جىل ون ەكى اي بويى تىنىمسىز تىرلىكتى قاجەت ەتەتىن مال شارۋاشىلىعى مول ەڭبەك پەن جاۋاپكەرشىلىكتى ۇناتادى. ال قارا جەردىڭ ارقاسى سوگىلىپ، كوك شىعا باستاعاندا مالشىلار قاۋىمىنىڭ يىعىنا تۇسەر سالماق تا ەسەلەنە ءتۇستى. اتا كاسىپتى ءناسىپ ەتكەن اعايىن شىعىنسىز ءتول الۋ ءۇشىن ۋاقىتىن دا، كۇش-قايراتتارىن دا اياپ جاتقان جوق.

الاكول اۋدانىندا دا مال تولدەتۋ ناۋقانى باستالىپ كەتتى. «مال وسىرسەڭ قوي ءوسىر، ونىڭ ءونىمى كول-كوسىر»،- دەمەكشى بيىل وڭىردە بۇل باعىتتا ءوسىم بايقالادى. ايماقتاعى ساۋلىق سانى 110 مىڭدى قۇراپ وتىر. اۋىلداعى اعايىن قوراسىنداعى قوي-ەشكىسىن قوزداتىپ ۇلگەرگەن. شارۋاشىلىقتارداعى شارۋا دا اياقتالۋعا جاقىن. قازىرگى تاڭدا ءۇي-جايداعى شوپان اتا تۇلىگىنەن 70 مىڭعا جۋىق ءتول الىنسا، شارۋا قوجالىقتارىندا ازىرگە 20 مىڭداي قوزى جۇگىرىپ ءجۇر. جۋىق ارادا جۇمىس تولىقتاي اياقتالسا، تاعى دا 4-5 مىڭداي ءتول الىنادى دەپ جوسپارلانۋدا. ال كاسىپ ورىندارعا كەلەر بولساق، 23 مىڭنىڭ شاماسىندا قوشاقان ءوربىتۋدى باعىت ەتىپ وتىر.

اتالعان ناۋقانعا ءار شارۋاشىلىقتا جان-جاقتى دايىندىق جۇرگىزىلىپ، قىزۋ جۇمىسقا ساقاداي ساي وتىردى. سونىڭ ارقاسىندا ءتول شىعىنى بولمادى. مال تولدەيتىن ورىندارعا جەتكىلىكتى كولەمدە جەم-ءشوپ جەتكىزىلىپ، قاجەتتى ءدارى-دارمەك تە دايىندالدى. اۋدان بويىنشا وسى ماشاقاتتى ەڭبەكتى ويداعىداي وتكىزۋگە 163 ساقمانشى اتسالىستى. سونىمەن قاتار 45 جىلى قورا، 43 قاشار، 45 ۆەتەرينارلىق ءدارى-دارمەك قوبديشاسى دا ازىرلەنگەن.

قىزمەتكەرلەرگە كەرەكتى ازىق-تۇلىك، قۇرال-جابدىقتار، ارنايى كيىمدەر دە دايىن. مالدىڭ دا كۇيى وڭدى. ۆەتەرينارلىق ءدارى-دارمەك پەن جەم-شوپتەن قىسىلىس جوق. ەندىگى مىندەت قورادان ەرەتىن قوڭىردىڭ باسىن كوككە امان جەتكىزۋ. ول ءۇشىن وسىنداعى جۇمىسشىلار ءبىر ساتتە تىنىم كورمەي، ەڭبەكتەنىپ جاتىر.

ايمان اسىل

Abai.kz