كەڭەس وداعىنىڭ ىرگەسى ىدىراي باستاعان ساتتە، الەمنىڭ ءار شالعايىندا جۇرگەن ءيسى قازاق بالاسىنىڭ اڭسارى قازاقستانعا اۋدى. بالتىق جاعالاۋى ەلدەرى باياعىدا ءبولىنىپ كەتتى. ورتا ازيادا ءبىرىنشى بولىپ، قىرعىزستان ءوز تاۋەلسىزدىگىن جاريالادى. ارى قاراي، كەڭەستىك رەسپۋبليكالار كەزەگىمەن ءبولىنىپ كەتىپ جاتتى. ءبىز دەمىمىزدى ىشىمىزگە تارتىپ، قازاق ەلىنىڭ تاۋەلسىزدىك جاريالاۋىن تاقاتسىزدانا كۇتتىك. اقپارات تاپشى. بار سەنگەنىمىز – "ازاتتىق راديوسى". كوپ تىلەۋى – كول عوي. ول كۇنگە دە جەتتىك. الاشتىڭ سوڭعى تۇياعى حاسەن ورالتاي اعامىز "ازاتتىق" راديوسىنىڭ ەفيرىنەن ءسۇيىنشى سۇراپ، 1991 جىلعى 16 جەلتوقساندا قازاقستان رەسپۋبليكاسىنىڭ تاۋەلسىزدىك جاريالاعانىن جەتكىزدى. كۇيتىن قالاسىنداعى ينيستيتۋتتا وقىپ جۇرگەمىز. ال، قۋان! ال، تويلا!

سەنەسىز بە، قاشان قازاقستانعا ورالعانعا دەيىن ءبىزدىڭ ارامىزدا قازاقستان مەن نۇرسۇلتان نازارباەۆتان وزگە اڭگىمە بولمايتىن. كۇندىز-ءتۇنى ايتۋدان ءبىر جالىققان ەمەسپىز. بىلايشا ايتقاندا، ءبىز بۇگىنگى پاندەميامەن اۋىرعان سەكىلدى، قازاقستانمەن، نازارباەۆپەن اۋىردىق. ەس-اقىل تۇگەل وسى جاققا اۋىپ كەتكەن. قۇدالىقتا دا، تويدا دا، ولىمدە دە ايتاتىنىم ەكى-اق اڭگىمە – قازاقستان جانە ونىڭ پرەزيدەنتى نۇرسۇلتان نازارباەۆ! بولدى، وزگە ءسوز قىزىق ەمەس، ءدامسىز. قالادا دا، دالادا دا سولاي. ەكى ادامنىڭ باسى قوسىلسا بولدى، "قازاقستان...", "نازارباي..."-دەپ باستاپ، اق تاڭنان قاس قارايعانشا گۋلەتەمىز دە وتىرامىز.

جاڭىلماسام، نۇرسۇلتان نازارباەۆ قىتايعا تۇڭعىش رەت 1991 جىلعى شىلدە ايىندا كەلدى. تۇپ-تۋرا 51 جاستاعى كەزى عوي. مەن بيىل، مىنە، ەلۋ بىردەمىن. ورتالىق تەلەارنانىڭ كەشكى جاڭالىقتارىنان قحر توراعاسى تسزيان تسزەميننىڭ سالتاناتتى قارسى الۋ ءساتىن ءوز كوزىمىزبەن كورىپ، قاتتى قۋانعانىم ەسىمدە. وعان دەيىن قىتاي توراعاسى تسزيان تسزەميننىڭ قاسىنان قازاق بالاسىن كورگەن ەمەسپىز. ءتىپتى، ول ءوڭىمىز تۇرماق، تۇسىمىزگە كىرمەيتىن قۇبىلىس ەدى. تەك، اقش-تىڭ، ۇلى بريتانيانىڭ، گەرمانيانىڭ... باسشىلارى عانا كەزدەسە الادى دەپ، ويلايتىنمىن.

