قازاقستان  رەسپۋبليكاسىنىڭ

پرەزيدەنتى ق.ك.توقاەۆقا

اسا قۇرمەتتى قاسىم-جومارت كەمەلۇلى!

ءسىز جاقىندا قر پارلامەنت سەناتىندا سويلەگەن سوزىڭىزدە «سەناتتىڭ ەڭ باستى مىندەتى – ساپالى زاڭداردى قابىلداۋ»، - دەپ اشىق ايتتىڭىز.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى جارتى جىلدان ارتىق تالقىلانىپ، پارلامەنتتىڭ قوس پالاتاسىنىڭ ماقۇلداۋىنان ءوتىپ، ءسىزدىڭ قول قويۋىڭىزعا جىبەرىلدى.

اتالعان زاڭ جوباسىندا «ورالمان» اتاۋىن «قانداس» دەپ اتاۋدان باستاپ، ءبىرشاما وڭ وزگەرىستەردىڭ بار ەكەنىن جوققا شىعارمايمىن.

بىراق، زاڭ جوباسىنداعى ەكى ورەسكەل قاتەلىكتى سىزگە جەتكىزگىم كەلەدى.

ءبىرىنشى، «قازاقستان رەسپۋبليكاسىنىڭ تۇرعىن ءۇي قاتىناستارى تۋرالى» زاڭىنىڭ 68-بابىنىڭ 7) تارماقشاسى بويىنشا «ورالمان» مارتەبەسىن العان اعايىندار ءۇشىن باسپانا كەزەگىنە تۇرۋعا  قاتىستى جەڭىلدىكتەر قاراستىرىلعان. بىراق، «ورالمان» مارتەبەسىنىڭ مەرزىمى ءبىر جىل بولعاندىقتان، ول ازامات ازامات قازاقستان رەسپۋبليكاسىنىڭ ازاماتتىعىن العان كۇنى «ورالمان» مارتەبەسىنەن اجىراتىلىپ، تۇرعىن ۇيگە قاتىستى جەڭىلدىكتەن ايىرىلادى. سونىڭ كەسىرىنەن، قانداستارىمىز پاتەر كەزەگىنە تۇرا المايدى، ال كەزەككە تۇرعان اعايىنداردىڭ كەزەگى ارتقا شەگەرىلىپ، قايتادان ءۇي كەزەگىنە تۇرۋعا ءماجبۇر بولادى.

ءبىر سوزبەن ايتقاندا، «قازاقستان رەسپۋبليكاسىنىڭ تۇرعىن ءۇي قاتىناستارى تۋرالى» زاڭىنىڭ 68-بابىنىڭ 7) تارماقشاسى مەن «حالىقتىڭ كوشى-قونى تۋرالى» زاڭىنىڭ 25-بابىنىڭ  3) تارماعى سايكەس كەلمەيدى.

ەكىنشى، «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ 13-باپتىڭ 18) تارماقشاسىندا شەتتەن كوشىپ كەلگەن قانداستارعا «ەڭبەك قىزمەتى» بويىنشا زەينەتاقى تاعايىندالسىن دەپ بەلگىلەنگەن. بىراق، اتالعان زاڭدا دا، «ەڭبەك كودەكسىندە» دە «ەڭبەك قىزمەتى» دەگەن ۇعىم جوق. «ەڭبەك ءوتىلى» دەگەن ۇعىم بار. ەندى وسى زاڭ بويىنشا جەرگىلىكتى ازاماتتارعا «ەڭبەك ءوتىلى», ال شەتتەن كوشىپ كەلىپ ازاماتتىق العان اعايىندارعا «ەڭبەك قىزمەتى» بويىنشا زەينەتاقى تاعايىندالىپ كەلەدى. قولدانىستاعى زاڭ بويىنشا، كەۋى دە قازاقستان رەسپۋبليكاسىنىڭ ازاماتتارى بولا تۇرا، جەرگىلىكتى زەينەتكەرلەر مەن شەتتەن ورالعان زەينەتكەرلەردىڭ ەڭبەك ەتكەن جىلدارىن ەسەپتەۋدە ەكى ءتۇرلى ۇعىم پايدالانۋدا، ەكەۋى ەكىگە ءبولىپىپ قارالۋدا. وسىنىڭ كەسىرىنەن  شەتتەن ورالعان زەينەتكەرلەردىڭ قۇقىعى تاپتالۋدا.

بۇل نورما – قازاقستان رەسپۋبليكاسىنىڭ كونستيتۋتسياسىنىڭ 14-بابىنىڭ 2-بولىگىنە قايشى.

زاڭ جوباسى پارلامەنتتە تالقىلانىپ جاتقان تۇستا، وسى كەمشىلىكتەردى تۇزەتۋ ماقساتىندا ۇسىنىستار بەردىم جانە بۇل ماسەلەنى باق ارقىلى الدەنەشە مارتە كوتەردىم.

نەگە ەكەنىن بىلمەيمىن، دەپۋتاتتار دا، مينيسترلەر دە بۇل سايكەسسىزدىكتى بىلە تۇرىپ، تۇزەتۋگە قۇلىقسىز بولدى.

وسىعان بايلانىستى، مەن قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى رەتىندە سىزدەن قازاقستان رەسپۋبليكاسى  كونستيتۋتسياسىنىڭ 72-بابىنا ساي، «قازاقستان رەسپۋبليكاسىنىڭ تۇرعىن ءۇي قاتىناستارى تۋرالى» زاڭى مەن «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنداعى وسى ەكى نورمانىڭ   رەسپۋبليكا كونستيتۋتسياسىنا سايكەستىگىن كونستيتۋتسيالىق كەڭەسكە  تەكسەرۋىڭىزدى سۇرايمىن.

اۋىت مۇقيبەك،

قر پرەزيدەنتى جانىنداعى

ۇلتتىق قوعامدىق سەنىم كەڭەسىنىڭ مۇشەسى.

Abai.kz