وزبەكستانداعى بوگەتتىڭ بۇزىلۋىنان كەيىن، تۇركىستان وبلىسىندا بىرنەشە ەلدىمەكەن قىزىلسۋدىڭ قۇرساۋىندا قالعان ەدى. بۇگىن ەل ۇكىمەتى ارنايى كوميسسيا قۇرىپتى. اپاتتىڭ سالدارىن جويىپ، زارداپ شەككەن تۇرعىندارعا كومەك ۇيىمداستىرماق كورىنەدى.

«قر پرەمەر-ءمينيسترى اسقار ءماميننىڭ وكىمىمەن تۇركىستان وبلىسى ماقتاارال اۋدانىنداعى ەلدىمەكەندەردى سۋ باسۋ سالدارىن جويۋ جونىندەگى ۇكىمەتتىك كوميسسيا قۇرىلدى»,- دەلىنگەن ۇكىمەت سايتىندا.

كوميسسيا قۇرامىنا ورتالىق جانە جەرگىلىكتى اتقارۋشى بيلىك ورگاندارىنىڭ باسشىلارى كىرگەن. وعان پرەمەر-ءمينيستردىڭ ورىنباسارى رومان سكليار توراعالىق ەتەدى.

ارنايى قۇرىلعان كوميسسيا اپاتتان كەلگەن شىعىندى ەسەپتەپ باعالاۋمەن، سۋ باسۋ سالدارىن جويۋمەن، ينجەنەرلىك، كولىكتىك، الەۋمەتتىك ينفراقۇرىلىمدى، تۇرعىن ۇيلەردى قالپىنا كەلتىرۋمەن، سونداي-اق، زارداپ شەككەن تۇرعىندارعا الەۋمەتتىك قولداۋ كورسەتۋمەن اينالىسادى.

ايتا كەتەيىك، 1 مامىر كۇنى وزبەكستاندا جاڭبىر مەن داۋىلدان كەيىن سىرداريا وبلىسىنداعى ساردوبا سۋ قويماسى بوگەتتەرىنىڭ ءبىرى جارىلعان ەدى.

2 مامىر كۇنى ساعات 04.30-دا ماقتارال اۋدانىنىڭ شەكاراسىندا كوللەكتوردان سۋ ءوتىپ، جەڭىس جانە جاڭا تۇرمىس ەلدىمەكەندەرى سۋ استىندا قالعان. سونداي-اق، مىرزاكەنت - جەڭىس - جاڭا تۇرمىس اۆتوموبيل جولدارىن سۋ باستى. بۇدان سوڭ، تۇركىستان وبلىسى ماقتاارال اۋدانىندا توتەنشە جاعداي جاريالاندى.

ال، 3-ءساۋىر كۇنى مەملەكەت باسشىسى قاسىم-جومارت توقاەۆ ساردوبا سۋ قويماسى بوگەتىنىڭ بۇزىلۋى سالدارىنان تۇركىستان وبلىسىنداعى 10 اۋىلدى سۋ باسقانىن مالىمدەدى.

تۇركىستان وبلىسى اكىمدىگىنىڭ حابارلاۋىنشا, بۇگىندە ماقتاارال اۋدانىنىڭ سۋ باسقان ەلدىمەكەندەرىنەن 2 مامىردان باستاپ 31 606 ادام ەۆاكۋاتسيالانعان.

4 مامىر كۇنگى اقپارات بويىنشا، جاڭا-تۇرمىس (46 ءۇي), جەڭىس (130 ءۇي), فيردوۋسي (250 ءۇي), ورگەباس (194 ءۇي), دوستىق (11 ءۇي) ەلدىمەكەندەرىنەن جالپى سانى 631 ءۇي سۋ استىندا قالدى.

پوليتسيا تاراپىنان جاڭا-تۇرمىس، فيردوۋسي، ورگەباس، نۇرلىجول، ءيىرجار ەلدىمەكەندەرىندە ءبىر، ت. جايلىباەۆ اۋىلىندا ەكى بلوك-بەكەت قۇرىلعان. قازىر ونىڭ جالپى سانى 7-گە جەتتى.

3115 ءىرى قارا مال، 1101 ۇساق مال، 585 جىلقى، 34 تۇيە كەلەس اۋدانى، قىزىلاسكەر اۋىلىنا جەتكىزىلدى. بۇدان بولەك، 1797 ءىرى قارا مال، 6029 ۇساق مال، 689 جىلقى، 381 تۇيە، 165 شوشقا ماقتارال اۋدانىنداعى سۋ باسۋ قاۋپى جوق جەرگە جەتكىزىلدى.

تۇركىستان وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆتىڭ ايتۋىنشا، قازىردىڭ وزىندە 3601 گەكتارعا جۋىق اۋىل شارۋاشىلىعى داقىلدارىنىڭ سۋ استىندا قالىپ، زارداپ شەككەنى انىقتالعان. الدىن الا بولجام بويىنشا شىعىن كولەمى 404 ملن. تەڭگەنى قۇراپ وتىر.

Abai.kz