ايىپتاۋ اكتىسىنە سايكەس، “fxmsp” دەگەن لاقاپ اتى بار 37 جاستاعى اندرەي تۋرچين – قازاقستاندا تۇراتىن حاكەر. ول – قارجىلاي پايداعا كەنەلۋدى كوزدەيتىن كيبەرقىلمىس توبىنىڭ مۇشەسى. توپ 2017 جىلدىڭ قازان ايىنان بەرى التى قۇرلىقتاعى 40 ەلدە ورنالاسقان 300-دەن استام كورپوراتسيانىڭ، ءبىلىم بەرۋ ينستيتۋتتارىنىڭ، ۇكىمەت ورگاندارىنىڭ كومپيۋتەر جۇيەلەرىن بۇزىپ، جۇيەگە كىرۋگە مۇمكىندىك بەرەتىن دەرەكتەردى ينتەرنەت-فورۋمدارعا ساتىلىمعا قويعان. اتالعان مەكەمەلەردىڭ 30-دان استامى اقش-تا ورنالاسقان. دەرەك قۇنى بىرنەشە مىڭ دوللاردان ونداعان مىڭ دوللارعا دەيىنگى ارالىقتا بولعان. كەيبىر جاعدايلاردا جۇيەگە زاڭسىز كىرۋ دەرەگى 100 مىڭنان استام دوللارعا باعالانعان. زارداپ شەككەن مەكەمەلەر جۇيەلەرىن رۇقساتسىز پايدالانۋ سالدارىنان ونداعان ميلليون دوللارعا شىعىنعا باتقان.

Forbes.com باسىلىمى Group-IB كيبەرقاۋىپسىزدىك كومپانياسىنا سىلتەي وتىرىپ، ءتۋرچيننىڭ حاكەرلىكتەن 1,5 ميلليون دوللار تاپقانىن جازدى.

تۋرچينگە كومپيۋتەر جۇيەسىن بۇزۋعا سىبايلاستىق بويىنشا ءبىر ايىپ، كومپيۋتەرلىك الاياقتىق جانە قيانات جاساۋ بويىنشا ەكى ايىپ، جەلىلىك الاياقتىق جاساۋعا سىبايلاستىق جانە قۇرىلعىنى رۇقساتسىز پايدالانۋ بويىنشا ەكى ايىپ، بارلىعى بەس ايىپ تاعىلدى. كومپيۋتەر جۇيەسىن بۇزۋعا سىبايلاستىق بەس جىلعا دەيىن، كومپيۋتەرلىك الاياقتىق پەن قيانات جاساۋ 10 جانە بەس جىلعا دەيىن، جەلىلىك الاياقتىق 20 جىلعا دەيىن، قۇرىلعىنى رۇقساتسىز پايدالانۋ 10 جىلعا دەيىن باس بوستاندىعىنان ايىرۋعا اكەلۋى مۇمكىن.

پروكۋراتۋرا كۇدىكتى تاعىلعان ايىپ سوتتا دالەلدەنبەيىنشە كىناسىز ەكەنىن ەسكەرتكەن. اقش پروكۋراتۋراسى تەرگەۋ ىسىنە قازاقستان ۇلتتىق قاۋىپسىزدىك كوميتەتى كومەكتەسكەنىن مالىمدەدى.

Abai.kz