جاپونيانىڭ ايتي جانە ناگويا قالالارىندا ءوتىپ جاتقان ازيا ويىندارىندا قازاق جانكۇيەرلەرىنىڭ جۇيكەسىن سىناعان كەزەكتى تورەشىلىك داۋ ورىن الدى. قازاقستان بوكس فەدەراتسياسى (قبف) ۇلتتىق قۇراما كوشباسشىلارىنىڭ قاتىسۋىمەن وتكەن ەكى بىردەي جارتىلاي فينالدىق جەكپە-جەك ناتيجەلەرىنە تۇبەگەيلى قارسى شىعىپ، World Boxing حالىقارالىق ۇيىمىنا رەسمي پروتەست جولدادى.

بۇل جولى ادىلەتسىزدىك قۇربانى بولعاندار – 75 كەلىگە دەيىنگى سالماقتا ونەر كورسەتكەن الەم چەمپيونى ناتاليا بوگدانوۆا مەن 55 كەلىدەگى ساڭلاعىمىز ماحمۇد سابىرحان.

رينگتەگى تارتىس پەن قاعازداعى قاتەلىك

ناتاليا بوگدانوۆا ۇندىستاندىق تاجىريبەلى بىلعارى قولعاپ شەبەرى لوۆلينا بورگوحاينمەن ايقاسىپ، بارلىق ءۇش راۋندتا تەڭ دارەجەدە جۇدىرىقتاسسا دا، تورەشىلەر جەڭىستى 3:2 ەسەبىمەن قارسىلاسقا بەردى. ءدال وسىنداي ۇياتتى ستسەناري ماحمۇد سابىرحان مەن فيليپپيندىك كارلو پاالام اراسىنداعى كەزدەسۋدە قايتالاندى.

ماحمۇدتىڭ جەكپە-جەگىندە شەشۋشى ساتتەردىڭ بىرىندە قارسىلاسى ەرەجە بۇزعانى ءۇشىن رينگ تورەشىسى تاراپىنان ۇپايى شەگەرىلدى. الايدا، ەسەپ كەستەسىندەگى قايشىلىقتار مەن تورەشىلەردىڭ بىرجاقتى باعالاۋى قازاق بوكسشىسىنىڭ فينالعا شىعۋىنا كەدەرگى كەلتىرىپ، قولا جۇلدەمەن شەكتەلۋگە ءماجبۇر ەتتى.

فەدەراتسيانىڭ قاتاڭ ۇستانىمى: قازاقستان بوكس فەدەراتسياسى بۇل شەشىمدەردى «اشىق ادىلەتسىزدىك» دەپ باعالاپ، حالىقارالىق كونفەدەراتسيا مەن World Boxing ۇيىمىنا رەسمي شاعىم ءتۇسىردى. فەدەراتسيا وكىلدەرى سپورتشىلارىمىزدىڭ رينگتە باسىم تۇسكەنىن جانە باسەكە تاعدىرىن ءادىل ەمەس باعالاۋ شەشكەنىن قاتاڭ مالىمدەدى.

الەمدىك بوكستاعى جۇيەلىك تۇيتكىلدەر

اۋەسقوي بوكستاعى تورەشىلىك ماسەلەسى – جىلدار بويى ۋشىعىپ كەلە جاتكان اۋىر دەرت. حالىقارالىق ۇيىمدار (ايبا/IBA مۇراسىنان جاڭادان قالىپتاسىپ جاتقان World Boxing جۇيەسىنە كوشۋ كەزەڭى) ادىلدىك پەن اشىقتىقتى ۋادە ەتكەنىمەن، ءالى كۇنگە دەيىن سۋبەكتيۆتى باعالاۋ مەن «كابينەتتىك شەشىمدەر» سپورتشىلاردىڭ كوپ جىلدىق ەڭبەگىن ءبىر ساتتە كۇلتالقان ەتىپ جاتىر.

ەكى دۇركىن الەم چەمپيوناتتارى مەن حالىقارالىق ارەنالاردا مويىندالعان ماحمۇد سابىرحان مەن ناتاليا بوگدانوۆا سياقتى ساڭلاق بوكسشىلاردىڭ بۇلايشا سىرتقا قاعىلۋى – قازاق بوكسىنىڭ بەدەلىنە قارسى باعىتتالعان قادام ەمەس، جالپى حالىقارالىق بوكس جۇيەسىنىڭ السىزدىگىن كورسەتەدى. رەگلامەنت بويىنشا تورەشىلەر شەشىمىنىڭ كەيىن قايتارىلمايتىنى بەلگىلى بولسا دا، قبف-نىڭ بۇل قادامعا سانالى تۇردە بارۋى – بولاشاقتاعى وسىنداي كەلەڭسىزدىكتەردىڭ الدىن الۋ ءۇشىن اشىق دەمارش، ۇلكەن نارازىلىقتىڭ كورىنىسى.

ازيادا باسەكەسىندە قازاق بوكسشىلارىنان تەك ەكى سپورتشى – تورەحان سابىرحان مەن كاپيتان ايبەك ورالباي عانا فينالعا جولداما الدى. ال بۇگىن تورەحان سابىرحان ازيا چەمپيونى اتاندى.

بۇل كورسەتكىش بۇرىنعى ۇستەمدىك پەن التىن تۇعىرلاردان كورىنۋ داستۇرىنە سىزات ءتۇسىپ جاتقانىن، حالىقارالىق تورەشىلىك ينستيتۋتتارىنا دەگەن سەنىمنىڭ تۇپكىلىكتى شايقالعانىن اڭعارتادى.

ءابىل-سەرىك الىاكبار

Abai.kz