الگىندە قر يندۋستريا جانە ينفراقۇرىلىمدىق دامۋ مينيسترلىگى «ازيا اۆتو» اق جانە «ازيا اۆتو قازاقستان» اق كاسىپورىندارىمەن ارادا جاسالعان كەلىسىمدەرگە قاتىستى اقپارات تاراعان بولاتىن. بۇگىن قۇزىرلى مينيسترلىك اتالعان اقپاراتتا شىندىققا سايكەس كەلمەيتىن دەرەكتەر ايتىلعانىن مالىمدەدى.

«قر يندۋستريا جانە ينفراقۇرىلىمدىق دامۋ مينيسترلىگى «ازيا اۆتو» اق جانە «ازيا اۆتو قازاقستان» اق كاسىپورىندارىمەن ارادا جاسالعان موتورلى كولىك قۇرالدارىن ونەركاسىپتىك قۇراستىرۋ تۋرالى كەلىسىمگە قاتىستى جالعان اقپارات تاراتۋ فاكتىلەرى تىركەلگەنىن حابارلايدى»، - دەلىنگەن رەسمي مالىمدەمەدە.

مينيسترلىكتىڭ رەسمي اقپارىنا سۇيەنسەك، قر ۆيتسە-پرەمەرى، قر يندۋستريا  جانە جاڭا تەحنولوگيالار ءمينيسترىنىڭ «قر زاڭدى تۇلعالارى رەزيدەنتتەرىمەن موتورلى كولىك قۇرالدارىن ونەركاسىپتىك قۇراستىرۋ تۋرالى كەلىسىم جاساسۋدىڭ تالاپتارى مەن ۇلگى نىسانىنىڭ كەيبىر ماسەلەلەرى تۋرالى» 2010 جىلعى 11 ماۋسىمداعى № 113 بۇيرىعى بار ەكەن. موتورلى كولىك قۇرالدارىن ونەركاسىپتىك قۇراستىرۋ تۋرالى كەلىسىم اتالعان بۇيرىقتى باسشىلىققا الا وتىرىپ تۇزىلەدى.

سونداي-اق، ەەك اياسىندا موتورلى كولىك قۇرالدارىن قۇراستىرۋ تۋرالى ارنايى شارت تا بار ەكەن (2014 جىلعى 29 مامىرداعى № 72 شەشىم). اتالعان شارتتى باسشىلىققا الا وتىرىپ، قر يندۋستريا جانە ينفراقۇرىلىمدىق دامۋ مينيسترلىگى 10 كاسىپورىنمەن ۇزىن-ىرعاسى 19 كەلىسىم جاساعان. ولاردىڭ بارلىعى دەرلىك – موتورلى كولىك قۇرالدارىن قۇراستىرۋعا قاتىستى كەلىسىمدەر بولعان.

ول بويىنشا ءاربىر كاسىپورىننىڭ مىندەتتى جۇكتەمەلەرى بولعان. مىسالى، كولىك قۇرالدارىن بالقىتىپ بىرىكتىرۋ، بوياۋ، قۇراستىرۋ بويىنشا تەحنولوگيالاردى يگەرۋ جانە وقشاۋلاندىرۋدى ۇلعايتۋ تۋرالى مىندەتتەمەلەر العان.

«ازيا اۆتو» اق جانە «ازيا اۆتو قازاقستان» اق كاسىپورىندارى كەلىسىم مىندەتتەمەلەرىن ورىندامادى. ال وزگە كاسىپورىندار شاناقتى بالقىتىپ بىرىكتىرۋ جانە بوياۋ بويىنشا تەحنولوگيالىق جابدىقتاردى ىسكە قوسۋ جونىندەگى مىندەتتەمەلەرىن كەلىسىمنىڭ جوسپار-كەستەسىنە ساي ورىندادى»، - دەلىنگەن رەسمي حابارلامادا.

ايتا كەتەيىك، «ازيا اۆتو» اق 2002 جىلى 20 جەلتوقساندا قۇرىلىپ، مەملەكەتتىك تىركەۋدەن وتكەن. زاڭ تالاپتارىنا ساي، كاسىپورىن قوسىمشا قۇن سالىعى جانە كەدەندىك تولەمدەردەن بوساتىلعان. جانە مەملەكەتتىك پرەفەرەنتسيالار الىپ كەلدى. ال «ازيا اۆتو قازاقستان» اق 2012 جىلى 19 جەلتوقساندا قۇرىلىپ (پايدالانۋعا بەرىلگەن جوق), مەملەكەتتىك تىركەۋدەن وتكەن.

اۋەلگى كەلىسىم بويىنشا، كاسىپورىندار 84 اي ىشىندە شاناقتى بالقىتىپ بىرىكتىرۋ جانە بوياۋ بويىنشا تەحنولوگيالىق جابدىقتاردى ازىرلەپ، پايدالانۋعا بەرۋى ءتيىس بولعان. ونەركاسىپتىك قۇراستىرۋعا كوشۋ مەرزىمى كوپجاقتى كەلىسىم تاراپتارىنىڭ ءبىرى قابىلداعان ەڭ جوعارعى مەرزىمنەن اسىپ كەتپەۋى ءتيىس. بۇل كەلىسىمشارتتا كورسەتىلگەن تارماقتاعى تالاپ.

كەيىن، 2017 جىلى «ازيا اۆتو» اق وزىنە جۇكتەلگەن مىندەتتەمەلەردى ورىنداۋعا دايىن بولماي شىعادى. ءسويتىپ، 2017 جىلدىڭ باسىندا «ازيا اۆتو» اق پەن «ازيا اۆتو قازاقستان» اق مينيسترلىككە موتورلى كولىك قۇرالدارىن ونەركاسىپتىك قۇراستىرۋ تۋرالى كوپجاقتى كەلىسىمگە قول قويۋ تۋرالى ءوتىنىش ءبىلدىردى.

