COVID-19 بەلگىلەرى از بولعان جاعدايدا ۆيرۋسقا، باكتەرياعا جانە ترومبقا قارسى پرەپاراتتار قاجەت ەمەس. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە مەديتسينا عىلىمدارىنىڭ دوكتورى، جوعارى ساناتتاعى دارىگەر راۋشان قاراباەۆا ءمالىم ەتتى.

«مۇنداي ناۋقاستار ەمدەۋ-قورعاۋ رەجيمىن ۇستانۋى كەرەك، دۇرىس تاماقتانىپ، ءجيى سۋ ىشەدى، س، د دارۋمەندەرىن قابىلدايدى، دەنە قىزۋى كوتەرىلگەن جاعدايدا ونى تومەندەتەتىن پرەپاراتتار – پاراتسەتامول جانە يبۋپروفەن قابىلدايدى. سونىمەن قاتار، بۇيرەك اۋرۋلارى بار ناۋقاستار، اسىرەسە، بۇيرەگىندا تاسى بار ادامدار كۆي كەزىندە س دارۋمەنىن قابىلداعاندا ساق بولۋى كەرەك»، - دەدى مامان.

قاراباەۆانىڭ ايتۋىنشا، دەنە قىزۋى 38س جوعارى كوتەرىلگەندە، ينتوكسيكاتسيانىڭ ايقىن بەلگىلەرى (بۇلشىق ەتتىڭ اۋرۋى، السىزدىك، باس اۋرۋى، جوتەل، كەۋدە قۋىسىنىڭ اۋىرۋى) بولعان جاعدايدا، ونىڭ اسقىنۋىنا، ياعني پنەۆمونياعا اۋىسۋىنا جول بەرمەۋ كەرەك. ول ءۇشىن كەۋدە قۋىسى ورگاندارىن رەنتگەنگە تۇسىرەدى نەمەسە كومپيۋتەرلىك توموگرافيا جاسايدى.

ايتا كەتەرلىك جايت، ەتيوتروپتىق ەمدەۋ كەزىندە ۆيرۋسقا قارسى پرەپاراتتار تاعايىندالادى. قازىرگى كەزدە لوپيناۆير/ريتوناۆير، گيدروكسيحلوروحين، فاۆيپيراۆير جانە رەمدەسەۆير سياقتى دارىلەردى قولدانۋ ۇسىنىلعان. ايتا كەتەيىك، بۇل دارىلىك زاتتاردىڭ گەپاتوۋىتتى جانە كارديوۋىتتى جاناما اسەرلەرى بار، ياعني باۋىر مەن جۇرەككە جاعىمسىز اسەرىن تيگىزەدى. وسىعان وراي، بۇل پرەپاراتتاردى اۋرۋدىڭ بەلگىلەرى از بولعاندا باقىلاۋسىز قابىلداۋ اسا قاۋىپتى بولىپ تابىلادى.

سونىمەن قاتار ول پنەۆمونيامەن اۋىرعانداردىڭ دا پرەپاراتتاردى باقىلاۋسىز قابىلداعانى قاۋىپتى ەكەنىن جەتكىزدى.

دارىگەردىڭ ايتۋىنشا، قازىرگى پنەۆمونيا ۆيرۋستىق، سوندىقتان باكتەرياعا قارسى پرەپاراتتار وعان ەش اسەر ەتپەيدى.

«كۆي جۇقتىرعانداردىڭ انتيبيوتيكتەردى باقىلاۋسىز قابىلداپ جاتقانىن كورىپ ءجۇرمىز. بۇل دۇرىس ەمەس، ءارى قاۋىپتى. انتيبيوتيكتەر اعزانىڭ يممۋنيتەتىن قالىپتاستىرۋعا قاجەتتى ىشەك ميكروفلوراسىن بۇزادى. ناتيجەسىندە، بۇل كەرى اسەرىن تيگىزۋى مۇمكىن. مۇنىمەن قوسا، انتيبيوتيكتەردى ەشقانداي بەلگىلەرسىز تاعايىنداعان جاعدايدا، ميكرواعزالار باكتەرياعا قارسى زاتتارعا تۇراقتى جانە ءتوزىمدى بولادى. بۇل وتە كۇردەلى ماسەلە دەۋگە بولادى. ادام اعزاسىندا انتيبيوتيكتەردىڭ كوپتەگەن تۇرلەرىنە ميكروبتاردىڭ سەزىمتال ەمەس، مۋلتيرەزيستەنتتى شتاممدارىنىڭ قالىپتاسۋى – بۇل جاھاندىق ماسەلە. بۇل كەلەشەكتە باكتەريالدى ينفەكتسيالاردى ەمدەۋدە قيىندىقتارعا اكەپ سوعادى»، - دەدى دارىگەر.

بۇگىندە اۋىر جاعدايدا عانا قولدانىلاتىن بىرقاتار انتيبيوتيكتەر مەن گورمونداردى ساتىپ الۋ جانە قابىلداۋ جاعدايلارى جيىلەپ وتىر. باكتەريالىق كومپونەنت بولعان كەزدە كوروناۆيرۋستى انتيبيوتيكتەرمەن تەك دارىگەردىڭ نۇسقاۋىمەن عانا ەمدەۋ قاجەت.

Abai.kz