كارانتيندە كينو كورەم دەۋشىلەرگە سالاقۇلاش ءتىزىم قايدان بولسىن تابىلادى. بايقاسام، سونىڭ ءبارى دەرلىك – امەريكالىق فيلمدەر ەكەن. رەسەيدىكى دە جەتىپ-ارتىلادى. «ەندەشە ءوزىم جاقسى بىلەتىن بولليۆۋد ونىمدەرىنەن ءبىر ءتىزىم جاساسام قايتەدى؟» دەگەن وي كەلدى. قازىرگى ءۇندى كينوسىنىڭ دا سول باياعى «زيتا-گيتا»، «تانتسور ديسكو» سياقتى ەكەنىنە سەنىمدىلەردىڭ ءارى قاراي وقىماي-اق قويۋىنا بولادى، ال باسقالارىڭىز قول بوستا قاراپ شىقساڭىزدار، وكىنبەيسىزدەر.

1. نيردجا/ NEERJA (2016)
ومىردە بولعان وقيعا جەلىسىمەن تۇسىرىلگەن. 1986 جىلعى 5 قىركۇيەكتە ستيۋاردەسسا نيردجا بحانوت ۇشاقتى تەرروريستەر باسىپ العانىنا قاراماستان 359 جولاۋشىنى قۇتقارىپ قالادى. بىراق ءوزى قۇتىلا الا ما؟

2. دانگال/ DANGAL (2016)
بۇل دا – ناقتى تاعدىر. بالۋان ماحاۆير پحوگات سينگح ءوزى جەتە الماعان تابىسقا ۇلىم جەتسە دەپ ارماندايدى. بىراق قۇداي وعان ۇل بەرمەيدى. ءتورت قىزى بولادى. ءبىر كۇنى ماحاۆير ەكى ۇلكەن قىزىنىڭ وزدەرىنە تيىسكەن ۇلداردى ۇرىپ تاستاعانىن ەستيدى. «نەگە قىزدارىمنان بالۋان شىعارماسقا؟» دەگەن وي كەلەدى وعان...

3. تري يديوتا/ 3 IDIOTS (2009)
ەكى دوس كەزىندە بىرگە وقىعان، بىراق كەيىن مۇلدە ۇشتى-كۇيلى جوعالعان رانچو ەسىمدى جىگىتتى ىزدەيدى. ىزدەۋ بارىسىندا باياعى قىزىق پەن شىجىقتىڭ تالايى ەسكە تۇسەدى. بىراق رانچو تابىلمايدى. ول ءوزى كىم ەدى؟ رانچو ونىڭ شىن اتى ما؟ قايدا كەتۋى مۇمكىن؟ (بىرگە ىزدەڭىزدەر)

4. پويسك/ TALAASH (2012)
فيلمدە ەكى لينيا بار. ءبىرى – كينوجۇلدىز ارمان كاپۋردىڭ جۇمباق ءولىمى. ونىڭ ەشقانداي ماشينا جوق بوس كوشەدە اياق استىنان ءرۋلدى بۇرىپ، كوپىردەن سۋعا قويىپ كەتكەنى قالاي؟ پوليتسيا بۇل قۇپيانىڭ سىرىن اشپاق بولادى. ەكىنشىسى – پوليتسەيدىڭ جەكە قاسىرەتى. جالعىز ۇلى مەن دوسىنىڭ بالاسى ەكەۋى شومىلىپ ءجۇرىپ، سۋعا باتىپ كەتەدى. جۇگىرە جەتكەن پوليتسەي اناۋ بالانى قۇتقارىپ قالادى، ال ءوز ۇلىن قۇتقارىپ ۇلگەرە المايدى. سوعان ءوزىن كىنالى سانايدى. بىراق كىنالى مە؟ سىر سوڭىندا اشىلادى.

5. پيكەي/ PK (2014)
باسقا پلانەتادان كەلگەن، ادامزات قوعامىنداعى قالىپتاسقان ستەرەوتيپتەردەن ەش بەيحابار پيكەي ءوزىنىڭ بالاداي اڭعال سۇراقتارىمەن، تازا كوزقاراسىمەن بارىمىزگە دە ۇلكەن وي سالادى. قۇداي بىرەۋ بولسا، وندا ءدىن نەگە كوپ؟ بۇل – پيكەي كوتەرەتىن ماسەلەلەردىڭ تەك بىرەۋى عانا...