مينيسترلىك، 2017 جىلدىڭ ساۋىرىندە مىندەتتەمەلەر مەرزىمىن 2019 جىلدىڭ 1 جەلتوقسانىنا دەيىن ۇزارتقان. كوپجاقتى كەلىسىمگە قول قويعان.

«كەلىسىمنىڭ 2.1.3 تارماقتارىنا سايكەس ەسەپتى جىلدان كەيىنگى ءار كۇنتىزبەلىك جىلدىڭ 1 ساۋىرىنە دەيىن ءوندىرۋشى تاراپ ۋاكىلەتتى ورگانعا جوسپاردىڭ ورىندالۋى تۋرالى - كەلىسىم كەزەڭدەرىن ىسكە اسىرۋ كەستەسىن ۇسىنۋعا مىندەتتى.

وسىلايشا، اعىمداعى جىلعى ساۋىردە ەسەپتى ۇسىنۋ بارىسىندا «ازيا اۆتو» اق-نىڭ قول قويىلعان كوپجاقتى كەلىسىمگە سايكەس 10 جىل بۇرىن وزىنە العان مىندەتتەمەلەرىن كەزەكتى رەت ورىنداماعانى راستالدى»، - دەيدى مينيسترلىك.

كەلىسىم بويىنشا مىندەتتەمەلەر ورىندالماعان جاعدايدا ۋاكىلەتتى ورگان انىقتالعان كەمشىلىكتەردى كورسەتە وتىرىپ، 1 اي ىشىندە كەمشىلىكتى جويۋ تۋرالى جازباشا حابارلاما جىبەرۋى ءتيىس. ال اتالعان حابارلاما اعىمداعى جىلدىڭ 11 ساۋىرىندە جىبەرىلگەن.

«1 اي ىشىندە كەمشىلىكتەر تۇزەتىلىپ نەمەسە جويىلماۋى – قر ازاماتتىق زاڭناماسىنىڭ تالاپتارىنا سايكەس، كەلىسىمدى بۇزۋعا نەمەسە توقتاتۋعا نەگىز بولادى. جاسالعان كەلىسىم ەرەجەلەرىنە بايلانىستى «ازيا اۆتو» اق جانە «ازيا اۆتو قازاقستان» اق كاسىپورىندارى بۇل جونىندە حابارلاندىرىلدى»، - دەلىنگەن مينيسترلىك حابارلاماسىندا.

ال وسىعان دەيىن الەۋمەتتىك جەلىدە «ازيا اۆتو» اق كومپانياسىنىڭ جۇمىسى توقتاتىلادى دەگەن اۋانداعى اقپارات تاراعان.

«بۇل، كەيبىر باق پەن الەۋمەتتىك جەلىدە ايتىلعانداي كاسىپورىن قىزمەتىن توقتاتۋ دەگەندى بىلدىرمەيدى. «ازيا اۆتو» اق كومپانياسى كولىك قۇرالدارى ءوندىرىسىن جالعاستىرۋعا، سونداي-اق «ازيا اۆتو قازاقستان» اق زاۋىت قۇرىلىسىن جالعاستىرۋعا تولىقتاي قۇقىلى. مينيسترلىك ءوز كەزەگىندە كورسەتىلگەن مىندەتتەمەلەر ورىندالعاننان كەيىن كەلىسىم جاساپ، جەڭىلدىكتەر ۇسىنۋ مۇمكىندىگىن قاراستىرۋعا دايىن»، - دەيدى مينيسترلىك.

قوسىمشا.

«ازيا اۆتو» اق كەلىسىمدەرى:

- 2001 جىلعى 15 تامىزدا «قر باسىم باعىتتى ەكونوميكا سەكتورلارىندا ينۆەستيتسيالىق قىزمەت اتقاراتىن ينۆەستوردى مەملەكەتتىك قولداۋ جانە ىنتالاندىرۋ شارالارى تۋرالى» العاشقى ينۆەستيتسيالىق كەلىسىمگە قول قويىلدى.

- 2010 جىلعى 24 ماۋسىمدا «ازيا اۆتو» اق-مەن 2017 جىلعى 1 ماۋسىمنان باستاپ شاناعىن بالقىتىپ بىرىكتىرۋ جانە بوياۋ بويىنشا تەحنولوگيالىق وپەراتسيالاردى ۇيىمداستىرۋ مىندەتتەمەسىمەن بىرگە 8703 تن ۆەد تس (جەڭىل اۆتوموبيلدەر) تاۋار پوزيتسياسىمەن موتورلى كولىك قۇرالدارىن ونەركاسىپتىك قۇراستىرۋ تۋرالى كەلىسىمگە قول قويىلدى.  بىراق اتالعان مىندەتتەمە ورىندالعان جوق. 

«ازيا اۆتو قازاقستان» اق كەلىسىمدەرى:

- 2012 جىلعى 28 جەلتوقساندا «ازيا اۆتو قازاقستان» اق-مەن 2019 جىلعى 1 جەلتوقساننان باستاپ شاناعىن بالقىتىپ بىرىكتىرۋ جانە بوياۋ بويىنشا تەحنولوگيالىق وپەراتسيالاردى ۇيىمداستىرۋ مىندەتتەمەسىمەن بىرگە 8703 تن ۆەد تس (جەڭىل اۆتوموبيلدەر) تاۋار پوزيتسياسىمەن موتورلى كولىك قۇرالدارىن ونەركاسىپتىك قۇراستىرۋ تۋرالى كەلىسىمگە قول قويىلدى. بىراق اتالعان مىندەتتەمە دە ورىندالمادى. 

Abai.kz