ءالى كوز الدىمدا تۇر، تەلەديداردى تەسىپ، كىرىپ كەتە جازداپ، ءتونىپ وتىرمىز. نۇرسۇلتان ءابىشۇلى قىتاي باسشىسىمەن بىرگە بالپاڭ-بالپاڭ باسىپ، قاتار كەلە جاتىر... بىرەسە، ورنىمىزدان اتىپ تۇرىپ، ۇيگە سىيماي، السۇرىپ، كەتەمىن. بىرەسە، قايتا كەلىپ تەلەديدارعا تەلمىرەم. كورگەن تۇستەي بولىپ، جاڭالىق زۋ ەتىپ وتە شىقتى. ەندى تاڭەرتەڭگى قايتالاناتىن حاباردى تاعاتسىزدا كۇتتىك. وعان دەيىن كورشى-قولاڭ جيىلىپ الىپ، نۇرسۇلتان ءابىشۇلىنىڭ كەلىستى كەسكىنىن، بالاپانداپ باسقان ءجۇرىسىن، كەرە قارىس اشىق ماڭدايىن جارىسا ءسوز ەتەمىز. قازاقتىڭ دا وسىنداي سىمباتتى پاتشانىڭ بولعانىپ ايتىپ، ال كەپ دۇرىلدەپ ماقتانامىز...

ءسويتىپ، ءبىز ءۇشىن بۇل ءبىر تاڭعاجايىپ وقيعا بولدى. ەندى ويلاسام، ءبىر جاعى جاستىق البىرتتىق بولسا، ەكىنشى جاعىنان بويداعى قازاقى قان ەكەن عوي ءبىزدى الەككە سالىپ، الىپ ۇشىرىپ جۇرگەن.

نۇرسۇلتان نازارباەۆتىڭ قىتايعا كەلۋى مەن قحر توراعاسى تسزيان تسزەميننىڭ ونى وتە جوعارى دەڭگەيدە قارسى الۋى – بىگە قازاق دەگەن ۇلتتىڭ شىن مانىندە كەرەمەت حالىق ەكەنىن جۇرەگىمىزبەن سەزدىرىپ، ەڭسەمىزدى كوتەرىپ كەتتى.
ايتپاقشى، ءبىز "ازاتتىق" راديوسىمەن بىرگە، "قازاق راديوسىن" دا ۇزبەي تىڭدايتىنبىز. "قازاق راديوسىندا" كۇندەلىكتى جاڭالىقتارمەن قاتار، ءان-كۇيلەر، ونەر ادامدارى جايلى اڭگىمەلەر كوبىرەك بەرىلەدى.

سول قۇت قونعان 1991 جىلدى اياقتاپ، جاڭا جىلدى قارسى الار تۇستا – 31 جەلتوقساندا ءبىز "قازاق راديوسىنان" قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ساڭقىلداعان ءوز داۋىسىن ەستىدىك. ول پرەزيدەنتتىڭ كۇندەلىكتى قىزمەت بارىسىندا ايتىلىپ جاتاتىن ءسوزى ەمەس، ارنايى شەتەلدەگى قازاقتارعا – بىزگە ارناعان تاريح ۇندەۋى بولاتىن. ەشتەڭەدەن تايىنعان جوق،

"...ءبىز تاۋەلسىز مەملەكەت بولدىق، ءبىزدىڭ ەسىگىمىز سىزدەرگە اشىق، كەلىڭدەر، مەن شاقىرام!.." دەگەن مازمۇنداعى جالىن اتقان، ساعىنىشقا تولى شاقىرۋ. ەڭ كەرەمەتى، نۇرسۇلتان ءابىشۇلىنىڭ ءار ءسوزى انىق جانە نىق سەنىمگە تولى ەدى. تىڭداعان ءبىزدىڭ بويىمىزعا ەشكىم توقتاتا المايتىن بوگەۋ بەرمەس الىپ كۇش ءبىتىردى تۇڭعىش پرەزيدەنتتىڭ بۇل سوزدەرى!