6. پوسلەدنيايا نادەجدا/ BLACK (2005)
كىشكەنتاي سوقىر قىز ەش تاربيەگە كونبەيدى: تاماقتى قولىمەن مىجىپ، شاشىپ جەيدى، ت.ب. ەشكىمدى تىڭداماي جۇرگەندە ۇيگە ءبىر قارت مامان كەلەدى. ول قىزدى ۇستەل باسىندا دۇرىس وتىرۋعا، ۇلكەندى تىڭداۋعا، جالپى تارتىپكە ۇيرەتەدى، اقىرىندا ءتىپتى وقىپ، جازىپ، جوعارى ءبىلىم الۋعا جەتكىزەدى. بۇل قالاي مۇمكىن بولدى؟ كۇندەردىڭ كۇنىندە سول شالدىڭ ءوزى دە پسيحيكالىق دەرتكە شالدىعادى. ال وعان كىم كومەكتەسەدى؟

7. سرەدا/ WEDNESDAY (2008)
پوليتسياعا بىرەۋ حابارلاسىپ، تۇرمەدەگى ءتورت تەرروريستى بەلگىلى ءبىر ادرەسكە جەتكىزۋدى تالاپ ەتەدى، ايتپەسە ءبىر مەزگىلدە بىرنەشە جەردە بومبا جارىلاتىنىن ايتادى. پوليتسيا ونىڭ تالابىن ورىنداۋعا ءماجبۇر، بىراق بۇل ءتورت تەرروريستى الگى ادام نە ىستەيدى؟ سول ادام مەن پوليتسيا ينسپەكتورىنىڭ اراسىنداعى كەرەمەت مازمۇندى ديالوگ ءۇشىن عانا كورۋگە بولاتىن فيلم.

8. تەلەفوننايا بۋدكا/ KNOCK OUT (2010)
بۇكىل فيلم بويىنا تەلەفون بايلانىسى ۇزىلمەيدى. سول بايلانىس ارقىلى حالىقتىڭ ەسەبىنەن جەگەن مول قاراجاتتى شەتەلدىك بانككە تىققان شەنەۋنىكتىڭ تاعدىرى شەشىلەدى. شىتىرمان وقيعالى دەتەكتيۆ، ال فينال تىپتەن توسىن!

9. ليۋبياششيە سەردتسا/ DIL CHAHTA HAI (2001)
ءۇش جىگىتتىڭ تارتىمدى حيكايالارى. اكاش ءبىر قىزعا عاشىق، بىراق ونىڭ جىگىتى بار ەكەن. ساميرعا اكە-شەشەسى ۇيلەنەتىن قىز دايىنداپ قويىپتى. ال ءسيدتىڭ جاقسى كورەتىنى – جاسى ۇلكەن ايەل... ۇشەۋىنىڭ تاعدىرى قالاي وزگەرەدى؟ دوستىقتارىن ساقتاپ قالا الا ما؟

10. جيزن نە موجەت بىت سكۋچنوي/ ZINDAGI NA MILEGI DOBARA (2015)
مۇندا دا ءۇش جىگىتتىڭ ءۇش ءتۇرلى وقيعاسى، بولمىسى، تاعدىرى قامتىلعان. ۇشەۋى دەمالىستى يسپانيادا وتكىزەدى. سول جاقتا ءجۇرىپ، ارقايسىسىنىڭ قۇپيا سىرلارى اشىلادى. ءارى كوڭىلدى، ءارى ويلى فيلم.

11. برات بادجرانگي/ BAJRANGI BHAIJAN (2015)
كىشكەنتاي پاكىستاندىق مىلقاۋ قىز اناسى ۇيىقتاپ جاتقاندا الدەبىر سەبەپپەن پويىزدان ءتۇسىپ، قايتا مىنە الماي، ءۇندىستاندا قالىپ قويادى. ونى ءوز وتانىنا، وتباسىنا كىم اپارادى؟ قالاي اپارادى؟ جولدا قانداي كەدەرگىلەر بولادى؟ ەكى ەل اراسىنداعى كۇردەلى احۋالدى ەسكەرسەك، وتە قيىن جاعداي. بىراق سونداي ءبىر ادام شىعادى. وتە مەيىرىمدى فيلم.

12. كابۋلسكي ەكسپرەسس/ KABUL EXPRESS (2006)
تاليباندار داۋىرىنەن كەيىن اۋعانستاندا تۇسىرىلگەن العاشقى فيلم. كەيىپكەرلەردىڭ ارقايسىسىن سول ۇلتتىڭ وكىلى وينايدى: اۋعاندىق حايبەردى – اۋعان اكتەرى حانيف حامگام، پاكىستاندىق تاليبتى – سول ەلدىڭ اكتەرى سالمان شاحيد، اقش ءجۋرناليسى دجەسسيكانى – امەريكالىق اكتريسا ليندا ارسەنيو، ۇندىلىك رەجيسسەر مەن وپەراتوردى – ءۇندى اكتەرلەرى دجون ابراحام مەن ارشاد ۆارسي وينايدى. ارقايسىسى ءوز ەلىنىڭ ۇستانىمىنىڭ دۇرىس ەكەنىن دالەلدەۋگە تىرىسادى. شىن مانىندە، دۇرىسى قايسىسى؟

