ارىستاعى جارىلىسقا قاتىستى كۇدىككە ىلىنگەن 16 اسكەري ادام سوت الدىندا جاۋاپ بەرە باستادى،- دەپ حابارلايدى كتك. 

كۇدىككە ىلىنگەن اسكەريلەردىڭ بارلىعى ارىستاعى جارىلىسقا دەيىن شەندى وفيتسەرلەر بولعان. ماسەلەن، № 44859 اسكەري ءبولىمىنىڭ كومانديرى مەن ونىڭ ارتيللەريالىق وق-ءدارى ورنالاسقان قويماعا جەتەكشىلىك ەتكەن ورىنباسارى بار. ەكى وفيتسەرگە قىلمىستىق كودەكستىڭ «جارىلعىش زاتتاردى قولدانۋ ەرەجەلەرىن بۇزۋ» جانە «ابايسىزدا كىسى ولىمىنە نەمەسە وزگە دە اۋىر زارداپتارعا اكەلۋ» بابىمەن ءىس قوزعالعان. جالپى ءىستىڭ 400 تومنان اسىپ كەتكەنىنە قاراعاندا، پروتسەسس ۇزاققا سوزىلاتىن ءتۇرى بار.

بىلتىر 24- ماۋسىمدا ارىس قالاسىنداعى جارىلعىش زاتتار ساقتالعان قويمادا بىرنەشە كۇن قاتارىنان جارىلىس بولعان. اپات سالدارىنان ءبىر تۇرعىن مەن ەكى اسكەري قىزمەتكەر قازا تاپتى. 200-دەن استام ادام ءتۇرلى جاراقات الدى. اراسىندا بالالار دا بار. ول كەزدە دە ارىس قالاسىنىڭ بۇكىل تۇرعىندارى كوشىرىلگەن. كۇللى الەمگە تانىلعان توتەنشە جاعدايدان سوڭ پرەزيدەنت توقاەۆ سول كەزدەگى قورعانىس ءمينيسترى ساكەن جاسۇزاقوۆتى قىزمەتىنەن شەتتەتىپ، لاۋازىمدى تالاي شەندى قاتاڭ ەسكەرتۋ العان.

Abai.kz