بيىل ۇلى ويشىل، حالقىمىزدىڭ باس اقىنى اباي قۇنانبايۇلىنىڭ دۇنيەگە كەلگەنىنە 175 جىل تولدى. ۇلتتىڭ ۇلى تۇلعاسىن ۇلىقتاۋ ۇرپاق الدىنداعى ۇلاعاتتى بورىشتارىمىزدىڭ ءبىرى. سونى جاقسى بىلەتىن مەملەكەت باسشىسى قاسىم-جومارت توقاەۆ ءوزى باستاماشى بولىپ، ۇلى ابايدىڭ مەرەيتويىن مەملەكەتتىك دەڭگەيدە اتاپ وتۋگە مۇرىندىق بولىپ وتىر.

ۇلى ابايدىڭ 175 جىلدىق مەرەيتويىنىڭ رەسمي اشىلۋ سالتاناتى 21 قاڭتار كۇنى نۇر-سۇلتان قالاسىنداعى «استانا وپەرا» تەاترىندا ءوتتى. «قازاق حالقى – ابايدىڭ حالقى» اتتى مەرەكەلىك كونتسەرتكە قاتىسقان پرەزيدەنتى قاسىم-جومارت توقاەۆ پەن تۇڭعىش پرەزيدەنت نۇرسۇلتان نازارباەۆ ەلىمىزدە جانە شەتەلدەردە وتەتىن مىڭ ءتۇرلى مەرەكەلىك شارالاردىڭ شىمىلدىعىن اشىپ بەرگەن بولاتى.

ءاۋ باستاعى جوسپار بويىنشا، اباي تويى اياسىندا ەلىمىزدە 500-گە جۋىق ءىس-شارا وتەدى دەپ جوسپارلانعان. مادەنيەت جانە سپورت مينيسترلىگىنىڭ ۆيتسە-ءمينيسترى نۇرعيسا داۋەشوۆ مەرەيتوي باعدارلاماسىمەن تانىستىرعان بولاتىن.

«بيىل وسى مەرەيتوي اياسىندا 500 گە جۋىق ءىس-شارا وتكىزۋ جوسپارلانىپ وتىر. ولاردىڭ ىشىندە ءىرى حالىقارالىق جانە رەسپۋبليكالىق قوعامدىق ماڭىزى بار، عىلىمي، اعارتۋشىلىق ءىس-شارالار، كونفەرەنتسيالار، سيمپوزيۋمدار، پلەنەرلەر، دوڭگەلەك ۇستەلدەر، سىنىپ ساعاتتار، پوەتيكالىق جانە ادەبي كونكۋرستار، ءباسپاسوز تۋرلارى جانە وزگە دە ءىس-شارالار بار», - دەگەن ەدى داۋەشوۆ.

ەگەر ءبارى بۇرىنعىشا بولعاندا، وسى جوسپارلار بويىنشا ۇلى ابايدىڭ ۇلىق تويى دۇركىرەپ تۇرىپ وتەر ەدى. بۇگىنگى بۋىن مەن ەرتەڭگى ۇرپاق ءۇشىن مىڭ جىلدىق ازىق بولار قۇندى ءىس شارالار جالعاسار ەدى. الايدا تۇتاس دۇنيەنى تابانىنان تىك تۇرعىزعان كوروناۆيرۋس پاندەمياسى كوپتەگەن جاقسى جوسپاردىڭ جۇزەگە اسۋىنا كەدەرگى بولدى.

تۇتاس ەلدە توتەنشە جاعداي جاريالانىپ، حالىق كارانتيندە وتىرعاندىقتان كوپتەگەن يگى شارالاردىڭ ءوتۋى مۇمكىن بولماي وتىر. سول ءۇشىن ۇيىمداستىرۋشىلار مەرەيتويدى وتكىزۋدىڭ وزگەشە جولدارىن قاراستىرۋدا.

جولىن تاپقان ادامعا ۇلىلاردى ۇلىقتاۋدىڭ جولى از ەمەس. ءتىپتى توتەنشە جاعداي كەزىندە دە تىعىرىقتان شىعار جول تابىلادى. ۇلى تۇلعاسىن ۇلىقتاۋدى ءوزىنىڭ قاسيەتتى بورىشى دەپ بىلگەن قازاق ەلى ابايدىڭ مەرەيتويىن جاڭاشا فورماتتا وتكىزۋدى جوسپارلاپ وتىر. بۇگىنگى جازبامىسىز دا مەرەيتويدىڭ جاڭاشا ءوتۋ فورماتىمەن تانىستىراتىن بولامىز.

