ەكى ادامعا ينە سالدى. بىرەۋىنە ۆيرۋسقا قارسى ۆاكتسينا، ەكىنشىسىنە مەنينگيتكە قارسى ەكپە سالدى. عالىمداردىڭ باستى ماقساتى - پرەپاراتتىڭ قاۋىپسىزدىگى جونىندە اقپارات جيناۋ جانە COVID-19 ۆيرۋسىنا قارسى يممۋنيتەت قالىپتاستىرۋ.
ۆاكتسينا شيمپانزە ۆيرۋسىنىڭ نەگىزىندە دايىندالىپ، وعان جاڭا تيپتەگى كوروناۆيرۋستىڭ گەنەتيكالىق كودىن قوسقان. عالىمدار زەرتتەۋدىڭ قورىتىندىسى جارتى جىلدىڭ ىشىندە بەلگىلى بولادى دەپ مالىمدەدى.
قازىر ادەمنىڭ وناعان زەرتحاناسى COVID-19 ۆيرۋسىنا قارسى ۆاكتسينا جاساۋمەن اينالىسىپ جاتىر. بىرەر كۇن بۇرىن گەرمانيا دا ەرىكتىلەرگە جاساپ شىعارعان ەكپەلەرىن سىناۋدى باستاعانىن حابارلاعان.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، الەمدە قازىر 70 ۆاكتسينا ازىرلەنىپ جاتىر. ءبىرىنشى بولىپ ۆاكتسيناسىن سىناۋدى باستاعانىن اقش پەن قىتاي مالىمدەدى. رەسەي بولسا، كلينيكالىق سىناقتى 1 ماۋسىمنان باستاۋدى جوسپارلاپ وتىر.
مامانداردىڭ پىكىرىنشە، كوروناۆيرۋسقا قارسى جاپپاي ۆاكتسينا ەگۋ كەمىندە 2021 جىلدىڭ باسىندا باستالادى.
الەمدە Covid-19 كوروناۆيرۋسى 2,6 ميلليوننان استام ادامعا جۇقتى. قازا بولعاندار 184 مىڭنان استى. 721 مىڭنان استام ادام جازىلدى.
دۇنيەجۇزىلىك دەنساۋلىق ساقتاۋ ۇيىمى قىتايدان تاراعان بۇل ۆيرۋستى "پاندەميا" دەپ جاريالاعان. كوروناۆيرۋس جايلى جەلتوقسان ايىنىڭ سوڭىندا بەلگىلى بولدى. ونى العاش جۇقتىرعاندار قىتايدىڭ حۋبەي پروۆينتسياسىنىڭ ۋحان قالاسىندا تىركەلدى. ۆيرۋس تىنىس الۋ جولىن زاقىمداپ، پنەۆمونيانى ورشىتەدى. بۇل دەرتتىڭ كوبىنە ەگدە ادامدار مەن سوزىلمالى اۋرۋى بار ادامدارعا سالدارى اۋىر بولۋى مۇمكىن.
Abai.kz
