كۇنى كەشە عانا قازاقستاننىڭ اقپارات جانە قوعامدىق دامۋ ءمينيسترى ايدا بالاەۆا حانىم ءوزىنىڭ ەسەپ بەرۋ جيىنىندا «اباي»تەلەارناسىنىڭ اشىلاتىنىن حابارلاپ ايتقان ەدى. بۇگىن سول تەلەارنانىڭ رەسمي اشىلۋى ءوتتى. مادەني-اعارتۋ باعىتىنداعى «اباي» تەلەارناسىنىڭ تۇساۋى كەسىلدى.

اشىلۋ سالتاناتىنا قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ، قر اقپارات جانە قوعامدىق دامۋ ءمينيسترى ايدا بالاەۆا، قر مادەنيەت جانە سپورت ءمينيسترى اقتوتى رايىمقۇلوۆا مەن كورنەكتى مادەنيەت جانە ونەر قايراتكەرلەرى، پارلامەنت دەپۋتاتتارى قاتىستى.

«الەمدە قالىپتاسقان كۇردەلى احۋالعا قاراماستان 2020 جىل ەلىمىزدەگى ەرەكشە ماڭىزدى وقيعالارمەن ەستە قالاتىندىعى انىق. سونىڭ ءبىرى - ابايدىڭ 175 جىلدىعى. بيىل ۇلى اقىننىڭ مۇراسىن دارىپتەۋگە ارنالعان اۋقىمدى جۇمىستار باستالدى. ءىس-شارالار ءالى دە جالعاسىپ جاتىر. بۇل - بارىمىزدى باعالايتىن، بولاشاعىمىزدى باعدارلايتىن ناقتى قادام بولىپ وتىر. ەلباسىمىز نۇرسۇلتان نازارباەۆتىڭ «رۋحاني جاڭعىرۋ» باعدارلاماسىندا كورسەتىلگەن قوعامدىق سانانى قايتا تۇلەتۋ ءىسىنىڭ ءمان-ماڭىزى وسىندا. مەملەكەت باسشىسى قاسىم-جومارت توقاەۆ «اباي جانە ءححى عاسىرداعى قازاقستان« اتتى ماقالاسىندا «اقىننىڭ مۇراسى بۇكىل ادامزات بالاسىنىڭ رۋحاني ازىعى« دەپ لايىقتى باعا بەردى»، - دەدى داۋرەن اباەۆ ءوزىنىڭ قۇتتىقتاۋ سوزىندە.

ابايدىڭ اتىن يەمدەنىپ وتىرعان بۇل تەلەارنا – مادەني-اعارتۋ باعىتىنداعى بىردەن-ءبىر ارنا بولماق.

«جاڭا ارنانىڭ «اباي» دەپ اتالۋى تەگىن ەمەس. بىرىنشىدەن، مادەني-اعارتۋ باعىتىنداعى جالعىز تەلەارناعا ۇلت رۋحانياتىنىڭ تەمىرقازىعى ابايدىڭ اتىن بەرۋ وتە ورىندى. ويتكەنى، ۇلى اقىننىڭ ونەگەلى جولى ءالى تالاي عاسىرعا جالعاس ادى. ەكىنشىدەن، جاڭا تەلەارنا ءتول مادەنيەتىمىز بەن ءداستۇرىمىزدى ناسيحاتتاۋدى ماقسات ەتەدى. بۇل تۋراسىندا ۇلى ويشىلدىڭ «پايدا ويلاما ار ويلا، تالاپ قىل ارتىق بىلۋگە»، «اسەمپاز بولما ارنەگە، ونەرپاز بولساڭ ارقالان» دەگەن وسيەتتەرىن ەستە ۇستاۋىمىز كەرەك... ۇلى اقىن تاعى ءبىر سوزىندە ادام بالاسىن زامان وسىرەدى دەيدى. ءبىزدىڭ جاڭا تەلەارنامىزدىڭ جۇمىسى دا وسى قازىرگى ءداۋىردىڭ تالابىنا بەيىمدەلەدى»، - دەدى داۋرەن اباەۆ.

