قارجىلىق قيىندىق پەن قاۋىپتى ۆيرۋس قوس بۇيىردەن قىسقان الاعاي دا بۇلاعاي شاقتا ەل-حالىقتىڭ تۇرمىسىن تۇزەۋ، ىندەتتىن بەتىن قايتارۋ ءۇشىن مەملەكەت باسشىسى مەن ۇكىمەت تاراپىنان بىرقاتار ماڭىزدى شەشىمدەر قابىلدانعان بولاتىن.

ولاردىڭ ءبىرىسىپىسارى – قالالاردى كارانتينگە جابۋ، دارىگەرلەر مەن مەديتسينا قىزمەتكەرلەرىنە ءۇش اي بويى ۇستەمە اقى تولەۋ، زەينەتاقى، جاردەماقى، ااك مولشەرىن 10 پايىزعا يندەكساتسيالاۋ، كارانتين كەزىندە تابىسىنان ايىرىلعان ازاماتتارعا 42 500 تەڭگەدەن الەۋمەتتىك تولەم بەرۋ (3 ميلليون ادامعا دەپ جوسپارلانعان), بانكتىك نەسيەلەردى شەگەرۋ، 800 مىڭ ادامعا تەگىن ازىق-تۇلىك اكەتتەرىن تاراتۋ، شاعىن جانە ورتا بيزنەستى ۋاقىتشا سالىقتان بوساتۋ، اۋىلشارۋاشىلىعىنا، كوكتەمگى ەگىس ناۋقانىنا قارجىلىق قولداۋ ت.ب.

مەملەكەت باسشىسى مەن ۇكىمەت تاراپىنان ۇسىنىلعان الەۋمەتتىك كومەك پاكەتتەرى ەل-حالىقتىڭ الدىنا جەتە باستادى.

توتەنشە جاعداي كەزىندە مەملەكەت باسشىسى مەن ۇكىمەت قابىلدانعان شۇعىل شارالارعا ءوز كەزىندە قوعامدىق-ساياسي ۇيىمدار مەن ساياسي پارتيالار دا ءۇن قوسا باستادى. سونىمەن، ەلىمىزدەگى ەڭ ءىرى ساياسي پارتيا كارانتين كەزىندە نە ىستەپ جاتىر؟ ءبىز شولۋ جاساپ كوردىك.

150 ميلليون تەڭگە 

قازاقستانداعى ەڭ ءىرى قوعامدىق-ساياسي پارتيا - «نۇر وتان» ەلدە جاريالانعان توتەنشە جاعداي مەن كارانتين كەزىندە تۇرمىسى توتەن وتباسىلار مەن ەل-حالىقتىڭ الەۋمەتىك از قامتىلعان توبىنا قولداۋ رەتىندە 150 ميلليون تەڭگە ءبولدى.

بۇل قارجى كارانتين كەزىندە نۇر-سۇلتان جانە الماتى قالالارىنداعى جالعىزباستى جانە كوپ بالالى انالارعا، قارتتار مەن مۇمكىندىگى شەكتەۋلى ازاماتتارعا ت.ب. كومەك رەتىندە بەرىلمەك.

«بۇل قاراجاتقا قاجەتتى مەديتسينالىق بەتپەردەلەر مەن انتيسەپتيكالىق زاتتار جانە العاشقى قاجەتتى قۇرالدار الىنادى. پارتيا جانىنداعى «جاس وتاندىقتار» مەن ەرىكتىلەر حالىقتىڭ تۇرمىسى تومەن توبىنا تاراتىپ بەرەدى. بۇعان قوسىمشا، ورتالىق اپپارات پەن پارتيا فيليالدارىنىڭ قىزمەتكەرلەرى ءبىر كۇندىك جالاقىلارىن اۋدارۋ تۋرالى شەشىم قابىلدادى»، - دەدى پارتيا توراعاسىنىڭ ءبىرىنشى ورىنباسارى باۋىرجان بايبەك.

