وقۋ مەن تاربيە ەگىز، ولاردى ءبىر-بىرىنەن ءبولىپ قاراۋعا بولمايدى. ۇلى ويشىل بابامىز  ال-فارابي «ادامعا ەڭ ءبىرىنشى ءبىلىم ەمەس، تاربيە بەرىلۋى كەرەك، تاربيەسىز بەرىلگەن ءبىلىم ادامزاتتىڭ قاس جاۋى» دەپ كورەگەندىكپەن ءدوپ باسىپ ايتقان.

قازىرگى تاڭدا مەملەكەتىمىزدە ساپالى زاماناۋي ءبىلىم بەرۋمەن قاتار، بولاشاق جاستاردى ۇلتتىق، الەۋمەتتىك رۋحاني – ادامگەرشىلىككە تاربيەلەۋدىڭ دە قاجەتتىگى ارتىپ وتىرعاندىعىن بايقايمىز.

بۇگىندە قازۇۋ ستۋدەنتتەرىمەن تاربيە جانە الەۋمەتتىك باعىتتاعى جۇمىستار ءبىلىم بەرۋ ءىسىنىڭ  باستاۋلارى ەكەنى ءسوزسىز. بۇل باعىتتا رەكتورىمىز اكادەميك عالىمقايىر مۋتانوۆتىڭ «اينالاڭدى نۇرلاندىر»، «سالاۋاتتى ءومىر سالتى»، «100 كىتاپ»، «گرين كامپۋس»  سەكىلدى الەۋمەتتىك-تاربيەلىك اۆتورلىق جوبالارى ءوز ناتيجەسىن بەرۋدە. اتالعان جوبالار ءبىرى قايىرىمدىلىقتى ەكىنشىسى، دەنىمىزدىڭ سالاۋاتتىلىعىن، ءۇشىنشىسى، رۋحانياتىمىزدىڭ كوجيەگىن كەڭەيتۋدى ءتورتىنشىسى، قورشاعان ورتامىزدىڭ تازالىعى مەن كورىكتىگىن  ساقتاۋدى ۇيرەتەتىندىگىنە تولىق سەنىمدىمىز. ولاي ايتۋىمىزدىڭ سەبەبى  جوبالار بويىنشا اتقارالىپ جاتقان ءىس شارالاردىڭ تاقىرىپتىق اتاۋلارى مەن مازمۇندىق سيپاتى، وتكىزۋ فورماتى قايتالانبايتىن،  وزگەشە  ءار- الۋان بولىپ كەلەدى. مۇنى اڭعارۋ قيىن ەمەس، ۋنيۆەرسيتەت بويىنشا 800 دەن اسا كۋراتور-ەدۆايزەرلىك توپ جۇمىس جاسايدى. ءار ەدۆايزەر ءوز توپتارىمەن اتالعان ءار جوبا  بويىنشا بىرنەشە مادەني، الەۋمەتتىك–تاربيەلىك  ءىس-شارالار وتكىزىپ جاتىر. بۇگىنگى ەلدەگى قيىن «توتەنشە كارانتين» جاعدايىندا دا جاقسى ىزگى شارالاردىڭ ءوتۋ فورماتى (ونلاين) وزگەرگەنىمەن ءمانى، ماقساتى جالعاسىن تابۋدا.

ناۋرىز ايىنىڭ باسىندا ەكونوميكا ماماندىعى 1 كۋرس ستۋدەنتتەرىمەن «اينالاڭدى نۇرلاندىر» جوبا اياسىندا الماتى قالاسى  اقجار كەنتىندەگى امانات الەۋمەتتىك بالالار ۇيىنە قايىرىمدىلىق شاراسى ماقساتىندا بارىپ قايتۋدىڭ ءساتى ءتۇستى. وسى شاراعا بايلانىستى  جەتىم جانە اتا-اناسىنىڭ قامقورلىعىنسىز قالعان با­لالاردىڭ كوڭىل-كۇيىنە، تۇرمىسىنا جانە ولاردىڭ رۋحا­ني دامۋىنا قانداي  كومەگىمىزدى تيگىزە الامىز دەگەن سۇراققا پىكىر الماستىق. اتا داستۇرىمىزدە جەتىمىن جىلاتۋ – ەل­دىككە – سىن، سۇيەككە – تاڭبا ەدى. سونىمەن ۋاقىت ساتىمەن بالالارعا العان بازارلىعىمىزدى الىپ، ونى بەرىپ، ويىن-كونتسەرتتىك باعدارلامامىزدى كورسەتىپ، ۇيلەرىنىڭ اۋلاسىنا العان ماۋە اعاشتارىمىزدى بىرگە وتىرعىزىپ بالالاردىڭ بالا كۇلكىسى مەن قۋانىشىنا بىرگە قۋانىپ، نۇرلانىپ ءبىر جاراتۋشىمىزدان قۋات العانداي بولدىق. بۇل راس، كىم اللا ريزالىعى ءۇشىن ءبىر جەتىمنىڭ باسىنان سيپاسا، ونىڭ قولى تيگەن ءار تال شاشىنان سايىن جاقسىلىق بولادى دەگەن ءسوز بار.  بارلىق جاقسىلىقتار تەك يماندىلىقتىڭ، ادامگەرشىلىك پەن مەيىرباندىقتىڭ ارقاسىندا بولادى. قايىرىمدىلىق قانات جايىپ، سۇيىسپەنشىلىك،  سالتانات قۇرعان ەلدىڭ عانا بولاشاعى باياندى. بولاشاعىمىز ماڭگىلىك ەل جولىندا وسىنداي يگى ىسىمىزبەن باقىت بيىگىنە جەتە بەرەيىك!

كۋليەۆ ي.ۋ.، تۋراروۆ د.ر.،

ەكونوميكا كافەدراسىنىڭ اعا ەدۆايزەرلەرى.

Abai.kz