"717 تۇزەتۋ قابىلداندى، ەكى تۇزەتۋ قابىلدانعان جوق. ونىڭ ءبىرى - دەپۋتات بەكبولات تىلەۋحان ۇسىنعان "پروفيلاكتيكالىق ەكپە سالدىرۋ" تۋرالى باپتاعى "مىندەتتى" دەگەن ءسوزدى "قۇقىلى" دەگەن سوزبەن اۋىستىرۋ. ەكىنشىسى - ەكپە سالىنباعان بالالاردى بالاباقشاعا قابىلداماۋ تۋرالى نورمانى الىپ تاستاۋ" دەدى دەپۋتات زاۋرەش امانجولوۆا.
ول اتالعان سوڭعى باپتى جۇمىس توبى ساراپشىلارمەن، تاۋەلسىز ماماندارمەن بىرىگىپ تالقىلاعانىن دا اتاپ ءوتتى.
"اقىرى بارلىق ەكپەنى ەكى توپقا: مىندەتتى جانە ەرىكتى دەپ ءبولۋ تۋرالى شەشىم قابىلداندى، ال بالاباقشالارعا بالالاردى "ۇجىمدىق يممۋنيتەت" دەڭگەيىنە بايلانىستى كىرگىزەتىن بولادى" دەدى امانجولوۆا.
قازاقستاندا ۆيرۋستىق گەپاتيت، قىزىلشا، ديفتەريا، پوليوميەليت جانە وزگە دە اۋرۋ تۇرلەرىنەن ساقتانۋ ءۇشىن ەكپە سالدىرۋ مىندەتتەلگەن.
قازاقستان ۇكىمەتى دايىنداعان "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكس جوباسىنداعى ەكپەنى مىندەتتەۋ تۋرالى ەرەجە قوعامدا داۋ تۋعىزعان. بىلتىر جىل سوڭىندا بىرنەشە مىڭ ادام ينتەرنەتتە قول جيناپ، بالالارعا جاسالاتىن ەكپەنى مىندەتتەۋ تۋرالى ۇسىنىستى الىپ تاستاۋعا شاقىرعان.
Abai.kz
