پوليتسيا قىزمەتكەرلەرى جەرگىلىكتى كاسىپورىنداردان كۇل-قوقىس قالدىعىن جينايتىن قاراۋىلدارمەن قاقتىعىس كەزىندە وق اتتى. بۇل تۋرالى Tengrinews.kz سايتى حابارلادى.
وقيعا پاۆلودار وبلىسى بەرەكە اۋىلىنىڭ ماڭىندا بولعان. پوليتسيا قىزمەتكەرلەرى، جەدەل جاساق ساربازدارى مەن ءبىر توپ ەر ادامنىڭ قاقتىعىسى بەينەلەنگەن بەينە جازبا الەۋمەتتىك جەلىگە تارادى.
پوليتسيا دەپارتامەنتىنىڭ مالىمەتىنشە، بۇل قاقتىعىسقا سەبەپ – جەرگىلىكتى كاسىپورىنداردان كۇل-قوقىس قالدىقتارى زاڭسىز الىنىپ كەلگەن. بۇل ارەكەتكە بەرەكە اۋىلىنىڭ شامامەن 30 تۇرعىنى قاتىسقان.
«قر قىلمىستىق كودەكسىنىڭ 380-بابىنىڭ 1-بولىگى بويىنشا سوتقا دەيىنگى تەرگەۋ باستالدى. تەرگەۋ شارالارى ءجۇرىپ جاتىر»، – دەدى وڭىرلىك پوليتسيا باسقارماسى.
سونداي-اق، ۆەدومستۆو وكىلدەرى اتىستى پوليتسەيلەردىڭ باستاعانىن راستادى. ولاردىڭ ايتۋىنشا، جەرگىلىكتى تۇرعىنداردى تىنىشتاندىرىپ، جاعدايدى ۋشىقتىرماۋ ءۇشىن اۋاعا وق اتىلعان.
پوليتسەي قىزمەتىنەن بوساتىلدى
كەيىن بەلگىلى بولعانداي، جەرگىلىكتى تۇرعىندارمەن سوزگە كەلىپ قالعان پوليتسەي قىزمەتىنەن بوساتىلعان. قازىرگى ۋاقىتتا قىزمەتكەردىڭ ارەكەتىنىڭ زاڭدىلىعى تەكسەرىلىپ جاتىر. ول كريمينالدىق پوليتسيا باسقارماسىندا جۇمىس ىستەگەن.
«وزىندىك قاۋىپسىزدىك باسقارماسىنىڭ پوليتسيا قىزمەتكەرىنىڭ ارەكەتىنە قۇقىقتىق باعا بەرىلەدى. تەرگەۋ كەزىندە پوليتسيا قىزمەتكەرى جۇمىستان شەتتەتىلدى»، – دەيدى وڭىرلىك پد ءباسپاسوز قىزمەتى.
بۇدان بولەك، پوليتسەيلەر جەرگىلىكتى تۇرعىندارمەن بولعان قاقتىعىستا جەدەل ارەكەت ەتۋ جاساعىنىڭ قىزمەتكەرلەرى دە بولعانىن راستادى.
«كامۋفلياج كيگەنلەر - ارنايى بولىمشەنىڭ قىزمەتكەرلەرى. ولاردىڭ ارەكەتىنە دە باعا بەرىلەدى. بۇگىندە بۇل جاعدايعا پاۆلودار وبلىسىنىڭ پروكۋراتۋراسى ارالاستى. پوليتسەيدىڭ ارەكەتىنىڭ زاڭدىلىعىنا قاتىستى تولىقتاي زەرتتەۋ جۇرگىزىلىپ، باعا بەرىلەدى», - دەدى پوليتسيا دەپارتامەنتى باسشىسىنىڭ ورىنباسارى ەلدار ابدىكەنوۆ.
Abai.kz
