قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 2020 جىلعى قاڭتار-ناۋرىزداعى الەۋمەتتىك-ەكونوميكالىق دامۋ قورىتىندىسى جانە رەسپۋبليكالىق بيۋدجەتتىڭ اتقارىلۋى قارالدى.

ەكونوميكانىڭ، بانك سالاسىنىڭ احۋالى، رەسپۋبليكالىق بيۋدجەتتىڭ ورىندالۋى، مەملەكەتتىك ساتىپ الۋلارداعى جەرگىلىكتى قامتۋ تۋرالى ۇلتتىق ەكونوميكا ءمينيسترى ر. دالەنوۆ، ۇلتتىق بانك توراعاسى ە. دوساەۆ، پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ، «سامۇرىق-قازىنا» ۇاق» اق كومپانيالارىنىڭ كورسەتكىشتەرى تۋرالى – قوردىڭ باسقارما توراعاسى ا. ەسىموۆ، ونەركاسىپ پەن ەنەرگەتيكا سەكتورىنداعى جاعداي تۋرالى يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ، ەنەرگەتيكا ءمينيسترى ن. نوعاەۆ، وڭىرلەردىڭ دامۋى تۋرالى قوستاناي، الماتى، اقتوبە وبلىستارىنىڭ اكىمدەرى ا. مۇحامبەتوۆ، ا. باتالوۆ جانە و. ورازالين باياندادى.

بيىل قاڭتار-ناۋرىز ايلارىندا ءجىو ءوسىمى 2019 جىلدىڭ سايكەس كەزەڭىنە 2,7% قۇرادى. نەگىزگى كاپيتالعا سالىنعان ينۆەستيتسيالار 5,1%-عا ارتتى. التىن-ۆاليۋتا قورى $30 ملرد جەتتى، ۇلتتىق قور اكتيۆتەرى – $57,5 ملرد.

ەلىمىزدىڭ نەگىزگى سالالارى جالپى وڭ ديناميكا كورسەتتى. تاۋ-كەن ءوندىرىسى سالاسىنداعى ءوسىم – 5%، وڭدەۋ سالاسىندا – 8,8%، قۇرىلىستا – 11,7%، ماشينا جاساۋدا – 30,4% كورسەتتى. دەگەنمەن، الەمدەگى پاندەمياعا بايلانىستى ەنگىزىلگەن شەكتەۋلەردىڭ اسەرى بىرتىندەپ بايقالا باستادى — وسى جىلدىڭ ءبىرىنشى توقسانىندا ساۋدانىڭ ءوسۋى 1%-دى، قارجى سالاسى مەن ساقتاندىرۋ قىزمەتتەرى – 0,7%-دى قۇرادى، ال كولىك سەكتورى 1,3%-عا تومەندەپ، تەرىس ديناميكا كورسەتتى.

بيىلعى ءبىرىنشى توقسانىنىڭ قورىتىندىسى بويىنشا نەگىزگى كورسەتكىشتەر بويىنشا الەۋمەتتىك-ەكونوميكالىق دامۋدىڭ ءوسۋىنىڭ وزىق قارقىنى اقمولا، باتىس قازاقستان، تۇركىستان، قوستاناي، قاراعاندى وبلىستارىندا جانە نۇر-سۇلتان قالاسىندا قامتاماسىز ەتىلەدى، ورتاشا رەسپۋبليكالىق كورسەتكىشتەرگە الماتى، اقتوبە، ماڭعىستاۋ، سولتۇستىك قازاقستان، پاۆلودار، شىعىس قازاقستان وبلىستارىندا جانە الماتى قالاسىندا قول جەتكىزىلدى، كەيبىر كورسەتكىشتەر بويىنشا رەسپۋبليكالىق دەڭگەيدەن تومەن دەڭگەيدى اتىراۋ، جامبىل، قىزىلوردا وبلىستارى، سونداي-اق شىمكەنت قالاسى كورسەتتى.

ۇكىمەت باسشىسى ورتالىق جانە جەرگىلىكتى اتقارۋشى ورگانداردىڭ ءبىرىنشى باسشىلارىنا بيۋدجەت قاراجاتىنىڭ ۋاقىتىلى ءارى ساپالى يگەرىلۋىن، ونىڭ ىشىندە ولاردىڭ ەكونوميكانىڭ ناقتى سەكتورلارىنا دەيىن جەتكىزىلۋىن باقىلاۋدا ۇستاۋدى تاپسىردى.

پرەمەر-مينيستر الەمدىك جانە وڭىرلىك ەكونوميكالارداعى قازىرگى سىن-تەگەۋرىندەرگە جاۋاپ رەتىندە ۇكىمەتتىڭ داعدارىسقا قارسى شارالار كەشەنىن قابىلداپ، ىسكە اسىرىپ جاتقانىن اتاپ ءوتتى — جۇمىسپەن قامتۋدىڭ جول كارتاسى بەكىتىلدى، قۇرىلىستى كەڭەيتۋ بويىنشا بىرقاتار مەملەكەتتىك باعدارلامالاردى قارجىلاندىرۋ ۇلعايتىلدى، شوب كاسىپورىندارىن سالىقتىق ىنتالاندىرۋ ەنگىزىلدى، «قاراپايىم زاتتار ەكونوميكاسى» جەڭىلدىكپەن نەسيەلەندىرۋ باعدارلاماسى كەڭەيتىلدى.

«قاجەت شارالار قابىلداندى، ەندى وڭىرلەر قارقىندى جۇمىس ىستەۋى كەرەك. بارلىعى مەملەكەتتىك ورگانداردىڭ ءتيىمدى جانە ۇيلەسىمدى جۇمىسىنا بايلانىستى»، — دەپ ا. مامين، قاتاڭ سانيتارلىق-ەپيدەميولوگيالىق شارالاردى ساقتاۋمەن وڭىرلەردە داعدارىسقا قارسى شارالاردىڭ ىسكە اسىرىلۋىنا باقىلاۋدى قامتاماسىز ەتۋدى تاپسىردى.

Abai.kz