قازاقستان رەسپۋبليكاسىنىڭ ۇلتتىق بانكى ەلىمىزدەگى شاعىن جانە ورتا كاسىپ يەلەرىن جەڭىلدىكپەن نەسيەلەۋدىڭ جاڭا باعدارلاماسىن ازىرلەپ جاتىر.

ايتا كەتسەك، قر ۇەم كاسىپكەرلىكتى دامىتۋ دەپارتامەنتىنىڭ ديرەكتورى شىڭعىس احمەتوۆ وكق-دا ونلاين رەجيمدە وتكەن ءباسپاسوز ءماسليحاتىندا «بيزنەستىڭ جول كارتاسى – 2025» باعدارلاماسى شەڭبەرىندە شاعىن جانە ورتا بيزنەس يەلەرىنە مەملەكەت قانداي قولداۋ شارالارىن كورسەتەتىنىن ءمالىم ەتكەن ەدى.

سونداي-اق دەپارتامەنت ديرەكتورى «قاراپايىم زاتتار ەكونوميكاسى» باعدارلاماسىنا دا قازىرگى جاعدايعا بايلانىستى كوپتەگەن سالانىڭ قوسىلاتىندىعىن اتاپ ءوتتى. «ءبىز وسى باعدارلاما شەڭبەرىندە قولدانىلاتىن سالالار تىزبەسىن كەڭەيتتىك. مىسالى كۇرىش وسىرۋشىلەر، ناۋبايلار، كونديتەرلىك ءونىم وندىرۋشىلەر، جەڭىل مەتالل كونسترۋكتسيالارىن جاساۋ سەكىلدى سالالار وسى باعدارلاما شەڭبەرىنە ەنگىزىلدى»، - دەدى شىڭعىس احمەتوۆ.

دەپارتامەنت ديرەكتورى مەملەكەت باسشىسىنىڭ تاپسىرماسىنا سايكەس باعدارلاما بويىنشا جوبالاردى قارجىلاندىرۋ ءۇشىن جالپى نەسيەلەۋ كولەمى 1 ترلن تەڭگەگە دەيىن ۇلعايعانىن جەتكىزدى. بۇرىن بۇل باعدارلاما شەڭبەرىندە بولىنگەن قاراجاتتىڭ كولەمى – 600 ملرد تەڭگە بولاتىن.

«1 ترلن تەڭگەنىڭ ىشىندە 700 ملرد تەڭگە اگروونەركاسىپ كەشەنى سالاسىنداعى وڭدەۋ مەن وندىرۋگە، 300 ملرد تەڭگە وڭدەۋشى ونەركاسىپ پەن قىزمەت كورسەتۋ سالاسىنا باعىتتالادى. سونىمەن بىرگە مەملەكەت باسشىسىنىڭ تاپسىرماسىنا سايكەس 100 ملرد تەڭگە كوكتەمگى ەگىس جۇمىستارىنا جىبەرىلەدى. «قاراپايىم زاتتار ەكونوميكاسى» باعدارلاماسى بويىنشا نەسيەنىڭ 5 ملرد تەڭگەگە دەيىن – كەپىلدەندىك مولشەرى 30 پايىزدى قۇرايدى. ەگەر قارجىلاندىرۋ سۇرانىسى 3 ملرد تەڭگەدەن اسپايتىن بولسا مەملەكەت تاراپىنان بەرىلەتىن كەپىلدىك 50 پايىزدى قۇرايدى»، - دەدى ول.

شىڭعىس احمەتوۆ ءوز سوزىندە «بيزنەستىڭ جول كارتاسى - 2025» جانە «قاراپايىم زاتتار ەكونوميكاسى» باعدارلامالارى بويىنشا وپەراتور – «دامۋ» قورى بولىپ قالا بەرەتىنىن جەتكىزدى.

«اتالعان شارالارمەن قاتار قر ۇلتتىق بانكى توتەنشە جاعداي كەزىندە زارداپ شەككەن شاعىن جانە ورتا بيزنەستى جەڭىلدىكپەن نەسيەلەۋدىڭ جاڭا باعدارلاماسىن ىسكە اسىرۋعا كىرىستى. وسى ماقساتقا 600 ملرد تەڭگە بولىنەدى. نەسيە مەرزىمى – 1 جىلعا دەيىن 8 پايىزدىق مولشەرلەمەمەن اينالىم قاراجاتىن تولىقتىرۋعا بەرىلەدى»، - دەدى دەپارتامەنت ديرەكتورى.

Abai.kz