13. ۆوزۆراششەنيە نا رودينۋ/ SWADES (2004)
اقش-تاعى NASA عارىش اگەنتتىگىنىڭ جەتەكشى مامانى موحان ەكى اپتاعا ەلىنە – ۇندىستانعا بارىپ قايتپاق بولادى. بارۋىن بارادى-اۋ، قايتۋىن ايتسايشى. ونىڭ تۋىستارى تۇراتىن اۋىلدا جاعداي قيىن: جول بىت-شىت، ينتەرنەت بايلانىسى ناشار، جارىق بىردە بار، بىردە جوق، ادامداردىڭ تۇرمىسى تومەن... جۇرت وكىمەتكە سىلتەيدى، وكىمەت حالىقتىڭ ءوزىن كىنالايدى. نە ىستەۋ كەرەك؟ موحان قانداي شەشىمگە كەلەدى؟

14. مەست وبمانۋتوي جەنششينى/ EK HASINA THI (2004)
ايەلدى قورلاما، ار-نامىسىن اياققا تاپتاما، وعان ساتقىندىق جاساما. ايتپەسە ايتقانىڭنان شىقپاستاي كورىنگەن جۋاس ايەلدىڭ جۇرەگىندە كەك وتى ويانادى. سوندا نە بولادى؟ سۇمدىق بولادى...

15. گادجيني/ GHAJINI (2008)
ساندجاي تەك 15 مينۋت بۇرىن نە بولعانىن عانا بىلەدى. ودان ارعىنى ۇمىتىپ قالادى. سوندىقتان ول بۇگىن، ەرتەڭ، ارعى كۇنى نە ىستەيتىنىنىڭ ءبارىن قاعازعا، ءتىپتى ءوز دەنەسىنە جازىپ الادى. بىراق مۇنىڭ سوڭىنان ءتۇسۋشى دە از ەمەس. بۇل كىم ءوزى؟ ول ىزدەپ جۇرگەن گادجيني كىم؟

16. ستوليك Nو21/ TABLE No21 (2013)
جاس جۇبايلار فيدجي ارالىنا دەمالۋعا بارادى. سونداعى حان ەسىمدى وتەل يەسى ولاردى «21-ۇستەل» دەگەن ويىن ويناۋعا شاقىرادى. ويناۋعا كەلىسكەن سورلىلاردىڭ اقىرىندا سورى قاينايدى. نەگە؟ حان كىم؟ بالكىم، بۇرىن جاس جۇبايلاردىڭ ءوزى بىردەمە بۇلدىرگەن بولار؟

17. يگراەم روك! / ROCK ON!! (2008)
«ماگيا» اتتى روك-گرۋپپا تۋرالى فيلم. بىراق مۋزىكا تۋرالى ەمەس، توپتاعى ءتورت مۋزىكانتتىڭ بولەك-بولەك مىنەزى، دارىنى، تاعدىرى جايىندا. تابىس ادامدى وزگەرتە مە؟ ادام ءوز ءومىرىن قالاي وزگەرتە الادى؟

18. يگراەم روك-2/ ROCK ON-2 (2016)
ءبىرىنشى ءفيلمنىڭ جالعاسى. مۇنداعى درامالىق شيەلىنىستەر ودان دا تەرەڭىرەك دەۋگە بولادى.

19. ترەتيا سترانيتسا / PAGE 3 (2005)
جۋرناليستەر تۋرالى فيلم. ءۇشىنشى بەت – ءۇندى باسپاسوزىندە شوۋ-بيزنەس، كينو، ساياسات جۇلدىزدارىنىڭ ءومىرى تۋرالى باياندايتىن ءداستۇرلى بەت. مادحاۆي ۇنەمى وسى بەتتى جۇرگىزەدى، جۇرگەن جەرىنىڭ ءبارى – قوناقاسى، تۇساۋكەسەر، فوتوسەسسيا... شوۋ-بيزنەس وكىلدەرىنىڭ بارىمەن دەرلىك تانىس، دوس... ءبىر كۇنى الدەقانداي وقىس وقيعا سەبەپ بولىپ، ول تەرەڭ ويعا باتادى: مەن نە ىستەپ ءجۇرمىن؟ وسى ما مەن اڭساعان جۇمىس؟ جالپى ناعىز جۋرناليستيكا دەگەن قانداي؟ مادحاۆي اقىرى ءبىر شەشىمگە كەلەدى. ناعىز قىزىق ەندى باستالادى...

20. ينگليش ۆينگليش / ENGLISH VINGLISH (2012)
اعىلشىن ءتىلىن ءتورت اپتادا ۇيرەنۋگە بولا ما؟ بولاتىن شىعار. بىراق قوعامداعى ورنىڭ، وتباسىنداعى بەدەلىڭ جەتەكشى ءتىلدى ءبىلۋ-بىلمەۋىڭە بايلانىستى ما شىنىمەن؟ اعىلشىنشا بىلمەگەن ادام – ادام ەمەس پە؟ ويناقى فيلم، بىراق ويلاندىراتىن تۇستارى جەتەرلىك.

ساكەن سىبانباي

Abai.kz