ونسىز دا قوزىپ تۇرعان دەلەبە ودان ارى تىنىشىمىزدى كەتىردى. ءسويتىپ، ۇشارعا قانات تاپپاي جۇرگەن كۇندەردىڭ بىرىندە ءۇرىمجى جاقتان "بەس جازۋشى قازاقستانعا كوشكەلى جاتىپتى!"-دەگەنبىر كەرەمەت جاڭالىق جەتتى ءبىزدىڭ قۇلاققا.

وسىلايشا، شىڭجاڭداعى كوشتىڭ العاشقى سەڭىن جازۋشىلار جاقسىلىق ءساميتۇلى، تۇرسىنحان زاكەن جانە ارميابەك ساعىندىقۇلى باستاعان بەس وتباسى بۇزدى.

"الىستا جۇرگەن اعايىنعا اق تىلەك" اتتى سول اتاقتى ۇندەۋدىڭ مىنا ءبىر بولىگىن وقىساڭىز، ەلباسىنىڭ ەلدەن تىس جەردە جۇرگەن باۋىرلارىنا دەگەن قامقور كوڭىلىنىڭ قالاي ەكەنىنە بىردەن كوز جەتكىزەسىز:

– قىمباتتى وتانداس­تار! ەجەلگى اتامەكەنىنەن جىراقتاپ قالعان سىزدەردى كەشەگى كۇنگە دەيىن اتا-بابا جەرىنە قايتىپ كەلە الامىز با دەگەن سۇراقتىڭ الاڭداتىپ كەلگەنىن مەن جاقسى بىلەمىن. «تۋعان جەردىڭ ءتۇتىنى دە ىستىق» دەيدى حالقىمىز. قانداس باۋىرلارىمىزدى بايىرعى اتاقونىسىنا تارتۋ ماقساتىندا ادام پراۆوسى تۋرالى ەلارالىق ەرەجەلەردى باسشىلىققا الا وتىرىپ، قازاقستان ۇكىمەتى «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاقستاندا قونىستاندىرۋ ءتارتىبى مەن شارتتارى تۋرالى» ارنايى قاۋلى قابىلدادى. سوندىقتان اتامەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!"

قايتا داۋىستاپ وقىڭىزشى، ".. اتامەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!". جۇرەگىڭدى جۇلىپ الاتىن قانداي عاجاپ ءسوز بۇل!

ءوز مەملەكەتىڭنىڭ باسشىسى ءوز اۋزىمەن شاقىرىپ تۇر. ەندى وسىدان ارتىق قانداي ءسوز كەرەك بىزگە؟! بويىڭدا جانىڭ بولسا، "نۇراعام، قايداسىڭ؟!"-دەپ، جاياۋ بولسا دا تارتىپ كەتۋىڭ كەرەك قوي بىردەن!

سويتسەك، قاسيەتىڭنەن اينالايىن نۇرەكەم ەل تاۋەلسىزدىگىن جاريالايماي تۇرىپ، 18 قاراشادا قازاق كسر مينيسترلەر كەڭەسىنە «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاق كسر-ىندە قونىستاندىرۋ ءتارتىبى مەن شارتتارى تۋرالى» №711 قاۋلى قابىلداتىپ، ءبىزدىڭ بولاشاق تاعدىرىمىزدى ءوز قولىمەن الدىن-الا شەشىپ قويعان ەكەن عوي.

نۇرسۇلتان ءابىشۇلىنىڭ ەڭ كەرەمەت كەمەڭگەرلىگى دەپ، قازاقستاننىڭ تاۋەلسىزدىگىن جاريالاماي تۇرىپ، ءبىرىنشى كەزەكتە بىردەن الىس-جاقىن شەتەلدەردە تارىداي شاشىراپ جۇرگەن قازاقستارىن ەسكە العانىن، سولاردىڭ ەلگە ورالۋىنا مۇمكىندىك جاساۋىن تەبىرەنىسپەن، بەك ريزالىقپەن اتاپ وتكىم كەلەدى!

