قازاقستان رەسپۋبليكاسىنىڭ پرەزيدەنتى

قاسىم-جومارت توقاەۆتىڭ نازارىنا!

قۇرمەتتى، قاسىم-جومارت كەمەلۇلى! 

كارانتين كەزىندە وقۋشىلاردىڭ ساباق وقۋ جۇيەسى وڭ شەشىمىن تابار ەمەس. ءبىلىم جانە عىلىم مينيسترلىگى اۋىلدار مەن الىس ايماقتاردا ءالى كۇنگە دەيىن ينتەرنەت جۇمىس ىستەمەيتىنىن بىلە تۇرا، ءدۇيىم جۇرتتى دۇرلىكتىرىپ، «ونلاين-ساباقپەن» اۋرەلەدى.

ءبىزدىڭ ەلدەگى كەيبىر ۇيدە تەلەديدار مەن كومپيۋتەردىڭ جوقتىعى تاڭدانارلىق جاعداي ەمەس. ال ول شاڭىراقتاعى ءۇش وقۋشى قالاي ساباق وقيدى؟ باياعىداي كورشىدەن كومەك سۇرايتىن زامان جوق، ۇيدەن شىعۋعا بولمايدى.

ونلايننىڭ بوس اۋرەشىلدىك ەكەنىنە كوزى جەتكەن سوڭ، مينيسترلىك قاشىقتان وقىتۋعا كوشتى. ول قالاي جۇزەگە اسىرىلادى؟ وقۋشىعا ساباق جۇرگىزىلەدى، تاپسىرما بەرىلەدى. دۇرىس-اق. ەندى بالالار ءۇي تاپسىرماسىن ءۇي اۋلاسىنا ارنايى ورناتىلعان جاشىككە سالۋى كەرەك ەكەن. ءدال قازىرگى جاعدايدا باستى نازاردا وقۋشىنىڭ «ءۇي تاپسىرماسى» ەمەس، بالانىڭ دەنساۋلىعى ەمەس پە؟!

ءۇي تاپسىرمالارىن ەرىكتىلەر جيناۋ كەرەك، جوسپار بويىنشا. اۋىل، اۋدان ورتالىقتارىندا ەرىكتىلەر جوق. كارانتيننىڭ قاتاڭ رەجيمى قايدا قالدى؟ ۇيدەن شىقپاۋ تۋرالى ماسەلە شە؟

ەرىكتىلەر ورنىنا اۋىل جاعدايىندا مۇعالىمدەر ءۇي تاپسىرماسىن جيناپ، كوشەدە جۇرەدى. بۇل ءبىر ماسەلە.

ەندى جاشىكتەردەن الىنعان تاپسىرمانى كىم رەتتەيدى؟ ءار ءپان، ءار سىنىپ بويىنشا قالىڭ قاعازدى جىكتەپ، رەتتەۋ قاجەت. مۇعالىمدەر ۇيدە وتىرۋى ءتيىس، دەپ حابارلاندى. ال قازىرگى كەزدە اۋداندىق، وبلىستىق ءبىلىم بولىمدەرى ءتۇن ورتاسىنا دەيىن تەلەديدار مەن كومپيۋتەر تۇگەندەۋمەن اينالىسۋدا. ولارعا كارانتيننىڭ قاتىسى جوق پا؟ ولار ەندى ءۇي تاپسىرماسىن «سورتتاۋعا» كىرىسپەي مە دەگەن قورقىنىش بار.

ءار ساباقتىڭ تاپسىرماسىن ءپان بويىنشا مۇعالىمدەردىڭ ۇيىنە جەتكىزۋ كەرەك! ءۇي تاپسىرماسىن تاسۋ ءۇشىن اكىمشىلىكتەن كولىك قاراستىرىلىپ، بۇل مىندەت ەرىكتىلەرگە ەمەس، مۇعالىمدەرگە جۇكتەلىپ جاتىر. ءبىلىم جۇيەسى جۇمىسىن توقتاتپاپتى دەلىك، مينيسترلىك مۇنداي جولمەن قانداي ساپا كورسەتكىشىن كوزدەپ وتىر؟

كوروناۆيرۋسقا شالدىققان ناۋقاستاردىڭ سانى بۇگىنگى كۇنى 550-دەن استى. الىس-جاقىن ايماقتاردى دا قامتىدى. باستى نازاردا كارانتين رەجيمى ەمەس پە؟! قىسى قاتتى ايماقتاردا كوپ جاعدايدا اپتالاپ ساباق توقتايدى. بۇگىندە ولار ءبىلىم كوشىنەن قالعان جوق قوي؟! بۇرىندا كولحوزدىڭ جوسپارى بويىنشا مەكتەپ وقۋشىلارى ايلاپ قىرمانعا، ەگىستىك، ساقپان، كارتوپ جيناۋ سياقتى جۇمىستارعا جەگىلەتىن. سول ءداۋىردىڭ شەتىن ءوزىمىز دە كوردىك. ەكى اي مەكتەپكە بارماساق تا، ساباقتى ۇلگەرىپ وقىدىق.

ول كەزدەگى ءبىلىم جۇيەسى وقۋشىلاردى ۇلگەرتتى. IV توقسان - قايتالاۋ توقسانى. ۇبت تاپسىراتىن وقۋشىلارعا ساباق وقۋ جاعدايى تولىق جاسالسىن. تۇسىنەمىن. ال ۇدەپ كەلە جاتقان ىندەتتى ىسىرىپ قويىپ، كوشەدە كوپشىلىكتىڭ ءۇي تاپسىرماسىن تاسۋى اقىلعا قونبايدى.

قۇرمەتتى، قاسىم-جومارت كەمەلۇلى!

ءار سوزىڭىزدە حالىقتىڭ دەنساۋلىعى ماڭىزدى ەكەنىن قايتالاپ ايتىپ، ءار ازاماتتىڭ ۇيدەن شىقپاۋى ءۇشىن ءتيىستى تاپسىرمالار بەردىڭىز. كارانتين تالاپتارى ءوز دەڭگەيىندە ورىندالۋى ءۇشىن ەلىمىزدە بارلىق جاعداي جۇرگىزىلىپ جاتىر. بالالار مەن ءبىلىم ءبولىمىنىڭ ماماندارى، مۇعالىمدەردىڭ دەنساۋلىعى ءۇشىن ءتيىستى شارالار اتقارىلۋىنا ىقپال ەتۋىڭىزدى سۇرايمىز.

ءلايلا نوعايبەكقىزى،

نۇر-سۇلتان قالاسى.

Abai.kz