ەلوردادا قمدب توراعاسى ناۋرىزباي قاجى تاعانۇلىنىڭ ۇيىتقى بولۋىمەن قازاقستان مۇسىلماندارى ءدىني باسقارماسىنىڭ ورتالىق اپپاراتى جانىنان ءدىني اقپارات ورتالىعى، ياعني، call center اشىلدى.

ورتالىقتا ءدىن سالاسىنىڭ ايتۋلى ماماندارى تاۋلىك بويى قازاق جانە ورىس تىلدەرىندە قىزمەت كورسەتەدى.

بۇگىندە ءدىني اقپارات ورتالىعىنا (call-center) ءبىر تاۋلىكتە شامامەن 50-60 سۇراق كەلىپ تۇسەدى ەكەن.ودان بولەك كوپشىلىك WhatsApp جەلىسى ارقىلى دا ءوز ساۋالدارىن جولدايدى. ورتالىقتىڭ ستاتيستيكاسى بويىنشا، بۇگىنگى تاڭدا سۇراق قويۋشىلاردىڭ باسىم كوپشىلىگى الەمدە تارالعان كوروناۆيرۋس ىندەتىنەن ساقتانۋدىڭ جولدارى جايلى،جۇقپالى ىندەتكە ارنايى وقىلاتىن دۇعالار جونىندە، جۇما نامازىنا قاتىستى قازاقستان مۇسىلماندارى ءدىني باسقارماسىنىڭ ۇكىمدەرى جايلى تاعى باسقا الۋان ءتۇرلى ساۋالدار جولدايدى.

باس ءمۇفتيدىڭ ايتۋىنشا، قازاقستان  مۇسىلماندارى ءدىني باسقارماسىنىڭ نەگىزگى باعىتتارىنىڭ ءبىرى – جاماعات تاراپىنان قويىلاتىن الۋان ءتۇرلى ءدىني ساۋالدارعا جاۋاپ بەرۋ. وسى ارقىلى پرەزيدەنتتىڭ حالىق ۇنىنە قۇلاق اساتىن مەملەكەت قالىپتاستىرۋ يگى جوباسىن جۇزەگە اسىرۋ دەيدى.

ناۋرىزباي قاجى تاعانۇلى، قمدب توراعاسى:

-مەملەكەت باسشىسى قاسىم-جومارت توقاەۆتىڭ حالىق ۇنىنە قۇلاق اساتىن مەملەكەت قالىپتاستىرۋ اتتى ىزگى جوباسىنىڭ نەگىزىندە ەلىمىزدىڭ ءار سالاسىندا ءتۇرلى ءىس-شرالار قولعا الىنىپ جاتىر. وسى تۇرعىدا قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتارىنىڭ ءبىرى – كوپشىلىك تاراپىنان قويىلعان ءدىني سۇراقتارعا جاۋاپ بەرىپ، وزەكتى ماسەلەلەر بويىنشا ءپاتۋا شىعارۋ. قازىرگى كەزدە ءبىز ەلىمىزدەگى توتەنشە جاعداي كەزىندە حالىقتىڭ يمانىن كۇشەيتىپ، الداعى كۇنگە دەگەن ءۇمىتىن ارتتىراتىن، جىگەرلەندىرەتىن ناسيحاتتى كوبىرەك ايتۋعا ءتيىسپىز. وسى باعىتتا قولعا الىنىپ جاتقان وينلاين دارىستەر مەن ۋاعىز-ناسيحات جۇمىستارىن جانداندىرۋ كەرەك،- دەدى باس ءمۇفتي.

ايتا كەتەيىك، وسى ۋاقىتقا دەيىن مۇنداي call-center رەسپۋبليكالىق “ازىرەت سۇلتان” مەشىتىنىڭ جانىنان اشىلعان بولاتىن. قازاقستان مۇسىلماندارى ءدىني باسقارماسى مەن شاريعات جانە ءپاتۋا ءبولىمى قىزمەتكەرلەرىنىڭ تاجىريبەسى مەن ءبىلىمى ەسكەرىلىپ، اقپارات ورتالىعىنىڭ قىزمەتى ءمۇفتياتتىڭ باس عيماراتىنا كوشىرىلدى.

سونىمەن، ەلورداداعى ءدىني اقپارات ورتالىعىنىڭ بايلانىس نومەرى 33-30-30. ورتالىققا ەلوردانىڭ كودى ارقىلى بايلانىسقا شىعۋعا بولادى.

ال، اتالعان ورتالىقتىڭ اشىلۋ راسىمىندە باس ءمۇفتيدىڭ ءوزى ەلىمىزدىڭ تۇكپىر-تۇكپىرىنەن كەلگەن سۇراقتارعا جاۋاپ بەردى.

وسىلايشا قازاقستان مۇسىلماندارى ءدىني باسقارماسىنىڭ حالىقپەن بايلانىسى ەلىمىزدەگى توتەنشە جاعداي كەزىندە جاڭاشا باعىت الدى.

Abai.kz