قازاقستاندا 18 مامىردان باستاپ كافەلەر، اسحانالار مەن قوناق ۇيلەر جۇمىس ىستەيدى.

13 مامىردا پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن كوروناۆيرۋستىڭ تارالۋىن بولدىرماۋ جونىندەگى ۆەدومستۆوارالىق كوميسسيانىڭ وتىرىسىندا ەكونوميكانى قالپىنا كەلتىرۋگە جانە جۇمىسپەن قامتۋعا باعىتتالعان بىرقاتار ناقتى شەشىمدەر قابىلداندى.

2020 جىلدىڭ 18 مامىرىنان باستاپ كەلەسى ءىس-شارالارعا رۇقسات ەتىلەدى:

- قوناقۇي كەشەندەرى;

- 30 ورىنعا دەيىن تاماقتانۋ ورىندارى;

- سانيتارلىق تالاپتارعا سايكەس جازعى الاڭدارى بار اشىق اۋادا جۇمىس جاسايتىن قوعامدىق تاماقتاندىرۋ ورىندارى.

سونىمەن قاتار، اعىمداعى جىلعى 18 مامىردان باستاپ جالپى عيمارات كولەمىنىڭ 30 پايىزىن عانا تولتىرا وتىرىپ سانيتارلىق نورمالاردى ساقتاۋمەن ءدىني قۇلشىلىق جاساۋ نىساندارى جۇمىسقا كىرىسەدى.

2020 جىلعى 1 ماۋسىمنان باستاپ مەملەكەتتىك باس سانيتارلىق دارىگەردىڭ تالاپتارىن ساقتاۋدى ەسكەرە وتىرىپ، كەزەڭ-كەزەڭمەن ىشكى تەمىرجول قاتىناسىن جانداندىرۋ جوسپارلانىپ وتىر. بيلەتتەر 2020 جىلعى 15 مامىردان ساتىلا باستايدى.

سونىمەن قاتار، شەتەلدەگى قازاقستان ازاماتتارىن ەلگە قايتارۋ ماسەلەلەرى قارالدى.

وتىرىس قورىتىندىسى بويىنشا پرەمەر-ءمينيستردىڭ ورىنباسارى ە. توعجانوۆ بىرنەشە ناقتى تاپسىرمالار بەردى.

Abai.kz