مىنە، كەمەڭگەرلىك. مىنە، تۋعان حالقىنا دەگەن ۇلى ماحاببات. مىنە، باتىلدىق پەن جۇرەكتىلىك! ءبىز ەلباسىمىزدىڭ بۇل جاقسىلىعىن ەشقاشان ۇمىتپايمىز. ءبىز وعان ماڭگى ريزامىز!

مەن "الىستا جۇرگەن اعايىنعا اق تىلەك" اتتى سول قاسيەتتى ۇندەۋدىڭ وسى بولىگىن شەتتەن ورالعان جانە ورالۋدىڭ ءسات-ساعاتىن كۇتىپ وتىرعان ءار قازاق رامكاعا التىن ارىپپەن جازىپ، تورىنە ءىلىپ قويۋى، ۇراپاقتان-ۇرپاققا جاتتاتىپ وتىرۋى كەرەك دەپ ەسەپتەيمىن!

قازىر ۇلت كوشباسشىسى نۇرسۇلتان نازارباەۆتىڭ، پرەزيدەنت قاسىم-جومارت توقاەۆ ءار جىلدارى جازعان كىتاپتارىن وقىپ وتىرساق، نۇرسۇلتان ءابىشۇلىنىڭ قازاق كوشى تۋرالى جاساعان ۇلى ەڭبەكتەرىن كورىپ، قايران قالاسىڭ! ەلباسى ءار رەتكى شەتەلگە جاساعان ساپارى بارىسىندا، ەگەر بارعان ەلىندە قازاق بولسا، ەڭ الدىمەن سولاردىڭ جاعدايىن ايتىپ، ماسەلەسىن كوتەرىپ وتىرعان. ولاردىڭ اتاجۇرتىنا كوشۋ ماسەلەسىن بيىك دەڭگەيدە كەلىسىپەي كەتكەن كەزى جوق. شىڭجاڭعا، ءتىپتى قۇلجاعا دەيىن ات باسىن بۇرىپ، ءجانابىل سىماعۇلۇلى، اسحات كەرىمبايۇلى باستاعان ەل اعالارىمەن الدەنەشە مارتە كەزدەسكەنىن، قانداستارىنىڭ ۇيىنە دەيىن بارىپ، تورىندە وتىرىپ شاي ىشكەنىن مەن وتە جاقسى بىلەم.

قۇدايعا شۇكىر، تۇڭعىش پرەزيدەنت نۇرسۇلتان نازارباەۆتىڭ اللا بەرگەن اقىل-پاراساتى مەن تالانتىنىڭ ارقاسىندا قازاقستان الەمدە ءوز ورنى بار كەرەمەت مەملەكەت بولدى. سول ۇلى مەملەكەتكە الەمنىڭ ءار شالعايىنان ءبىر ميلليوننان استام قانداسىمىز كەلىپ، ىرگە تەپتى. ولار ءوسىپ-ءونىپ، باقىتتى ءومىر ءسۇرىپ جاتىر. سونىڭ بىرەۋى – مەنمىن!

ەلۋ جاسقا تولعان ىمدا ارنايى قۇتتىقتاۋىن جىبەردى ەلباسى. ول قۇتتىقتاۋدى مەن ماعان عانا ەمەس، جانە سول الىستان ورالعان اعايىنعا دەگەن جۇرەكجاردى سالەمى مەن قۇرمەتى دەپ باعالادىم.

توقىراۋ جىلدارىنىڭ قيىنشىلىعىنا قاراماستان، تاۋەلسىزدىكتىڭ العاشقى ون جىلىندا ەلباسى جارلىعىمەن قانداستارىمىزعا باسپانا بەرىلىپ وتىردى. ودان كەيىنگى ون جىلدا ءار جىلى 20 مىڭ وتباسىنا دەيىن كۆوتا ءبولىنىپ تۇردى. قازىر دە ۇكىمەت ايقىنداعان وڭىرلەرگە قونىستانام دەگەن اعايىنعا كوپ-كورىم اقشا بەرىلۋدە.

