بويىنشا، ەلىمىزدە كوروناۆيرۋس جۇقتىرعاندار سانى 500-گە جەتتى. 35 ادام جازىلىپ، 4 ادام قايتىس بولعان.

Abai.kz