وتكەن اپتادا قر ۇكىمەتى اۋەجايلارعا، پورتتارعا، تەمىرجول ۆوكزالدارىنا، تەمىرجول ستانسالارىنا، مەتروپوليتەن ستانسالارىنا، اۆتوۆوكزالدارعا، اۆتوستانسالارعا، فيزيكالىق-گەوگرافيالىق جانە مەملەكەت مەنشىگىندەگى باسقا دا وبەكتىلەرگە اتاۋ بەرۋ تۋرالى قاۋلى قابىلدادى.

ءسويتىپ، مەملەكەت تاۋەلسىزدىگىن نىعايتۋعا ەرەن ەڭبەگى سىڭگەن تۇلعالاردى قوسپاعاندا، اسا كورنەكتى مەملەكەت جانە قوعام قايراتكەرلەرىنىڭ، عىلىم، مادەنيەت قايراتكەرلەرىنىڭ جانە قازاقستان رەسپۋبليكاسى مەن الەمدىك قوعامداستىق الدىندا ەڭبەك سىڭىرگەن باسقا دا جەكە ادامداردىڭ ەسىمدەرى مەنشىك اتاۋلارىنا قايتىس بولعان كۇنىنەن باستاپ كەمىندە بەس جىل وتكەن سوڭ عانا بەرىلەدى، دەگەن شەشىمگە كەلگەن.

قاۋلى العاشقى رەسمي جاريالانعان كۇنىنەن باستاپ ون كۇن وتكەن سوڭ قولدانىسقا ەنگىزىلەدى.

قاراپايىم تىلمەن ايتساق، ەل-حالىققا ەسىم-سويى ءماشھۇر بولعان قايراتكەر تۇلعالاردىڭ ەسىمىن قانداي دا ءبىر نىسانعا بەرۋ ءۇشىن ول ادام قايتىس بولعانىنا بەس جىل ۋاقىت ءوتۋى ءتيىس.

تاقىرىپقا تۇزدىق رەتىندە، ايتا كەتەيىك، بىلتىردان بەرى مەملەكەتتىك مەنشىكتەگى بىرنەشە نىساندارعا ەكس-پرەزيدەنت نۇرسۇلتان نازارباەۆتىڭ ەسىمى بەرىلگەن.

ماسەلەن، 2019 جىلدىڭ 20 ناۋرىزىندا پرەزيدەنت قاسىم-جومارت توقاەۆتىڭ شەشىمىمەن استانا قالاسى نۇر-سۇلتان بولىپ وزگەردى. ارتىنان ىلە-شالا رەسپۋبليكالىق ماڭىزى بار قالالار مەن وبلىستارداعى، اۋداندارداعى ورتالىق كوشەلەرگە ەكس-پرەزيدەنتتىڭ ەسىمى بەرىلگەن بولاتىن.

ال 2017 جىلى ۇكىمەتتىڭ 1996 جىلعى 5 ناۋرىزداعى № 281 قاۋلىسىنا سايكەس، استانا اۋەجايىنا نۇرسۇلتان نازارباەۆتىڭ ەسىمى بەرىلگەن.

Abai.kz