"[وق-دارىلەردەن تازارتۋ جۇمىستارى] تەز اياقتالادى دەپ ايتۋ ەرتە. بىراق ەكى-ءۇش-بەس جىل كولەمىندە ءبىتىپ قالار" دەدى شپەكباەۆ.

ول قارۋلى كۇشتەردىڭ تازارتۋ جۇمىستارىن تەز اياقتاۋعا تىرىسىپ وتىرماعانىن، ەڭ باستىسى "الداعى ۋاقىتتا ەشكىم زارداپ شەكپەيتىندەي ءاربىر اۋماقتى كەزەڭ-كەزەڭ بويىنشا مۇقيات تازالاۋ" ەكەنىن اتاپ ءوتتى.

بىلتىر ماۋسىم ايىندا ارىس قالاسىنداعى اسكەري ءبولىمنىڭ وق-ءدارى قويماسى جارىلىپ، 4 ادام قازا بولىپ، ونداعان ادام جاراقاتتانعان بولاتىن. مىڭداعان ۇيگە زاقىم كەلىپ، ارىستىڭ 40 مىڭنان استام تۇرعىنى شىمكەنت قالاسى مەن توڭىرەگىندەگى ەلدىمەكەندەرگە ەۆاكۋاتسيالانعان ەدى.

بۇگىنگە كۇنگە دەيىن جارىلىس بولعان 500 گەكتار اۋماقتىڭ 133 گەكتارى (28,5 پايىزى) تازارتىلعان. ءبىر جىل ىشىندە ارىستان شامامەن 380 مىڭ وق-ءدارى فراگمەنتى اكەتىلگەن، ولاردىڭ 300 مىڭى - جارىلۋى مۇمكىن بولشەكتەر. وق-ءدارى بولشەكتەرىن جويۋ بويىنشا نەگىزگى جۇمىس ارىس قالاسىنان 50 شاقىرىم جەردەگى "باستارما" پوليگونىندا جۇرگىزىلەدى. موبيلدىك ساپەرلەر توبىنا جەرگىلىكتى تۇرعىندار تاراپىنان 740 ءوتىنىش تۇسكەن، 4,5 مىڭ وق-ءدارى بولشەگى زالالسىزداندىرىلعان.

بۇعان قوسا، بريفينگ كەزىندە ارىس قالاسىنىڭ ينفراقۇرىلىمى "90 پايىز قالپىنا كەلتىرىلگەنى" ايتىلدى. ارىس قالاسى اكىمىنىڭ ايتۋىنشا، 8 مىڭعا جۋىق ۇيگە جوندەۋ جۇرگىزىلگەن. "كەيبىر ۇيلەردىڭ ساپاسىز جوندەلگەنى نەمەسە سالىنعانى تۋرالى" شاعىمدارعا بايلانىستى جاۋاپ بەرگەن ارىس قالاسىنىڭ اكىمى مۇرات قادىربەك "بىرەن-ساران وسىنداي جاعدايلار بولۋى مۇمكىن. بۇل ماسەلە زاڭ شەڭبەرىندە شەشىلەدى. ەگەر تۇرعىن جوندەۋ جۇمىستارىنان كەيىن ۇيىنەن بەلگىلى ءبىر جاسىرىن اقاۋلار تاپسا، ءبىز مەردىگەر كومپانيانى شاقىرىپ، جوندەۋ جۇمىستارىن جۇرگىزىپ بەرەمىز" دەدى.

بۇعان دەيىن بىرقاتار تۇرعىندار جارىلىستان بەرى ءبىر جىل وتسە دە، ۇيلەرىنىڭ ءالى جوندەلمەگەنىن ايتىپ، بيلىكتى سوككەن.​

شامامەن ەكى اپتا بۇرىن شىمكەنتتەگى اسكەري گارنيزون سوتىندا جارىلىسقا بايلانىستى قوزعالعان ءىس بويىنشا سوت باستالعان ەدى. بۇل ىستە 16 ايىپتالۋشى، 1 500 جابىرلەنۋشى بار.

Abai.kz