بەكشين: «بالاباقشالاردى قازىر اشۋ ەرتە»
توتەنشە جاعداي اياقتالدى. الايدا، كارانتين كۇشىن جويعان جوق. بلوك-بەكەتتەردەن رۇقساتپەن عانا وتۋگە بولادى. جۇزدەگەن ادام جۇمىسقا شىعىپ جاتىر. بىراق بالالار قايتپەك؟ بالاباقشالار اشىلماسا، اتا-انالار نە ىستەيدى؟ ولاردى قايدا قالدىرادى؟ بۇل – كوپتىڭ كوكەيىندەگى سۇراق. الماتى قالاسىنىڭ مەملەكەتتىك باس سانيتار دارىگەرى جانداربەك بەكشين وسى ساۋالدارعا جاۋاپ بەردى، دەپ حابارلايدى Almaty.tv.
الەمدەگى احۋالعا قاراساق، شەكتەۋ شارالارىن العان مەملەكەتتەردە ەپيدەميولوگيالىق جاعداي قايتا ناشارلاپ جاتىر. ىندەت ءورشىپ كەتتى. وسى تۇستا بالالارعا جۇعۋ قاۋپى جوعارى دەيدى اق حالاتتىلار. «ارنايى سۇحبات» باعدارلاماسىندا الماتى قالاسىنىڭ مەملەكەتتىك باس سانيتار دارىگەرى جانداربەك بەكشين «بالاباقشالاردى ءدال قازىر اشۋ ەرتە» دەدى.
«بالاباقشالاردى اشۋ ماسەلەسىنە كەلسەك، قازىرگى ۋاقىتتا كەزەكشى توپتار اشۋ جاعى قاراستىرىلۋدا. سوندىقتان بۇل ماسەلە ءالى شەشىلگەن جوق. باس سانيتارلىق دارىگەردىڭ قاۋلىسىنا ەنگىزىلگەن جوق»، - دەدى الماتى قالاسىنىڭ مەملەكەتتىك باس سانيتار دارىگەرى جانداربەك بەكشين.
قاۋلىعا ەنگىزىلىمەگەنى تۇسىنىكتى. ويتكەنى، مەكتەپكە دەيىنگى مەكەمە – اۋرۋ تەز تارالاتىن جەر. وندا بالالاردىڭ بولۋى جاعدايدى تىپتەن ۋشىقتىرادى. سوندىقتان قالانىڭ باس سانيتارى شەشىم قابىلداۋعا اسىقپاعان ابزال ەكەنىن ەسكەرتتى. ءبىراز اتا-انا بۇعان تۇسىنىستىكپەن قارايتىندارىن جەتكىزدى. تاۋەكەلگە بارماي، بوبەكتەردى وزدەرى نەمەسە اتا-اجەلەرىنە اپارىپ، جۇمىسقا شىعۋىنا بولاتىنىن ايتادى.
“بالالار اۋىرسا، بىزگە اۋىر تيەدى. سوندىقتان بالالاردىڭ ۇيدە وتىرعانى دۇرىس دەپ ەسەپتەيمىن. قازىر اتا-انالاردىڭ كوبى جۇمىسسىز وتىرعاندىقتان، بالالارىن وزدەرى باعا الادى. نەمەسە اتا-اجەلەرىنىڭ قولىنا اپارىپ بەرسە بولادى. قازىر بالالاردىڭ ۇلكەندەرى دە ساباقتى مەكتەپتە وقىمايدى عوي، ۇيدە وقىپ جاتقاندىقتان ولار كىشكەنتايلارىنا قارايلايدى دەگەن ۇمىتتەمىز”، – دەدى اقمارال توقاباەۆا.
“بالا-شاعامىز ۇيدە. قازىر ۇلكەن بالام 14-تە، قالعان ۇشەۋىنە سول قاراپ وتىر. ءبىز كەلىنشەگىم ەكەۋمىز جۇمىستامىز”، – دەيدى تۇرعىن جالعاس داۋلەتباەۆ.
قالانىڭ باس سانيتار دارىگەرى قالا تۇرعىندارىنا توتەنشە جاعداي اياقتالعانىمەن، كارانتين كۇشىن جويماعانىن تاعى دا ەسكەرتتى. سوندىقتان ادام كوپ جينالاتىن جەرلەرگە بارماۋعا كەڭەس بەردى. جۇمىستارىن قايتا باستاعان كاسىپورىندار مەن ءسان سالوندارى دا سانيتارلىق تالاپتاردى قاتاڭ ساقتاۋى كەرەك. جانداربەك بەكشين بوساڭسۋعا بولمايتىنىن ايتتى. جۇدىرىقتاي جۇمىلساق قانا قاۋىپتى ىندەتتەن تەز قۇتىلاتىنىمىزدى قاپەردە ۇستايىق.