ءبىر اپتادا 12 مىڭ وتباسىعا كومەك 

ال «ءبىز بىرگەمىز!» رەسپۋبليكالىق اكتسياسى اياسىندا كوروناۆيرۋس كەزىندە اس-اۋقاتتان تارىلعان ازاماتتارعا، ونىڭ ىشىندە الەۋمەتتىك از قامتىلعان وتباسىلارعا قولداۋ ءۇشىن قوسىمشا قاراجات بولىنگەن. پارتيا توراعاسىنىڭ ورىنباسارى باۋىرجان بايبەكتىڭ ايتۋىنشا، ءبىر اپتانىڭ ىشىندە12 مىڭعا جۋىق وتباسىعا 214 ميلليون تەڭگەنىڭ كومەگى بەرىلگەن.

تۇڭعىش پرەزيدەنت قورى 200 ميلليون ءبولدى

ال 27 ناۋرىز كۇنى «نۇر وتان» پارتياسىنىڭ توراعاسى، تۇڭعىش پرەزيدەنت – ەلباسى نۇرسۇلتان نازارباەۆ پارتيانىڭ بارلىق رەسۋرسى پرەزيدەنت قاسىم-جومارت توقاەۆتىڭ باستاماسىمەن قولعا الىنعان توتەنشە جاعداي كەزىندە ەلدەگى مۇقتاج ازاماتتارعا كومەك ۇيىمداستىرۋ شارالارىنا جۇمىلدىرىلاتىنىن ايتتى.

ەلباسى تاپسىرماسىمەن پارتيا بيۋدجەتىنەن ازاماتتارعا كومەك ءۇشىن 150 ميلليون تەڭگە بولىنسە، تۇڭعىش پرەزيدەنت قورىنان تاعى 200 ميلليون تەڭگە بولىنەتىن بولدى.

ەرىكتىلەر كۇن سايىن 400 ۇيگە بارادى

«جاس وتان» جاستار قاناتىنىڭ جەتەكشىسى ەلنۇر بەيسەنباەۆتىڭ ايتۋىنشا، پارتيا ەرىكتىلەرى كۇن سايىن 400 ۇيگە ازىق-تۇلىك تاراتىپ جاتىر.

«الەۋمەتتىك از قامتىلعان 10 مىڭعا جۋىق وتباسى پارتيادان قايىرىلىمدىلىق پاكەتتەرىن الىپ وتىر. كارانتين كەزىندە ۇيدەن سەبەپسىز شىعۋعا جانە بولمايدى. سوندىقتان، ءبىزدىڭ ەرىكتىلەرىمىز 2 اپتا ىشىندە ولاردى بارلىق قاجەتتىلىكپەن قامتاماسىز ەتۋگە تىرىسادى. ول پاكەتتەردىڭ ىشىندە مەديتسينالىق بەتپەردەلەر، انتيسەپتيكتەر، ازىق-تۇلىكتەر ت.ب. قامتىلعان»، - دەدى بەيسەنباەۆ.

وڭىرلەردەگى پارتيا مۇشەلەرى دە كارانتين كەزىندە قايىرىمدىلىقتان شەت قالمادى.

كوپ تۇكىرسە كول

اقمولادا «نۇر وتان» پارتياسىنىڭ مۇشەسى جەكە كاسىپكەر دينا نۇرماقوۆا 1,2 ميلليون تەڭگەگە بەتپەردە ساتىپ الىپ، «جاس وتان» ەرىكتىلەرى ارقىلى كوپ بالالى وتباسىلارعا، مۇقتاج ازاماتتار مەن قارت كىسىلەرگە ۇلەستىرىپ بەرگەن.

ال شىمكەنتتىك كاسىپكەر قايرات مولداسەيىتوۆ ازىق-تۇلىككە مۇقتاج ازاماتتارعا دەپ 20 ميلليون تەڭگە بولگەن. سونداي-اق، قاراعاندىلىق كاسىپكەر، پارتيا مۇشەسى عابدوللا دۇيسەنباەۆ جەدەل تەستتەر ساتىپ الۋ ءۇشىن 5 ميلليون تەڭگە اۋدارعان.

Abai.kz