اقتوبەدە 160-مىڭنان استام ادام 42 500 تەڭگە الدى. قازىر تاعى مىڭداعان ادامنىڭ ءوتىنىشى قارالىپ جاتىر،- دەپ حابارلايدى قازاقپارات. 

توتەنشە جاعداي كەزىندە جۇمىسىنان ايىرىلعان اقتوبە وبلىسىنىڭ تۇرعىندارى 42 500 تەڭگەگە ءوتىنىش بەرىپ جاتىر. ولاردىڭ اراسىندا كوپبالالى انالار، اقىسىز دەمالىسقا شىققاندار بار.

«مەن ءى توپ مۇگەدەگىمىن. توتەنشە جاعدايعا بايلانىستى مەملەكەت كومەك بەردى. سول قولداۋدى سەزىنىپ، اقشالاي كومەك الدىم. قازىر ساقتىق شاراسى كۇشەيىپ، ەل بارىنشا وقشاۋلاندى، ۇيدە وتىر»، - دەدى ويىل اۋدانىنىڭ تۇرعىنى گۇلسىم ەلەكباەۆا.

ال شالقارلىق ايگەرىم الدانوۆ مۇمكىندىگى شەكتەۋلى بالاسىن باعىپ، بار كۇتىمىن جاساپ وتىر.

«مەن 16 جاسقا دەيىنگى مۇمكىنشىلىگى شەكتەۋلى بالانىڭ اناسىمىن. بالاما مەملەكەت تاراپىنان جۇيەلى تۇردە جاردەماقى الامىن. توتەنشە جاعدايعا بايلانىستى ءبىز سياقتى وتباسىلارعا مەملەكەت تاراپىنان الەۋمەتتىك قولداۋ رەتىندە كومەك كورسەتىلىپ جاتقانىنا شەكسىز ريزاشىلىعىمىزدى بىلدىرەمىز. وسىنداي سىن ساعاتتا بەرىلىپ جاتقان كومەك بىزگە ۇلكەن قامقورلىق دەپ بىلەمىز. ەلىمىز بۇعان دەيىن كوپتەگەن قيىنشىلىقتاردى باسىنان وتكەردى. ولاردىڭ قاي قايسىسىن دا بەرەكە - بىرلىكتىڭ، اۋىزبىرشىلىكتىڭ ارقاسىندا جەڭە ءبىلدى. ەگەمەن ەلىمىز بۇل جاعدايدان دا امان - ەسەن شىعاتىنىنا نىق سەنىممەن ايتا الامىن»، - دەدى ول.

Abai.kz