اقپارات كەڭىستىگىنە «اقىل ويدىڭ ايناسى» دەگەن ۇرانمەن جول تارتقان «Abai tv» تەلەارناسى ۇلتتىق جانە الەمدىك ونەر مەن مادەنيەتتىڭ ءىنجۋ-مارجانىن، ءتۇرلى ۇلتتاردىڭ ادەبي جانە تاريحي مۇرا جاۋھارلارىن، سپەكتاكل، بالەت سياقتى بەكزادا ونەر تۇرلەرىن قالىڭ بۇقاراعا ۇسىنادى.

«Abai tv» ارناسىنىڭ اشىلۋى قازاق قوعامى ءۇشىن ۇلكەن مەرەكە. وركەنيەتىمىز مەن مادەنيەتىمىز ءۇشىن ماڭىزدى ارنالاردىڭ ءبىرى بولادى دەپ سەنەمىن. مادەنيەت سالاسىنداعى ازاماتتاردى تەلەارناعا ونىمدەرى مەن ونەرلەرىن ۇسىنۋعا شاقىرامىن» - دەپ اتاپ ءوتتى مادەنيەت جانە سپورت ءمينيسترى اقتوتى رايىمقۇلوۆا.

جاڭا تەلەارنا مەملەكەت باسشىسىنىڭ تاپسىرماسىمەن ىسكە قوسىلدى جانە قازاقستاندىقتاردى ۇلى اباي مۇراسى، قازاقستاننىڭ جانە بۇكىل الەمنىڭ مادەنيەتى مەن ونەرىنىڭ جەتىستىكتەرىمەن تانىستىرۋعا ارنالادى. وسى باعىتتاعى «اباي جولىن بىرگە وقيىق»، «ءساراسوز» باعدارلامالارى جارىققا شىقتى. ودان بولەك، باعدارلامالار كەستەسىنە قازاق قالامگەرلەرىنىڭ درامالىق شىعارمالارىن تالداۋعا ارنالعان «ۇركەر»، جاستاردىڭ «جىر مايدانى»، قازاق مۋزىكاسى مادەنيەتى مەن تاريحى جايىنداعى «مۋزىكا ۆەليكوي ستەپي»، سپەكتاكلدەر مەن بالەت قويىلىمدارىنا ارنالعان «پرەمەرى» باعدارلاماسى كورەرمەنگە جول تارتتى.

«وسى ءبىر كەزدىڭ وزىندە قيىنشىلىققا قاراماستان، جاڭا تەلەارنانىڭ اشىلۋى، سوعان بارلىق مۇمكىندىكتى جاساۋ يگى ىستەردىڭ ءبىرى. ابايدىڭ اتى - وتە ارداقتى. وسى ارنادا قىزمەت ەتەتىن قىز-جىگىتتەردىڭ موينىنا وتە اۋىر جۇك ارتىلادى. اباي اتىن يەلەنگەننەن كەيىن ابايدىڭ ادىلدىگىن، ويشىلدىعىن، سوزگە دەگەن ەرەكشە ىقىلاسىن، عاجايىپ جىرلارى مەن اندەرىندەگى نازىكتىك پەن سۇلۋلىقتى ساقتاپ، سول بيىكتەن كورىنىڭىزدەر»، - دەپ، جازۋشى، قر ەڭبەك سىڭىرگەن قايراتكەرى سۇلتان ورازالى جاڭا ارناعا ىزگى تىلەگىن ءبىلدىردى.

تەلەارنا قازاق جانە ورىس تىلدەرىندە تاۋلىگىنە 17 ساعات (07:00-دەن 00:00-گە دەيىن) حابار تاراتاتىن بولادى. ارنا «Otau TV» ۇلتتىق سپۋتنيكتىك وپەراتورى، «Alma TV»، «ID TV» كابەلدىك جەلىلەرى ارقىلى تارالادى. www.abaitv.kz رەسمي سايتى ارقىلى ونلاين كورۋ مۇمكىندىگى بار.

Abai.kz