زاحاروۆانىڭ سوزىنە قاراعاندا، رەسەيلىك "ۆەكتور" عىلىمي ورتالىعىنىڭ تەست جۇيەسى وزبەكستانعا كومەك رەتىندە تەگىن بەرىلگەن. زاحاروۆا كوروناۆيرۋسپەن كۇرەس بويىنشا بەلارۋسپەن دە ىنتىماقتاستىق ورناعانىن ايتىپ، "روساتوم" مەملەكەتتىك كورپوراتسياسىنىڭ بەلارۋستىڭ گرودنەن وبلىسى وستروۆەتس اۋدانىنداعى اۋرۋحانالارعا تەست جۇيەسىن جەتكىزگەنىن ايتقان.
بۇعان دەيىن بەلارۋس پرەزيدەنتى الەكساندر لۋكاشەنكو "ۆەكتور" عىلىمي ورتالىعى جاساپ شىعارعان تەست جۇيەسىنىڭ دالدىگى تەك 30 پايىزدى عانا قۇرايدى دەپ سىناعان بولاتىن.
18 ساۋىردە "روسپوترەبنادزور" لۋكاشەنكو سىنىنا جاۋاپ بەردى. رەسەي شەنەۋنىكتەرىنىڭ ايتۋىنشا، مينسكىگە بەرىلگەن رەسەيلىك تەست جۇيەسى كوپتەگەن پارامەتر بويىنشا ءتىپتى شەتەلدىك انالوگتاردان اسىپ تۇسەدى. مۇنداي تەست جۇيەسى COVID-19 اۋرۋىنا شالدىققان، بىراق بەلگىلەرى بايقالمايتىن ادامداردان دا ۆيرۋستى انىقتاي الادى.
"اقپان ايىنىڭ باسىندا قىتايدا جۇرگىزىلگەن سالىستىرمالى سىناق كەزىندە رەسەيلىك تەستتەردىڭ ءتيىمدى ەكەنى دالەلدەنگەن" دەدى ۆەدومستۆو وكىلدەرى.
كوروناۆيرۋس جۇقتىرعاندار سانى جاعىنان بەلارۋس پوستسوۆەتتىك كەڭىستىكتە رەسەيدەن كەيىن ەكىنشى ورىندا تۇر. سوڭعى مالىمەت بويىنشا، بەلارۋستە 4,5 مىڭنان استام ادامنان كوروناۆيرۋس تابىلعان. 42 ناۋقاس قايتىس بولعان. 85 مىڭنان استام تەستتەن وتكەن.
دەگەنمەن بەلارۋستە رەسمي تۇردە كارانتين جاريالانعان جوق، "وقشاۋلاۋ رەجيمى" ەنگىزىلمەدى. شىركەۋلەرگە ادامداردىڭ كەلۋىنە تىيىم سالىنعان جوق، 25 ساۋىردە ەلدە رەسپۋبليكالىق سەنبىلىك وتەدى. مەكتەپ وقۋشلارىنىڭ كوكتەمگى دەمالىسى 20 ساۋىرگە دەيىن سوزىلعان. بەلارۋس - پاندەميا كەزىندە فۋتبول چەمپيوناتىن وتكىزىپ جاتقان ەۋروپاداعى جالعىز مەملەكەت.
13 ساۋىردە بەلارۋس پرەزيدەنتى الەكساندر لۋكاشەنكو ەلدە "كوروناۆيرۋستان بىردە ءبىر ادام قايتىس بولعان جوق جانە قايتىس بولمايدى دا", ال ەگەر ولسە، ۆيرۋستان ەمەس، كوپ اۋرۋمەن اۋىرعاندىقتان قايتىس بولدى دەپ مالىمدەگەن.
Abai.kz
