قازاقستانداعى كارانتين رەجيمى 2 تامىزعا دەيىن ۇزارتىلادى. بۇل تۋرالى پرەمەر-مينيستر اسقار مامين مالىمدەدى.

«كارانتيندىك قاتاڭ شەكتەۋ شارالارىنىڭ ەكىنشى اپتاسى ءوتىپ جاتىر. اۋرۋ ءوسۋى تۇراقتالۋدا. دەنساۋلىق ساقتاۋ مينيسترلىگىنىڭ ۇسىنىسى بويىنشا ەپيدەميولوگيالىق جاعدايدى ودان ءارى تۇراقتاندىرۋ ءۇشىن رەسپۋبليكا بويىنشا شەكتەۋ شارالارىن 20 شىلدەدەن 2 تامىزعا دەيىن تاعى ەكى اپتاعا ۇزارتۋ تۋرالى شەشىم قابىلدايمىز»، - دەدى مامين.

سونىمەن قاتار، ول كارانتيننىڭ ۇزارتىلۋىنا بايلانىستى تاعايىندالعان 42 500 تەڭگە كولەمىندەگى كومەكتى ناقتى كىمدەر الاتىنىن ايتتى.

«تولەم كارانتين شارالارىنىڭ كۇشەيتىلۋىنە بايلانىستى جۇمىسى شەكتەلگەن جۇمىس بەرۋشىلەردىڭ، جەكە كاسىپكەرلەردىڭ جانە ءوزىن-ءوزى جۇمىسپەن قامتىعاندار ءوتىنىمى نەگىزىندە جۇرگىزىلەدى»، - دەدى ول.

اسقار ۇزاقبايۇلى دەنساۋلىق ساقتاۋ مينيسترلىگى مەن اكىمدىكتەرگە، مەملەكەتتىك ورگاندارعا كارانتين شارالارىنىڭ ودان ءارى ساقتالۋىن قامتاماسىز ەتۋدى تاپسىردى.

«دەنساۋلىق ساقتاۋ مينيسترلىگى، اكىمدىكتەر مەن مۇددەلى مەملەكەتتىك ورگاندار كارانتيندى ودان ءارى ساقتاۋدىڭ بارلىق شاراسىن ىسكە اسىرسىن. دارىلىك پرەپاراتتاردىڭ قاجەتتى قورى بار جانە ۇنەمى تولىقتىرىلىپ وتىرادى. ولاردى ءدارىحانا جەلىلەرى مەن ستاتسيونارلار بويىنشا ناقتى ءبولۋ بويىنشا بارلىق شارانى قامتاماسىز ەتۋ قاجەت»,-دەپ تاپسىردى پرەمەر-مينيستر.

ايتا كەتەيىك، كەشە مەملەكەت باسشىسى ق.توقاەۆ كارانتيندى تاعى ەكى اپتاعا سوزىلاتىنىن ايتقان بولاتىن.

بۇگىندە قازاقستاندا كوروناۆيرۋس جۇقتىرعاندار سانى 61 755 ادامعا جەتتى.

Abai.kz