اۋىسپالى كەزەڭدە بولماي قويمايتىن الەۋمەتتىك جىكتەلىستەر مەن مۇددە الۋاندىعى قوعامدى جىك-جىككە بولگەندىكتەن قوعامىمىزدا كەم-كەتىكتەر شاش ەتەكتەن. ۇكىمەت تاراپىنان جۇرگىزىلىپ جاتقان ەكونوميكالىق-الەۋمەتتىك ءىس-شارالار بۇقارا حالىقتىڭ ءال-اۋقاتىن كوتەرۋگە ءالى دە بولسا جەتپەي جاتىر.

وسى كەزگە دەيىن جەمقورلىق دەگەن جالماۋىزدى اۋىزدىقتاۋ مۇمكىن بولماي تۇر. جەمقورلىق ىندەتى قوعامنىڭ بارلىق سالاسىن جايلاپ الدى. قاراپايىم حالىقتىڭ دا اشۋ ىزاسىن تۋدىراتىن وسى ادىلەتسىزدىك. سوندىقتان دا ۇكىمەتتى، پارلامەنتتى جالپى بيلىك اتاۋلىنى قاتتى سىنعا الۋ بەلەڭ الۋدا. بۇل زاڭدى دا.

ءبىر جاعىنان ۇزاق جىلدار توتاليتاريزم تابانىندا جانشىلعان قوعامدىق سانا ارعى- بەرگىدەگى بار جوعالتقانىنا بىردەن جەتكىسى كەلىپ كوپتەگەن تالاپتار قويۋدا. تولاسسىز اعىلىپ جاتقان داقپىرتقا سەنگەن، داڭعازالىققا جەلپىنگەن توپتار كوبەيۋدە. ءبىر انىعى سوڭعى ۋاقىتتا قوعام مۇلدەم وزگەردى. كەڭەستىك يدەلوگيادان ادا، ساۋاتتى، ۇلتتىق قۇندىلىقتاردى بويىنا سىڭىرگەن جاڭا ۇرپاق بيلىككە كوپتەپ كەلۋى كەرەك. اعا ۇرپاقتىڭ بيلىك ساباقتاستىعىن جاڭا بۋىنعا بەرەتىن دە ۋاقىتى جەتتى دەپ ويلايمىن.

ەڭ باستىسى مەملەكەتتىگىمىزدى، تاۋەلسىزدىگىمىزدى شايىپ جىبەرەتىن كۇشتەرگە جول بەرمەۋ قازاق ۇلتىنىڭ باستى مىندەتى ەكەنىن ۇنەمى ەستە ۇستاۋىمىز كەرەك.

مۇرات باقتيارۇلىنىڭ الەۋمەتتىك جەلىدەگى جازباسى

Abai.kz