وزەكتى ورتەيتىن ءبىر وكىنىش – سول ءبىر كول-كوسىر، كەڭىر زاماندا قانداستارىمىزدىڭ قازاقستانعا قاۋىرت-قاۋىرت، لەك-لەگىمەن كوشىپ كەلىپ الماعانى. اسىرەسە، قىتايداعى قازاقتار! باۋىرلارىمىز ەركىندىك پەن بوستاندىقتان گورى، قۋ دۇنيەنى قىمباتقا بالاپ، تاپجىلماي وتىرىپ الدى. ارينە، وعان قازاقستان مەن ونىڭ باسشىسى كىنالى ەمەس. مەملەكەتتىڭ ەكونوميكالىق جاعدايى ناشار كەزدە كوشىپ كەلگەن قازاقتار اشتان ءولىپ، كوشتەن قالعان جوق. ەڭبەك ەتە بىلسەڭ، تۇرمىسىڭ دا جاقسى بولادى.
ءتىپتى، نۇرسۇلتان نازارباەۆ پرەزيدەنتتىك وكىلەتتىگىن مەرزىمىنەن بۇرىن توقتاتقالى جاتقاندا ارنايى جارلىق شىعارىپ، بەلگىلى-بەلگىسىز سەبەپتەرمەن، تاۋەلسىزدىكتەن بەرى قۇجاتسىز جۇرگەن، قۇجاتتارىنىڭ جارامدىلىق مەرزىمى ءوتىپ كەتكەن نەشە ون مىڭداعان قانداستارىمىزدىڭ وتكەن جىلدىڭ سوڭىنا دەيىن قۇجاتتانىپ الۋىنا مۇمكىندىك جاساپ بەرىپ كەتتى عوي، شىركىن. بۇعان قالاي رازى بولمايسىڭ، قۇرمەتتى مەنىڭ جەرلەستەرىم مەن تاعدىرلاستارىم!

قازاقستاننىڭ ءوز تاۋەلسىزدىگىن جاريالاپ، ءدال بۇگىنگى كۇنگە جەتكەنگە دەيىنگى باسىپ وتكەن بارلىق جولى مەن كەزەڭى كوز الدىمىزدا سايراپ تۇر. شىنىمدى ايتسام، ءار كۇنى نۇر-سۇلتانعا قاراپ، كەرەمەت ءبىر ءتاتتى ءتۇس كورگەندەي سەزىم قۇشاعىندا جۇرەم. مەنىڭ بۇل ءسوزىمدى وقىعان كەيبىر اعايىن سەنبەۋى، مەنى "جاعىمپاز" ساناۋى مۇمكىن. جوق! قازاقستان تۋرالى مەنىڭ كوزىم جەتىستىكتەن باسقانى كورىڭكىرەمەيدى، قۇلاعىم جاقسىلىقتان باسقانى ەستىڭكىرەمەيدى. سەبەبى، ءبىز شەتتە ءجۇرىپ، "تاۋەلسىز وتان" دەگەننىڭ زارىن ابدەن تارتقان، بوداندىق پەن كىرىپتارلىقتىڭ كەسەپاتىن ابدەن كورگەن حالىقتىڭ ۇرپاعىمىز. التى-جەتى ميلليون قازاق ءالى سىرتتا ءجۇر. تۋما-تۋىستارىمىزدىڭ باسىم بولىگى ساياسي ەزگى مەن ادام توزگىسىز ازاپتى، مىنە، ءالى تارتىپ وتىر. بىزگە تويىپ سەكىرۋگە، استام سويلەۋگە ءالى ەرتە. اقىل ايتىپ، سىناپ-مىنەپ وتىرعاننان گورى، بىردەمە ىستەپ جىبەرگىمىز-اق كەلەدى. كەيدە سوعان مۇمكىندىگىمىز بولماي، قولىمىز بايلانىپ قالىپ جاتادى...

