11 مامىردا اقمولا وبلىسى تسەلينوگراد اۋدانى قاراجار اۋىلى تۇرعىندارى بلوكپوستى اشۋدى نە وزدەرىن نۇر-سۇلتانعا كىرگىزۋدى تالاپ ەتىپ، استاناعا كىرەبەرىس جولدى جاپتى.

جەتى بالانىڭ اناسىمىن دەگەن قاراجار تۇرعىنى الما بوقاشەۆانىڭ ايتۋىنشا، نۇر-سۇلتاننان بار بولعانى ەكى شاقىرىم جەردەگى اۋىلدا جارىق، سۋ، ينتەرنەت مۇلدەم جوق. اۋىل ادامدارى قالاعا قاتىناپ جۇمىس ىستەپ كۇن كورەدى.

- بالالارىمىز وسى كارانتين كەسىرىنەن قاڭعىپ كەتتى. تاباتىنى 65 مىڭ تەڭگە، پاتەرگە 65 مىڭ تەڭگە تولەيدى. ال ەندى اشتان قىرىلماعاندا حالىقتىڭ نە جاعدايى قالدى؟ نۇر-سۇلتاندا جوعارى بيلىكتە وتىرعاندارى وسىنى ويلاي ما؟ - دەدى ول.

ونىڭ ءسوزىن قوشتاعان گۇلميرا نۇرپەيىسوۆا قالاعا كىرىپ شىعۋ ماسەلەسىن شەشپەسە، ەشقايدا كەتپەيتىنىن، سەبەبى ءوزىنىڭ جۇمىسسىز قالۋ قاۋپى بارىن ايتتى.

قالاعا كىرگىزۋدى تالاپ ەتكەن جۇرتقا تسەلينوگراد اۋدانى اكىمى باحيدبەك وسپانبەكوۆ كەلىپ، نۇر-سۇلتان قالاسى اكىمدىگىمەن سويلەسكەنىن، ءتىزىم جاسالسا، رۇقسات بەرىلەتىنىن ايتتى. بىراق وعان سەنبەيتىنىن ايتقان اۋىل ادامدارى تاراۋدان باس تارتىپ ەكى ساعاتتاي كەتپەدى.

نارازى جۇرتتى پوليتسەيلەر مەن ارنايى جاساق باقىلاپ تۇردى. قاراجار اۋىلى اكىمى كەلىپ جۇرتتى تىنىشتاندىرۋعا تىرىسىپ، تۇرعىنداردى اۋىل پۋنكتىنە جينالىپ تىزىمگە تىركەلۋگە شاقىردى. كۇن استىندا تۇرىپ شارشاعان جۇرت اقىرى كونىپ، اۋىلدارىنا قاراي كەتتى.

قازاقستاندا 16 ناۋرىزدا كوروناۆيرۋسقا بايلانىستى توتەنشە جاعداي جاريالانىپ، 19 ناۋرىزدان نۇر-سۇلتان مەن الماتى كارانتينگە جابىلعان ەدى. 11 مامىردا قازاقستان بيلىگى ەلدە توتەنشە جاعداي رەجيمىن اياقتادى. بىراق ەلدە كارانتين سول كۇيى قالدى. قالالاردىڭ شەتىندەگى بلوكپوستار دا اشىلعان جوق. وبلىستا تۇرىپ، قالادا جۇمىس ىستەيتىندەر ايماق اكىمدىكتەرىنىڭ ماقۇلداعان تىزىمىمەن قالاعا كىرە الادى. توتەنشە جاعداي اياقتالعان سوڭ بيلىك تابىسسىز قالعان جۇرتقا بەرىلۋى ءتيىس 42500 تەڭگە (95$) كومەكتى دە توقتاتتى.

قازاقستان دەنساۋلىق ساقتاۋ مينيسترلىگىنىڭ مالىمەتىنشە، ەلدە ۆيرۋس جۇقتىرعاندار 5207 ادام بولدى. 2074 ادام دەرتتەن ايىقتى. 32 ادام قايتىس بولدى. ەلدە ۆيرۋس تاراۋىنا بايلانىستى 16 ناۋرىزدان – 11 مامىرعا دەيىن توتەنشە جاعداي بولدى. بۇل – قازاقستان تاريحىنداعى ۇزاققا سوزىلعان العاشقى تج رەجيمى.

Abai.kz