قر پرەمەر-ءمينيسترى اسقار مامين قارجى مينيسترلىگىنىڭ ۇجىمىنا جاڭا مينيستر ەرۇلان جاماۋباەۆتى تانىستىردى. 

ۇكىمەت باسشىسى قارجى مينيسترلىگىنىڭ الدىنا ەلىمىزدەگى قارجىلىق تۇراقتىلىقتى قامتاماسىز ەتۋ، بيۋدجەت شىعىندارىن وڭتايلاندىرۋ، بيۋدجەتتىڭ اتقارىلۋى، كەدەندىك جانە سالىقتىق اكىمشىلىكتىڭ تيىمدىلىگىن ارتتىرۋ بويىنشا ماڭىزى ۇلكەن مىندەتتەر قويىلىپ وتىرعانىن اتاپ ءوتتى.

ا.مامين ە.جاماۋباەۆتىڭ قارجى-بانك سالاسىنداعى زور ەڭبەك تاجىريبەسى جاڭا مينيسترگە قويىلعان مىندەتتەردى تابىستى شەشۋگە مۇمكىندىك بەرەدى دەگەن سەنىم ءبىلدىردى.

ە.جاماۋباەۆ ۇزاق جىلدار بويى ۇلتتىق بانك جۇيەسىندە ەڭبەك ەتكەن، جەتەكشى ساراپشىدان باستاپ دەپارتامەنت ديرەكتورى لاۋازىمىنا دەيىن وسكەن. «قازاقستاننىڭ تۇرعىن ءۇي قۇرىلىس جيناق بانكى» اق باسقارۋشى ديرەكتورى قىزمەتىن اتقارعان، قر پرەزيدەنتى اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمىن باسقارعان، قر پرەزيدەنتىنىڭ كومەكشىسى بولىپ جۇمىس ىستەگەن. وسى تاعايىنداۋعا دەيىن قر قارجى مينيسترلىگىندە جاۋاپتى حاتشى قىزمەتىن اتقارعان.

ايتا كەتەيىك، كەشە قر پرەزيدەنتى قاسىم-جومارت توقاەۆ ەرۇلان جاماۋباەۆتى قازاقستان رەسپۋبليكاسىنىڭ قارجى ءمينيسترى قىزمەتىنە تاعايىنداۋ تۋرالى جارلىققا قول قويدى.

Abai.kz