ۋكراينا پرەزيدەنتى ۆلاديمير زەلەنسكي مۇسىلماندار ءۇشىن قاستەرلى مەيرام بولىپ سانالاتىن قۇربان ايت پەن ورازا ايتقا مەملەكەتتىك مارتەبە بەرۋگە نيەتتى ەكەنىن ءبىلدىردى. 

كەشە، 18 مامىردا زەلەنسكي قىرىم تاتار حالقىنىڭ وكىلدەرىمەن كەزدەسىپ، گەنوتسيد قۇرباندارىن ەسكە الۋ كۇنىنە وراي كوڭىل ايتتى. سونىمەن قاتار، ول پرەزيدەنت كەڭسەسىنىڭ جانىنان قىرىم تاتارلارىنىڭ ماسەلەسىمەن شۇعىلداناتىن جۇمىس توبىن قۇرۋ تۋرالى دا باستاما كوتەردى.

- ءبىز قىرىمنىڭ ۋكرايناعا قايتىپ ورالاتىن كۇنى ءسوزسىز تۋادى دەپ سەنەمىز. قىرىم تاتارلارى مەن ۋكرايندار ءبىر ۇستەلگە جينالىپ: «ءسىز بەن ءبىزدىڭ ازاتتىعىمىز ءۇشىن!» - دەپ تىلەك ايتاتىن كۇنگە جەتەمىز,- دەدى ۋكراينا پرەزيدەنتى قىرىم-تاتار گەنوتسيدىنىڭ قۇرباندارىن ەسكە الۋ كۇنىنە وراي سويلەگەن سوزىندە.

ال، مامىردىڭ 17-18 قاراعان ءتۇنى، پرەزيدەنت اكىمشىلىگىنىڭ عيماراتىنا ۋكراين جانە قىرىم تاتار حالىقتارىنىڭ ىنتىماعىن بىلدىرەتىن جارىق پروەكتسياسى ورنالاستىرىلعان.

https://www.facebook.com/president.gov.ua/posts/2000090006802523

ايتا كەتەيىك، رەسەي 2014 جىلى ۋكراينا قۇرامىنداعى قىرىم تۇبەگىن اننەكسيالادى. سول جىلى ساۋىردە ۋكراينانىڭ دونەتسك جانە لۋگانسك وبلىستارىندا رەسەيشىل سەپاراتيستەر مەن ۋكراينا اسكەرى اراسىندا قارۋلى قاقتىعىس باستالدى. بۇگىنگە دەيىن اتالعان قاقتىعىستان 13 مىڭنان استام ادام قازا تاپقان.

ال، باتىس ەلدەرى رەسەيدىڭ ۋكرايناعا قاتىستى ارەكەتىن ايىپتاعان بولاتىن.

قازاقستان بۇل ماسەلەدە بەيتاراپ ۇستانىم بىلدىرگەن. الايدا،2019 جىلدىڭ جەلتوقسان ايىندا قازاقستان پرەزيدەنتى قاسىم-جومارت «نەمىس تولقىنىنا» بەرگەن سۇحباتىندا : «قىرىمدا بولعان جاعدايدى اننەكسيا دەپ اتامايمىز. اننەكسيا - تىم اۋىر ءسوز. ءبىز رەسەي فەدەراتسياسىمەن سەنىمدى، تاتۋ قارىم-قاتىناستامىز. مينسك كەلىسسوزدەرى نۇرسۇلتان نازارباەۆتىڭ باستاماسى بويىنشا جۇزەگە اسقانىن ەسكە سالعىم كەلەدى. بۇگىنگى تاڭدا مينسك كەلىسىمدەرى، ۋكرايناداعى قاقتىعىستىڭ رەتتەلۋىنە كومەكتەسەتىن جالعىز زاڭدى قۇجات بولىپ تابىلادى»، – دەدى.

توقاەۆتىڭ بۇل سوزىنە ۋكراينا سىرتقى ىستەر مينيسترلىگى الاڭداۋشىلىق ءبىلدىرىپ، قازاقستانعا دەمارش جولداعان.

زەلەنسكيدىڭ بۇل جولعى شەشىمىنەن كەيىن جەلىدە ساراپشىلار پىكىر جازىپتى. «ۋكراينانىڭ ورازا مەن قۇربان ايتتى مەملەكەتتىك مەرەكەلەر كۇنتىزبەسىنە قوسۋى - قىرىم تاتارلارىنا جاسالعان ءىلتيپات. قازاقستان بيلىگى دە قىرىمعا قاتىستى پوزيتسياسىن ناقتىلاۋى كەرەك»، - دەيدى ساراپشىلار.

Abai.kz