قر ىشكى ىستەر مينيسترلىگىنە قاراستى «قازاقستان» شيپاجايىنىڭ بۇرىنعى باسشىسى قازبەك سۇلتاننىڭ ايەلى الميرا سۇلتان Facebook-تەگى جەكە پاراقشاسىندا مالىمدەمە جاساپ، كۇيەۋىنە قاتىستى ىستە قر ءىىم ەرلان تۇرعىمباەۆتىڭ تاراپىنان قىسىم جاسالىپ جاتقانىن ايتىپتى. بۇل تۋرالى قازتاگ اگەنتتىگى جازدى.

ناقتىراق ايتساق، ول تەرگەۋشىلەر ءوزىنىڭ كۇيەۋىنەن قر ءىىم ە.تۇرعىمباەۆتىڭ بۇيرىعى بويىنشا بۇرىنعى مينيستر قالمۇحانبەت قاسىموۆقا قارسى كۋالىك بەرۋىن تالاپ ەتكەنىن جازدى.

«كۇيەۋىمنىڭ ايتۋى بويىنشا، ءىىم تەرگەۋشىلەرى م.سارباسوۆ پەن ب.ەسماحانوۆ ىشكى ىستەر ءمينيسترى تۇرعىمباەۆتىڭ بۇيرىعى بويىنشا، ودان بۇرىنعى مينيستر ق.قاسىموۆ پەن ونىڭ ورىنباسارى ب.بيسەنقۇلوۆقا قارسى كۋالىك بەرۋىن تالاپ ەتكەنىن ءبىلدىم. جەدەل تەرگەۋ توبىنىڭ جەتەكشىسى (جتت) ب.ەسماحانوۆ تج مەن كارانتين كەزىندە قر قىلمىستىق پروتسەسسۋالدىق كودەكس تالاپتارىن بۇزا وتىرىپ، ەش ەسكەرتۋسىز، ادۆوكاتتاردىڭ قاتىسۋىنسىز لا155/18 تەرگەۋ يزولياتورىندا كۇيەۋىممەن كەزدەسكەن (بەسەدا پو دۋشام). كۇيەۋىمنىڭ ايتۋى بويىنشا، ول جەردە پسيحولوگيالىق قىسىم جاسالىپ، «كەلىسىم» (سدەلكا) ۇسىنعان. كۇيەۋىم ودان باس تارتقان. ويتكەنى، ءوز بوستاندىعىن قاتەرگە تىكسە دە، كاناسىز ادامدارعا جالا جابا الماعان. مىنە، سەگىز ايدان بەرى ەش سەبەپسىز تەرگەۋ يزولياتورىندا وتىر»، - دەپ جازىپتى الميرا سۇلتان.

ول سونداي-اق، سۇلتان اۋلەتى تۇگەل دەرلىك تەرگەۋ ورگاندارىنىڭ ءجىتى باقىلاۋىندا ەكەنىن، ال كۇيەۋىنىڭ «قىسىم جاساپ، كەرەكتى كۋالىكتە الۋ ءۇشىن» دەرەۋ تۇتقىندالعانىن ايتقان.

(الميرا سۇلتان)

«ءبىز تەرگەۋ باستالعالى بەرى بۇل تۋرالى مۇلدە ايتپادىق. سەبەبى، تەرگەۋشىلەر ۇيىمداسقان قىلمىستىق ءىس قوزعاپ، بارلىق تۋىستارىمىزدى «قامايتىنىن» ايتىپ قورقىتتى. ءبىز وزىمىزگە قاتىستى قىسىم كورسەك تە، بۇل تۋرالى ايتا المادىق. اقىرى نە بولار ەكەن دەپ ساقتاندىق. بىراق، جۋىردا ءبىزدىڭ 25 جاسار قىزىمىزدى دا ۇستاپ اكەتتى. ول وسى ۋاقىت ىشىندە كارانتيندە جاتسا دا، اكەسى سەكىلدى تەمىر تورعا قاماماق بولدى. تەرگەۋ ورگاندارى ارادا سەگىز اي وتكەندە ونىڭ (قىزىنىڭ) قىلمىستىق ءىس تەرگەۋىنە كەدەرگى كەلتىرۋى مۇمكىن دەپ ەسەپتەۋى – ابسۋرد! ءبىزدىڭ باسىمىزعا قايعى ءتۇستى. ونىڭ وسى سترەسستەر مەن قىسىمنان كەيىن بالاسى ءتۇستى. بىراق، بۇل دا ولاردى توقتاتقان جوق. سوندىقتان، ءبىز ءۇنسىز جاتپاۋدى شەشتىك. بۇل ىسكە ءىىم مۇددەلى. ولاردىڭ جۇمىس ءتاسىلى ءوزى-اق ايتىپ وتىر. مەن ەشكىمدى قورىپ وتىرعانىم جوق. وبەكتيۆتى تەرگەۋ جۇرگىزىلۋىن جانە كۇيەۋىمدى يزولياتوردان بوساتۋىن سۇرايمىن. ول اۋىرىپ جاتىر جانە كۇتەمگە مۇقتاج»، - دەپتى ءوز مالىمدەمەسىندە.

ەستەرىڭىزگە سالا كەتەيىك، وسىعان دەيىن «قازاقستان» شيپاجايىنىڭ بۇرىنعى باسشىسى قازبەك سۇلتاننىڭ كىشى قىزى ۇستالعانى تۋرالى اقپارات تاراعان. ول اكەسىنىڭ ۇستىنەن قوزعالعان قىلمىستىق ىسكە قاتىسى بولۋى مۇمكىن دەدى.  ال كەشە قازبەك سۇلتان 974 ميلليون تەڭگەنى قولدى قىلعان دەگەن اقپارات تارادى.

قوسىمشا:

«قازاقستان ءساناتوريى» اق تاريحى 1985 جىلدان باستالادى. «قازسسر ءىىم-ءنىڭ «قازاقستان» ءساناتوريى» دەگەن اتپەن تانىمال كوپ فۋنكتسيالى شيپاجاي.

1999 جىلى ساناتوري مەن ءىىم گوسپيتالى بىرىكتىرىلىپ، «قازاقستان» قر ءىىم-ءنىڭ ەمدىك كەشەنى» بولىپ وزگەردى. 2004 جىلى «قازاقستان» قر ءىىم-ءنىڭ ەمدىك كەشەنى» قايتا قۇرىلىپ، «قازاقستان» ءساناتوريى» اق بولدى. «قازاقستان» شيپاجايى الماتىدا،  ىلى الاتاۋىنىڭ ەتەگىندە ورنالاسقان. تەرريتورياسى – 6,3 گا. تۇرعىن ءۇي كەشەنىنىڭ اۋماعى 15 مىڭ كۆ.م.

قاز تاگ رەداكتسياسى اتالعان ماسەلەگە قاتىستى ءىىم ەرلان تۇرعىمباەۆتىڭ اتىنا ساۋال جولداپتى. ايتىلعان اقپاراتتىڭ اق-قاراسىن سۇراپتى. ءىىم ءباسپاسوز قىزمەتى الداعى ۋاقتا جاۋاپ بەرىتىندەرىن ايتقان. قر ءىىم تاراپىنان قاندايدا ءبىر جاۋاپ بولسا، جاريالايتىن بولامىز.

Abai.kz