ءبىز نۇرسۇلتان ءابىشۇلىن ەرەكشە جاقسى كورەمىز. ەڭبەگىن باعالاپ ايتۋدان، جازۋدان جالىققان ەمەسپىن. جىلدار ءوتىپ، جاستىقتىڭ بۋى باسىلىپ، جاسىمىز ەلۋدەن اسقان سايىن، ۇلت كوشباسشىسىنىڭ شەتتەگى قازاقتى كوشىرىپ الۋداعى وراسان زور ەڭبەگىنە ءىشىڭ جىلىپ، جۇرەگىڭ ەلجىرەي تۇسەدى ەكەن. ءتىپتى، كەيبىر اعايىننىڭ وعاش ارەكەتى مەن قيسىنسىز سوزىنەن ۇيالاتىن، قىسىلاتىن ساتتەر دە بولادى. وتان مەن ونىڭ ءار باسشىسى ءبىزدىڭ ارقا سۇيەر الاتاۋىمىز، قيماس دوسىمىز بولىپ سەزىلەدى. ولار سەنىڭ ادال كوڭىل، تۇزەۋ نيەتپەن ايتقان ءار اششى سىنىڭدى جىگىتشە كوتەرە بىلەدى. مۇندايدا كوڭىلىڭ اسقاقتاپ، جانىڭ جادىراپ كەتەدى. مىنە، ءوز مەملەكەتىڭنىڭ قاسيەتى مەن قادىرى دەگەن وسى بولار.

قىسقاسى، نۇرسۇلتان ءابىشۇلىنا ەكى دۇنيەدە ريزامىن!

يدەال مەملەكەت ەشبىر الەمدە جوق. بار بولسا، ول دا سالىستىرمالى دۇنيە. ءتىپتى، بار دەگەن كۇننىڭ وزىندە، ماڭگىلىك ەمەس، ولاردىڭ دا اعات قادام باساتىن، ءتۇزۋ جەردە سۇرىنەتىن، سودان اقسايتىن تۇستارى بولادى. بولىپ تا جاتىر. ءار ادام ءوزىن ءبىلىپ، دەڭگەيىن باعالاپ، قابىلەتىنە قاراي جۇمىس ىستەسە، ەرتەڭگى كۇنىمىز ءتىپتى دە جاقسارىپ، كەرەمەت ەل بولامىز.

مەملەكەت قۇرۋ، ونى اينالاسىمەن تەرەزەسىن تەڭەستىرە ءبىلۋ – وڭاي شارۋا ەمەس. مەملەكەت قۇرۋ بىلاي تۇرسىن، بار مەملەكەتىنەن ايىرىلىپ قالىپ جاتقان حالىق قانشا ما؟! دەمەك، ەلباسى نۇرسۇلتان نازارباەۆ تۋعان حالقى ءۇشىن قولىنان كەلگەننىڭ ءبارىن جاسادى. قازاقتىڭ قولىن اتا-باباسى ارمانداعان جاعدايعا جەتكىزدى. ەشكىمنەن اشقاشان تايىنعان جوق! الەمنىڭ بارلىق ەلىنىڭ باسشىلارىمەن قازاعى ءۇشىن قاسقايىپ تۇرىپ، سويلەستى، ءتىلىن تاپتى، ءسوزىن وتكىزدى... ول ەندى بۇگىن بارلىق ماقتاۋلار مەن ماراپاتقا لايىق!

"نۇرسۇلتان نازارباەۆ!" دەگەندە، ءبىرىنشى ءسوزدى ونىڭ كوشى-قون ساياساتىنان باستاۋ كەرەك!

مەن قازاقستان رەسپۋبليكاسىنىڭ ازاماتى رەتىندە نۇرسۇلتان ءابىشۇلىنىڭ ەسىمى مەن قۇرمەتىنە جاسالىپ جاتقانىن يگى ىستەردىڭ ءبارىن دۇرىس دەپ سانايمىن!

