بارىنشا ۇنەمشىل بولۋعا ۇيرەنۋ كەرەك
كوروناۆيرۋستىڭ ۆاكتسيناسى جاسالماي بۇل ىندەت تولىققاندى توقتايدى دەپ ايتۋ قيىن. تىعىز قارىم-قاتىناسى بار مىنا جاھاندىق داۋىردە ءبىر عانا مەملەكەت وقشاۋلاۋ تاسىلىمەن ىندەتتى اۋىزدىقتاعانىمەن، الەمدە تۇبەگەيلى توقتامايىنشا بۇل ىندەت كەز-كەلگەن ۋاقىتتا قايتا ءورشۋى مۇمكىن. عالىمداردىڭ پىكىرىنشە ۆاكتسينا ەندى 5-6 ايدا دايىن بولادى ەكەن. سوندىقتان تولىققاندى قالىپتى دا، قاۋىپسىز ءومىر جارتى جىلدان كەيىن باستالۋى ىقتيمال. كارانتين سوزىلعان سايىن الەم ەكونوميكاسى قۇلدىراي تۇسەدى. كوپ ەلدەردىڭ جيناعان قورى تاۋسىلادى نەمەسە بارىنشا ازايادى. ءارتۇرلى كەلەڭسىز جاعدايلار ورىن الۋى مۇمكىن.
جارتى جىلدا الەمدە ىندەت توقتاعانىمەن ونىڭ ەكونوميكالىق، ساياسي، الەۋمەتتىك، پسيحولوگيالىق سالدارى كوپكە سوزىلادى. الەمدە قالىپتاسقان تەپە-تەڭدىلىك شايقالادى. الەم وزگەرىپ، جاڭادان ديزاين جاسالادى. ادامزات تاريحى كوروناۆيرۋستان بۇرىن جانە كەيىن دەپ ءبولىنىپ جاتسا، تاڭ قالماڭىز. الەمدى ابىگەرگە سالىپ، ىقپالى ۇزاققا سوزىلاتىن مۇنداي كۇردەلى كەزەڭ ادامزات تاريحىندا ۇزاق جىلدار بولماعان ەدى.
الدىمىزدا قيىن-قىستاۋ زامان كەلە جاتىر. سوندىقتان حالقىمىز ارقانى كەڭگە سالماي بارىنشا ۇنەمشىل بولۋعا ۇيرەنۋى كەرەك.
ەلىمىزدە ىندەت اۋىزدىقتالعان جاعدايدا دا مەملەكەتىمىز شەتەلمەن بايلانىستى قاتاڭ باقىلاۋعا الۋدى جالعاستىرۋى ءتيىس. ەلىمىزدەگى كوپتەگەن ءىرى بيزنەس وكىلدەرى شىعىنعا ۇشىرايتىندىعى ءسوزسىز. قارجىسى كوپ شەتەلدىك بايلار ولاردى ساتىپ الا باستايدى. سوندىقتان ستراتەگيالىق ماڭىزى بار كاسىپورىندار مەن بيزنەستەردى مەملەكەت ساقتاپ قالۋدى، شەتەلگە ساتىلماي وزىمىزدە قالدىرۋ جاعىنا نازار اۋدارۋى ءتيىس.
مۇنايعا سۇرانىس ازايعاندىقتان بيۋدجەتكە ءتۇسىم از بولارى بارىمىزگە ءمالىم. سوندىقتان اۋىل-شارۋاشىلىعىنا ءمان بەرۋىمىز كەرەك.
اللا ادامزاتقا راقىمىن توكسىن!
قايرات جولدىبايۇلىنىڭ الەۋمەتتىك جەلىدەگى جازباسى
Abai.kz
