بۇل - دامۋشى ەلدەرگە ساباق بولۋى ءتيىس
مىناۋ بارسەلوناداعى ۆيرۋستان كوز جۇمعان جاندارعا ارنالعان تابىتتار. مىڭداعان تابىت. دامىعان، وركەنيەتتى يسپانيا ەشقاشان مۇنداي جاعدايعا تۇسەمىز دەپ ويلاعان ەمەس. بىراق ءتۇستى.
بۇل ءالسىز، دامۋشى ەلدەرگە ساباق بولۋى ءتيىس. تەك مەملەكەتتىك بيلىگىنە عانا ەمەس، حالقىنا دا.
قۋاتتى اقش-تىڭ اياعى اسپاننان كەلدى. 600 مىڭعا جۋىق ادام ۆيرۋس جۇقتىرىپ، 25 مىڭعا جۋىعى كوز جۇمدى. الەمدەگى ءنومىر ءبىرىنشى ەكونوميكا، ءنومىر ءبىرىنشى دەموكراتيا، ءنومىر ءبىرىنشى اسكەري قۋاتقا يە ەل ۆيرۋستىڭ الدىندا ءدارمەنسىزدىك تانىتۋدا. تريلليوندار ءبولىپ جاتىر، بىراق ونىڭ ءوزى كومەكتەسەر ەمەس. بىراق 320 ملن حالقى بار اقش بۇل قيىندىقتان شىعادى، ءتىپتى 20 مىڭ ەمەس، 20 ملن شىعىن بولسا دا قۇتىلادى. قايتا قۋاتىنا كەلەدى. ويتكەنى دەرجاۆا، گەگەمون.
ال ءبىز سياقتى ءالسىز، الەمدىك ساياساتتىڭ جەلى قالاي سوقسا، سولاي سۇلاپ تۇسەتىن ەلدەر قايتپەك؟ ولاردى كىم قۇتقارادى؟ ولار قالاي شىعادى مىنا تىعىرىقتان؟ ولاردى ءوز بيلىگى مەن حالقى عانا قۇتقارادى. باسقا ەشكىم ەمەس.
بۇگىن بىزدە ۆيرۋس جۇقتىرعان 140 ادام تىركەلدى. 18,5 ملن حالقى بار ەل ءۇشىن ۇلكەن سان. ونىڭ 106-سى الماتىدا. ءتىپتى شوشىتارلىق. جالپى ۆيرۋس جۇقتىرعانداردىڭ سانى 1100-گە جاقىندادى. عالىمداردىڭ ايتۋى بويىنشا مىڭعا جەتكەن سوڭ ۆيرۋستى جۇقتىرۋ قارقىنى ارتادى. ماتەماتيكالىق قاراپايىم ەسەپ قوي. سوندىقتان بارلىق ساقتىق شارالارىن كۇشەيتكەن ءجون سياقتى. دالاعا شىقپاۋ، ۇيدە بولۋ، جاۋاپكەرشىلىكتى سەزىنۋ، گيگيەنا ساقتاۋدى قاداعالاۋ كەرەك. جاۋىر بولعان اقپارات بولسا دا، قايتالاپ ايتا بەرۋ ابزال.
كوكتەم، دالادا اۋا رايى كەرەمەت. ادامدى وزىنە باۋراپ، شاقىرىپ تۇرادى. شىعىپ، سەرۋەندەگىمىز كەلەدى. بىراق ءوزىمىزدى تەجەپ ۇيدە وتىرعان ءجون. دالاعا سەبەپسىز سەكەڭدەپ شىعۋ - سوڭعى كوكتەمگە اكەلۋى مۇمكىن. مىنا ىندەتتى جەڭسەك - تەزدەتىپ قالىپتى جاعدايعا ورالامىز.
اسحات قاسەنعاليدىڭ الەۋمەتتىك جەلىدەگى جازباسى
Abai.kz
