اينالايىن، اعايىن!

مىنا ءبىر سوزىمە قۇلاق اسقاندارىڭىز ءجون. مەن ارداگەر سپورتشىمىن. مەنى قازاق حالقى وليمپيادا چەمپيونى دەپ قۇرمەتتەيدى. حالىقتىڭ وسىنداي قۇرمەتىنە بولەنۋ ءۇشىن مەن تالاي جىل بوز كىلەمدە تەر توكتىم. سان مارتە جاراقات الىپ، قينالعان كۇندەرىم كوپ بولدى. بىراق، مەن وعان مويىمادىم. اياقتان شالىپ، قىسپاققا العان كەزدەردى دە باستان وتكەردىم. وسىنداي قيىنشىلىقتا ءجۇرىپ، مەن ەلىمنىڭ اتىن شىعاردىم. مىنە، مەنىڭ بار ەرلىگىم وسى. ۇلكەن سپورتتان كەيىن مەن مال شارۋاشىلىعىمەن اينالىسىپ كەلەمىن. ەلىمە قانداي دا بولسا، ءبىر پايدام ءتيسىن دەگەن جالعىز ويىم. كاسىپ اشىپ، ەلگە جۇمىس بەرۋ، سول تابىستىڭ ءبىر بولىگىن حالىققا ءبولىپ بەرۋ. اۋىلدى جەرگە قانداي قولداۋ ءبىلدىرىپ وتىرعىنىمدى، ونى وزدەرىڭىز دە بىلەسىزدەر.

مەن ىستەگەنىمدى ايتايىن دەپ وتىرعانىم جوق. مەنى تولعاندىراتىن ءبىر ماسەلە. مەنىڭ اتىمدى جامىلىپ، مەن بىلمەيتىن ىسكە ارالاستىرۋ. ساياساتقا مەنى ارالاستىرىپ، پرەزيدەنتكە اشىق حات جازعانداردىڭ تىزىمىنە مەنىڭ دە اتى ءجونىمدى قوسىپ قويىپتى. مەن بۇل ىسكە مۇلدە قاتىسىم جوق. بۇل اشىق حات ۇيىمداستىرعانداردى مۇلدە تانىمايمىن. مەنىڭ رۇقساتىمسىز سىرتىمنان قوسىپ جىبەرۋ ناعىز ارانداتۋشىلىق. ەگەر قاتتىراق ايتار بولسام، بۇل ناعىز قىلمىسقا جاتادى.

اينالايىن اعايىن، مەن مىنا يەنتەرنەت دەگەن جۇيەنى تولىق تۇسىنبەيتىن اداممىن. مەن جاستايىمنان گازەت وقىپ وسكەن جاننىڭ ءبىرىمىن. ءالى كۇنگە دەيىن قولىمنان گازەت تۇسكەن ەمەس. ال مىنا «فەيسبۋك» دەگەن جەلىگە حالي بەكەت دەگەن ازامات جاريالاپتى. بۇل سول حاتتىڭ اۆتورى ما؟ ونى دا انىق تۇسىنە المادىم. مۇنى مەن بالالارىمنان ءبىلدىم. بۇل حاتتى دايىنداعان كىم؟ نەگە مەننەن رۇقسات سۇرامايدى. ءار ىسكە مەنىڭ اتىمدى جاپسىرا بەرەتىن بولساڭىزدار، مەنىڭ جاقسىلىق دەگەن اتىمنان نە قاسيەت قالدى؟! ساياساتپەن مۇلدە ارالاسپايتىن ادامدى اپارىپ، اشىق حاتتىڭ تۇبىنە تىركەي سالعاندارىڭ دۇرىس دەپ سانامايمىن. مەنىڭ ءوز ۇستانىمىم، وزىندىك كاسىبىم بار. ونىڭ سىرتىندا سپورتتا جۇرگەن ءىنى-قارىنداستارىما اقىل كەڭەسىمدى ايتىپ، باتامدى بەرىپ جۇرەمىن. قينالىپ جاتقان جەرى بولسا، قول ۇشىمدى سوزىپ، بولىسىپ جۇرەمىن. مىنە، مەنىڭ كاسىبىم. قارتايعان شاعىمدا اقساقالدىق قاسيەتىمنەن ايىرىلعىم كەلمەيدى. مەنىڭ ءوتىنىشىم، مۇنداي ىسكە مەنى ارالاستىرماڭىزدار، سىرتىمنان توڭ ءپىشىپ، بوسقا ارام تەر بولماعاندارىڭىز ابزال. ەڭ باستىسى مەنىڭ ارىم تازا، ەشكىمنىڭ الدىندا ارىزدانىپ بارعان ەمەسپىن. سوندىقتان، بۇل ىسكە مەنى قوسپاعاندارىڭىز ءجون. قايتالاپ ايتامىن، مۇنداي ءىستىڭ قايتالانباۋىن وتىنەمىن!

جاقسىلىق ۇشكەمپىروۆ،

قر ەڭبەك ەرى، ماسكەۋ وليمپياداسىنىڭ چەمپيونى.

Abai.kz