ال، جەتىسپەي جاتقان، جەتپەي قالعان تۇستار بولسا، پرەزيدەنت قاسىم-جومارت توقاەۆ باستاعان ەكىنشى بۋىن ونى تولىقتىرۋعا، تولتىرۋعا مىندەتتى. ەندى نۇرسۇلتان نازارباەۆ تۋرالى ءبىر اۋىز ارتىق ءسوز ايتۋ كەرەك ەمەس!
اۋەلگى سوزىمىزگە ورالساق، نۇرسۇلتان نازارباەۆ الەمدەگى بار قازاقتىڭ قامقورى، تىرەگى بولدى. ال، بۇگىن ول – قازاقتىڭ ايباتى! بىزگە بيىك مىنبەدە تۇرىپ، "...كەلىڭدەر دە، اينالايىن، قازاعىم، كۇنىڭدى كورىپ، بايىڭدار!"-دەدى!

بىلە-بىلسەك، نۇرسۇلتان ءابىشۇلىنىڭ سول "اينالايىن!" دەگەن ءبىر اۋىز سوزىندە كۇننىڭ نۇىنان دا ىستىق جىلۋ بار!

ءبىزدىڭ جاۋراماي، دىردەكتەمەي جۇرگەنىمىز سول "اينالايىننىڭ" ارقاسى!

مىنە، اسا مارتەبەلى نۇرسۇلتان ءابىشۇلى 80 جاسقا تولدى. ءوزى قۇرعان مەملەكەتىنىڭ سىيى مەن قۇرمەتىن ءوز كوزىمەن كورىپ، حالقىنىڭ ىقىلاسىن سەزىنىپ جاتىر. بۇل – ەكىنىڭ بىرىنە بۇيىرا بەرەتىن باقىت ەمەس! بار كۇشىمەن كۇندىز-ءتۇنى ارپالىسىپ قىزمەت ەتكەن جاندارعا عانا تيەسىلى مارتەبە. ونىڭ ار جاعىندا تۋعان حالقىنىڭ بيىك پاراساتتىلىعى مەن سارىارقاداي كەڭ پەيىلدىگى جانە كەمەڭگەرلىگى جاتىر.

اسا مارتەبەلى نۇرسۇلتان ءابىشۇلى!

تاعى قايتالاپ ايتام، مەن سىزگە ەكى دۇنيەدە ريزامىن!

ءسىز شاقىرىپ، جولىمىزدى اشپاساڭىز، قازىر قايدا جۇرەرىمدى ءبىر قۇدايدىڭ ءوزى عانا بىلەدى. سىزگە سەنىپ كەلدىك. سەنىم ارتىعىمەن اقتالدى. كەلە الماي جاتقان ەل ءۇشىن، ارينە، ءسىز كىنالى ەمەسسىز! ەسىكتى ايقارا اشىپ، زاڭ-جارلىعىڭىزدى ەرتە باستان كەمەلدەپ قويدىڭىز. ءسىز جانە ءسىزدىڭ بۋىن ءوز قولىمەن ىرگەتاسىن بەرىك قالاعان "قازاقستان" دەگەن قاسيەتتى مەملەكەتى بار، ەندى ول قازاق ەشقاشان دالادا قالمايدى. قالدىرمايمىز دا!

ءسىزدى سەكسەن جاسقا تولۋىڭىزبەن ءوزىمنىڭ جانە الەمنىڭ ءار شالعايىندا جۇرگەن سول بارشا قانداستارىڭىزدىڭ اتىنان شىن جۇرەكتەن قۇتتىقتايمىن!!
جامبىل اتامنىڭ جاسىنا كەلىڭىز!!!

اۋىت مۇقيبەك
"Nur Otan" پارتياسىنىڭ قىزمەتكەرى،
قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى.

Abai.kz