نەمەسە پرەزيدەنتتىڭ  ۇندەۋى تۋرالى ءبىر اۋىز ءسوز

پرەزيدەنت تەلەارنالاردان كەزەكتى ۇندەۋىن جاريا ەتىپ، حالقىنىڭ الدىنا شىقتى. ونىسى دۇرىس بولدى.

ءيا، ەل ىشىندە ايتىلىپ جۇرگەن ءبىراز جايتتاردى قوزعادى. ول دا ءبىر قادام بولسا دا العا جىلجۋ دەپ ەسەپتەيمىن.
ياعني، پرەزيدەنت جۇرتتىڭ كوڭىل-كۇيىنەن ءبىرشاما حاباردار بولسا كەرەك.

مەديتسينا سالاسىن تىعىرىققا تىرەگەن دم-ءنىڭ "بۇرىنعى باسشىلىعىنىڭ جۇيەلىك كەمشىلىكتەرى" تۋرالى دا ايتتى. ول دا دۇرىس.

ءدارى-دارمەك باعالارىن ءجونسىز شارىقتاتىپ جىبەرگەندەردىڭ قىلمىستىق دەرلىك ارەكەتى تەرگەلىپ جاتقانىن دا ايتتى. ول دا ورىندى.

نە جەتپەدى؟

تج كەزى مەن كارانتين كەزىندە جۇمىسسىز، تابىس كوزىنسىز قالعان اعايىن مەن توقتاپ قالعان وتاندىق بيزنەستىڭ تاعدىرىنا قاتىستى ەشنارسە ايتىلمادى. نە الەۋمەتتىك كومەك جوق، نە كاسىپكەرلەرگە ناقتى قارجىلاي قولداۋ مەحانيزمى جوق.

وسى كۇندەرى جۇرت قوعام ءومىرىنىڭ كوپتەگەن سالاسىنىڭ جازدا، كۇزدە نە بولاتىنىن قىزۋ تالقىلاپ جاتىر. ماسەلەن، ءىرى جانە شاعىن كاسىپورىندار قالاي جۇمىس ىستەمەك، مەكتەپ پەن ۋنيۆەرسيتتەردەگى وقۋ پروتسەسى قالاي جۇرگىزىلمەك جانە تت. ولارعا ءالى دە جاۋاپ جوق.

ءيا، ءتيىستى مەملەكەتتىك كوميسسيا بار. ولار ءوز اقپاراتىن بەرە جاتار.

بىراق وسىناۋ ەل باسىنا كۇن تۋعان تاعدىرلى كەزەڭدە ەڭ باستى ماسەلەلەر جونىندە جۇرت ءوز پرەزيدەنتىنىڭ كەسىمدى دە شەشۋشى پىكىر ايتۋىن كۇتەدى. ال ول دەگەنىڭىز جاۋاپكەرشىلىكتى تومەنگى جاققا سىرعىتپاي، ءوز موينىنا الۋ دەگەن ۇلكەن ءسوز.

ءتورت اي بويىنا ىندەتپەن ارپالىسىپ، ءاربىر جان ءۇشىن كۇرەسىپ جاتقان دارىگەرلەر قاۋىمىنا قوسىمشا قانداي كومەك بولادى؟ ول دا ايتىلمادى.

مەنىڭشە، ەلدىڭ ءوز پرەزيدەنتىنەن كۇتكەنى ناق وسى، ناقتى كومەك ماسەلەسى ەدى!

ءيا، بيۋدجەت جاعدايى قيىن. ونى تۇسىنەمىز.

بىراق كەزىندە جەكە بانكتەردى داعدارىستان قۇتقارۋعا 12 ميللياردتاي دوللار جۇمساعاندا اسا قينالا قويماعان بيلىك نەگە قاراپايىم حالىققا، ءوز بيزنەسىنە كومەكتەسۋگە كەلگەندە "شىق بەرمەس، شىعايبايعا" ۇقساپ، سونداي جومارتتىق تانىتپايدى؟

وسىندايدا، شىن مانىندە ەل قىرىلىپ جاتقان ناۋبەت كەزىندە نەگە ۇلتتىق قوردان ءتيىستى قارجى قاراستىرىلمايدى؟ 60 ميللياردقا جۋىق ول ەداۋىر قوردى كىم ءۇشىن، نە ءۇشىن ساقتاپ وتىرمىز؟! ويتپەسە، ەرتەڭ كومەككە مۇقتاج ادام دا قالمايدى عوي!

PS. وسىناۋ سىني كەزەڭدە پرەزيدەنتتىڭ ەل الدىنا ءجيى شىعىپ تۇرعانى دۇرىس. حالىقپەن بىرگە ەكەنىن كورسەتسىن.

تەك ونداي جاريا شىعىسى -

تىكەلەي ەفير بولسا،

بۇگىنگىدەي تىم كەلتە قايرىلماسا،

الدىن-الا تۇسكەن سۇراقتارعا، سونىڭ ىشىندە، سىني سيپاتتاعى حاتتارعا، ماسەلەن، كەشەگى ساليۋتكە قاتىستى اشۋلى سوزدەرگە، جاۋاپ بەرسە،

قاعازعا قاراماي، جاندى ءارى ءوز سوزىمەن ەلىمەن سىرلاسسا،

ەلدەگى جاعدايدى جۇيەلى تۇردە قيىنداتىپ جىبەرگەن بىلىكسىز بيۋروكراتتاردىڭ اتىن اتاپ، ءتۇسىن تۇستەپ، سول ساتتە قاتاڭ جاۋاپكەرشىلىككە تارتسا -

دەگەن كاسىبي تەحنولوگيالىق-كوممۋنيكاتسيالىق ۇسىنىستار بار...

PS 2. ايتپاقشى، نەگە الداعى پارلامەنت سايلاۋىنان دامەلى پارتيالار قالا مەن اۋىلدا قينالىپ قالعان اعايىننىڭ مۇڭ-مۇقتاجىن پرەزيدەنتكە اشىق ايتىپ، جەتكىزبەيدى؟ وسىنداي كەزدە حالىقتىڭ ءسوزىن سويلەسە، بالكىم، ەرتەڭ سايلاۋدا جۇرتتىڭ بەتى بەرى قارار ما ەدى، ءا؟ الدە جوعارى جاقتىڭ رۇقساتىن كۇتىپ وتىر ما؟

PS 3. نەگە وسى ءبىزدىڭ باسشىلاردىڭ ورىس تىلىندەگى سوزدەرى انا تىلىندەگى ماتىنگە قاراعاندا اناعۇرلىم ءماندى دە مازمۇندى، سوندىقتان - ماڭىزدى بوپ شىعا بەرەدى؟

ءامىرجان قوسانوۆتىڭ جازباسى

Abai.kz