كوروناۆيرۋس تارالۋ قاۋپى جوعارى بولعاندىقتان ەلىمىزدە كوپشىلىك ءىس-شارالاردى وتكىزۋگە تىيىم سالىنعانىن ايتىپ وتىرمىز. وسى جاعدايعا بايلانىستى ۇلى ابايدى ۇلىقتاۋ شارالارى باسقاشا فورماتتا وتكىزىلەتىن بولىپ شەشىلدى. بۇل تۋرالى كوروناۆيرۋس ينفەكتسياسى بويىنشا اعىمداعى جاعدايعا ارنالعان ءباسپاسوز كونفەرەنتسياسى كەزىندە ايتىلدى. ورتالىق كوممۋنيكاتسيالار قىزمەتى الاڭىندا ءسوز سويلەگەن قازاقستان رەسپۋبليكاسى مادەنيەت جانە سپورت ءمينيسترى اقتوتى رايىمقۇلوۆا اباي تويىنىڭ قالاي جالعاساتىنىن ءتۇسىندىردى.

-كوروناۆيرۋس قاۋپىنە بايلانىستى مادەني-بۇقارالىق ءىس-شارارالاردى شەكتەدىك. مۇنداي شارالاردى جاڭا فورماتتى وتكىزۋ جاعىن قاراستىرىپ جاتىرمىز. مىسالى، شارالاردى ۇلكەن ستاديونداردا ەمەس، تەلەديدار، الەۋمەتتىك جەلى ارقىلى وتكىزۋ جاعىن قاراستىرۋدامىز. حاكىم ابايدىڭ تۇلعاسىن ءتۇسىنىپ، ۇلىقتاۋ شارالارى دا جاڭا فورماتتا وتكىزىلەدى, - دەيدى رايىمقۇلوۆا.

سودان بەرى مينيستر ايتقان جاڭا فورمات اياسىندا ءبىر قاتار ءىس شارالار ءوتىپ ۇلگەردى. اتاپ ايتقاندا ابايدىڭ اتا قونىسى سەمەي قالاسىندا ورنالاسقان «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعى جاڭا تالاپقا ساي جاڭا جول تاپتى. مۋزەي قازىرگى تاڭدا حالىققا ونلاين-لەكتسيالار مەن 3D ساياحاتتار ۇيىمداستىرىپ جاتىر.

ماسەلەنىڭ ءمانىن تارقاتىپ ايتار بولساق، جاڭا تەحنولوگيالاردىڭ كومەگىمەن ۇلى اقىندى ۇلىقتاۋدىڭ ۇزدىك ادىستەرى قولعا الىنۋدا. بۇل تۋرالى سەمەي قالالىق اقپارات ورتالىعى مالىمدەگەن بولاتىن. اتاپ ايتقاندا، ابايتانۋ كابينەتى مەن ۇلى اقىننىڭ مۋزەيى اراسىنداعى شىعارماشىلىق قاتىناستى جوعارىلاتۋ باعىتىندا جۇمىستار اتقارىلۋدا. ەڭ الدىمەن وسى ماقساتتا اباي اۋدانىنىڭ مەكتەپ-ليتسەيىندە ۆيدەوساباق ۇيىمداستىرىلعان ەكەن.

اتالعان ۆيدەوساباق بارىسىندا مۋزەي باسشىسى جاندوس اۋباكىر وقۋشى شاكىرتتەرگە حاكىم ابايدىڭ ءومىرى جايلى، ادەبي شىعارمالارى تۋرالى بايانداما جاسادى. وقۋشىلار اباي مۋزەيىنىڭ اسا قۇندى جادىگەرلەرىمەن تانىستى. مۇنداي ونلاين ساباقتار جالعاسىن تابادى دەپ وتىر ۇيىمداستىرۋشىلار. ءتىپتى مۇنداي ونلاين-ەكسكۋرسيالار سوناۋ ەۋروپا ەلدەرى مەن اقش تورىندەگى اتاقتى مۋزەيلەردە دە وتەتىن بولادى. ونلاين ساباق اياسىندا 3D ساياحاتتار، ويىندار، لەكتسيالار ينتەرنەتتىڭ كومەگىمەن جۇزەگە اساتىن بولادى.

بۇگىندە ۇلى ابايدىڭ باعا جەتپەس قۇندى مۇرالارى تۋعان حالقىنىڭ رۋحاني ازىعىنا اينالىپ وتىر. اباي قۇنانبايۇلىنىڭ قۇندى شىعارمالارى بۇگىنگى بۋىننىڭ عانا ەمەس، كەلەشەك ۇرپاق ءۇشىن دە باعا جەتپەس بايلىق ەكەنى ءسوزسىز. سول ءۇشىن دە مەملەكەت باسشىسىنىڭ ءوزى ۇيىتقى بولىپ، ۇلى اقىننىڭ مەرەيتويىن مەملەكەتتىك دەڭگەيدە تويلاپ جاتىرمىز. ءمانى مەن ماعىناسى مول مەرەكەلىك شارالار الەمدى جايلاعان ىندەتكە بايلانىستى جوسپار بويىنشا وتپەسە دە، ۇيىمداستىرۋشىلاردىڭ شەشىمىمەن جاڭا فورماتتا جالعاسىن تاۋىپ جاتىر. ابايدى ۇلىقتتاۋ حالقىمىز ءۇشىن قاشاندا قاسيەتتى پارىز سانالادى.

Abai.kz