الگىندە رەسپۋبليكالىق اقپارات قۇرالدارىندا، الەم جۇرتشىلىعى قارايتىن عالامتور بەتىندە ەلىمىزدىڭ پاۆلودار وبلىسىندا جەرگىلىكتى تۇرعىندار مەن پوليتسياسى بار، قارۋ-جاراق اسىنعان اسكەري كيىمدەگىلەرى بار الا-قۇلا توپتىڭ اراسىندا ورىن العان جانجال تۋرالى اقپارات پەن كورىنىس كەڭىنەن تاراتىلىپ، وعان قاتىستى ءتيىستى قۇزىرەتتى مەملەكەتتىك ورگاندار تەكسەرۋ جۇرگىزە باستاعانى بەلگىلى بولۋدا.

جالپى، سوڭعى كەزدەرى قازاقستاندىق قوعامدا مۇنداي قىزمەتىك تەكسەرۋلەردىڭ جيىلەگەنى سونشا، ءبىزدىڭ وتاندىق تەلەۆيدەنيەنى باياعىدان بەرى باسىپ العان كارىس پەن تۇرىكتىڭ، تولىپ جاتقان تاعى باسقاسىنىڭ كوپ سەريالى تەلەحيكايالارى كورەرمەنسىز ادىرەم قالۋلارى ابدەن ىقتيمال. ويتكەنى كەشەگى، قولدارىندا قارۋ تۇرماق تاياعى دا جوق ونشاقتى قاراپايىم تۇرعىندارعا قۇددى دۋبوسەكوۆا رازەزىنە شابۋىل جاساعان فاشيستىك قۇرامالارعا قارسى سوۆەت اسكەرىنە كوماندا بەرەتىن پوليترۋك كلوچكوۆ ءتارىزدى اۆتوماتتاردان وق جاۋدىرۋعا دايىندالۋعا ورىس تىلىندە «گوتوۆسيا ك بويۋ» دەپ بۇيرىق بەرىپ جۇرگەن بۇتىنداعى تريكوسىمەن كوك مايكى كيگەن «قولباسشى»، ول ازداي جاپپاي كارانتين كەزىندە مونشالاتىپ جۇرگەن جارتىلاي جالاڭاش نەمەسە ءبىرىن-ءبىرى تيىن تەبەنگە بولا تاعدىرىن قۇتقارماق ارەكەتىندەگى، ايتپەسە ءانۇران ايتىپ بارا جاتقان، بولماسا شىلىم شەگىپ، سىرا ءىشىپ ەمەس، دەنەشىنىقتىرۋ جاتتىعۋىن جاساپ جۇرگەن جاپ-جاس قىز بالالاردى سۇيرەي جونەلەتىن پوليتسيا وكىلدەرى (ايەل ادامدى اۋرەتتى جەرلەرىنەن بوتەن ەركەكتەردىڭ ۇستاۋى دا بولەك تاقىرىپ) باستى كەيىپكەرلەرىنە اينالعان جاڭا ءبىر «تەلەحيكايالاردىڭ» تانىمالدىلىعى كۇن سايىن ارتىپ بارادى.

دەسەك تە، ءدال قازىرگىدەي كۇردەلى كەزەڭدەگى اۋىر سىناقتان ونسىز دا جۇيكەسى جۇقارىپ وتىرعان قالىڭ جۇرتقا مىناداي كوڭىلسىز، دورەكى دە تۇرپايى، جابايى كورىنىستەر ەمەس، بيلىك ورىندارىنىڭ دارىگەرلەر مەن ءتارتىپ ساقشىلارىنا دەيىنگى حالىققا قىزمەت كورسەتۋشى مەكەمە وكىلدەرىنىڭ از دا بولسا جىلى ءسوزى، قولداپ قورعاۋ نىشاندارى اۋاداي قاجەت بولىپ تۇرعانى اركىمگە ايان. بۇل تۋراسىندا مەملەكەت باسشىلىعى تاراپىنان دا «پاندەميا كەزىندە بۇكىل قوعامىمىزدىڭ سىنعا ءتۇسىپ، كوپتەگەن ازاماتتار قيىن ساتتە ەلگە ەڭبەك ەتۋدىڭ وزىق ۇلگىسىن تا­نىت­قانى، پاراساتتى پاتريوتيزم ۇلگىسىن كورسەتكەنى مالىمدەلىپ، ەڭ الدىمەن، قوعامنىڭ بەرەكە-بىرلىگى بەكەم بولۋى كەرەكتىگى، سول ءۇشىن دە ۇلتتىق قوعامدىق سەنىم كەڭەسى قۇرىلعانى» جاريالانعانىن ايتار ەدىك.

وكىنىشكە وراي، كەز-كەلگەن مەملەكەتتىڭ ەڭ ماڭىزدى سالالارىنىڭ ءبىرى، تۇرعىندارمەن تىكەلەي قارىم-قاتىناس جاسايتىن قۇرىلىم رەتىندە قۇقىق قورعاۋ، پوليتسيا ورگاندارى وكىلدەرىنىڭ جوعارىداعىداي جوسىقسىز ارەكەتتەرى الەۋمەتتىڭ قۇرمەتىن ەمەس، وكپە-رەنىشىن، ال كەيبىر جاعدايلاردا پروتەستتىك كوڭىل-كۇيىن تۋعىزىپ وتىرعاندىعى اشىق ايتىلۋدا. مۇنىڭ ءوزى «حا­لىق ۇنىنە قۇلاق اساتىن مەملەكەت» تۇجى­رىمداماسىنا مۇلدە قايشى كەلەتىندىگى تۇسىنىكتى. ولاي بولسا، ەل باسشىلىعى تاراپىنان جاريالانعان  مەملەكەتتىك قىزمەت سالاسىنداعى باتىل جاڭا رەفورمالار بارىسىندا، ەڭ الدىمەن اتالعان سالاداعى اۋقىمدى قايتا قۇرۋلاردىڭ قاجەتتىلىگىن بۇگىنگى كوز اشىق، كوكىرەگى وياۋ قوعام ءومىرى قاپىسىز كورسەتۋدە.

مۇحتار كارىباي

Abai.kz