كۇنى كەشە عانا قر يندۋستريا  جانە ينفراقۇرىلىمدىق دامۋ مينيسترلىگى «ازيا اۆتو» جانە «ازيا اۆتو قازاقستان» كاسىپورىندارىنا قاتىستى رەسمي مالىمدەمە جاساعان بولاتىن.

وندا اتالعان كاسىپورىندار كەلىسىمشارتتا كورسەتىلگەن ماندەتتەمەلەردى 10 جىل ىشىندە ورىنداماعانى، وسىعان بايلانىستى مينيسترلىك تاراپىنان جاسالىپ وتىرعان جەڭىلدىكتەر توقتاتىلىپ، كەلىسىمنىڭ بۇزىلعانى ايتىلعان.

مينيسترلىك مالىمەتىنە سۇيەنسەك، 2017 جىلى اتالعان كاسىپورىندارمەن ارادا كوپجاقتىكەلىسىم جاسالعان. ول بويىنشا مىندەتتەمەلەردى ورىنداۋ مەرزىمىن 2019 جىلدىڭ 1 جەلتوقسانىنا دەيىن ۇزارتقان.

«كەلىسىمنىڭ 2.1.3 تارماقتارىنا سايكەس ەسەپتى جىلدان كەيىنگى ءار كۇنتىزبەلىك جىلدىڭ 1 ساۋىرىنە دەيىن ءوندىرۋشى تاراپ ۋاكىلەتتى ورگانعا جوسپاردىڭ ورىندالۋى تۋرالى - كەلىسىم كەزەڭدەرىن ىسكە اسىرۋ كەستەسىن ۇسىنۋعا مىندەتتى.

وسىلايشا، اعىمداعى جىلعى ساۋىردە ەسەپتى ۇسىنۋ بارىسىندا «ازيا اۆتو» اق-نىڭ قول قويىلعان كوپجاقتى كەلىسىمگە سايكەس 10 جىل بۇرىن وزىنە العان مىندەتتەمەلەرىن كەزەكتى رەت ورىنداماعانى راستالدى»، - دەيدى مينيسترلىك.

ال بۇگىن «ازيا اۆتو» جانە «ازيا اۆتو قازاقستان» كومپانيالارىنىڭ وكىلى تۇسىندىرمە بەرىپ، مەملەكەت الدىنداعى مىندەتتەمەلەردى 1,5 جىلدىڭ ىشىندە ورىنداۋعا ۋادە بەرىپتى. بۇل تۋرالى «LS» سايتى جازدى.

«ازيا اۆتو قازاقستان» كومپانياسىنىڭ باس ديرەكتورى ەرجان مانديەۆتىڭ ونلاين-فونىەرەنتسيا بارىسىندا ايتقان اقپاراتىنشا، 2019 جىلدىڭ اياعىنا دەيىن كومپانيا لوكاليزاتسيا دەڭگەيىن 50 پايىزعا دەيىن جەتكىزۋى جانە قۇراستىرۋ مەن بوياۋ تسەحىن ىسكە قوسۋى ءتيىس بولعان.

«بۇل تسەحتاردىڭ اشىلۋى كوروناۆيرۋس داعدارىسىنان كەيىن نارىقتىڭ قالىپقا كەلۋىنە بايلانىستى بولىپ وتىر. ءبىزدىڭ بوجام بويىنشا، شامامەن 1,5-2 جىلدا قالىپقا تۇسەمىز. ءبىز 1,5 جىلدا جوبانى جۇزەگە اسىرىپ، مىندەتتەمەلەردى ورىندايمىز دەپ ۇمىتتەنەمىز»، - دەپتى مانديەۆ.

سونداي-اق، مانديەۆ كارانتين اياقتالعان سوڭ، مينيسترلىكپەن كەلىسسوزدەردى قايتا باستايتىنىن، الداعى ۋاقتا قانداي دا ءبىر كەلىسىمگە كەلۋگە نيەتتى ەكەنىن ءبىلدىرىپ،  2019 جىلدىڭ اياعىندا كومپانيا نەلىكتەن ءوز مىندەتىن ورىنداي الماعانىن دا ايتىپتى. ونىڭ سوزىنشە، اۋەلى 2015 جىلى تسەح جۇمىسىن باستاۋعا دەۆالۆاتسيا كەرى اسەرىن تيگىزگەن. اۆتونارىق 4 ەسەگە قۇلدىراپ، شىعان كوبەيگەن.

وسى داعدارىستان شىعۋ قيىن بولعان. ال 2018 جىلى جۇمىس قالىپا كەلىپ، كومپانيا جاڭا تسەحتى قارجىلاندىرۋعا قاۋقارلى بولعاندا ولار جۇمىس جۇرگىزىپ جاتقان بانك جابىلىپ قالعان.

دەيتۇرعانمەن، قۇرامىنا قۇراستىرۋ مەن بويۋ تسەحتارى دا كىرەتىن تولىق قۇراستىرۋ زاۋىتىن قارجىلاندىرۋ ءۇشىن 74 ميلليون دوللار جۇمسالىپتى. قۇرىلىس جۇمىستارىنىڭ 40-45 پايىزى اياقتالىپ قالعان كورىنەدى. جۇمىستى تولىق اياقتاۋ ءۇشىن تاعى 90 ميلليون دوللار ينۆەستيتسيا قۇيۋ جوسپارلانىپ وتىر ەكەن. قازىر قارجى ۇيىمدارىمەن قارجى ماسەلەسىن شەشىپ جاتىر-مىس.

مانديەۆتىڭ ايتۋىنشا، زاۋىت ىسكە قوسىلاتىن بولسا، العاشتى ەتاپتا 1 مىڭ، ەكىنشى ەتاپتا 3 مىڭ، ءۇشىنشى ەتاپتا 8 مىڭ جاڭا جۇمىس ورىندارى اشىلادى.

ايتپاقشى، «ازيا اۆتو» مەن «ازيا اۆتو قازاقستان» كومپانيالارى مەملەكەتتەن 374 ميلليون دوللار كولەمىندە جەڭىلدىك كومەك العان ەكەن. ال وسى ۋاقىتقا دەيىن 511 ميلليون دوللار سالىق تولەنگەن.

مانديەۆ كەلىسىم قايتا قالپىنا كەلمەگەن جاعدايدا بۇرىن پرەفەرەنتسيالار بولعان سالىق تولەمدەرى ەسەبىنەن ءونىمنىڭ ءوز قۇنى ۇلعايۋى مۇمكىن ەكەنىن ايتىپتى. ونىڭ سوزىنشە، بۇل وندىرىلەتىن اۆتونىڭ نارىقتاعى باعاسىن كوتەرىپ جىبەرۋى مۇمكىن ەكەن.

وتكەندە وسى «ازيا اۆتو» مەن «ازيا اۆتو قازاقستان» كومپانيالارى تۋرالى الەۋمەتتىك جەلىدە ءارتۇرلى اڭگىمەلەر ايتىلعان. سونىڭ ىشىنشە، كومپانيا ءوز كاپيتالىن رەسەيگە شىعاردى دەگەن دە سىبىستار ايتىلدى. بۇگىن سپيكەر كاپيتالدى رەسەيگە شىعارۋ تۋرالى الەۋمەتتىك جەلىدەگى اڭگىمەلەرگە قاتىستى سۇراققا جاۋاپ بەرمەدى.

ايتا كەتەيىك، «ازيا اۆتو قازاقستان» LADA, KIA, Skoda, ۋاز ماركەلى كولىكتەر قۇراستىرۋمەن اينالىسادى.

Abai.kz