كۇنى كەشە عانا وتكەن قۇبان ايت كەزىندە كوپشىلىك جۇرت بايقاي بەرمەيتىن ءبىر كەلەڭسىز جايت بوي كورسەتتى. بىزدەگى ورىس ءتىلدى سايتتار ەلىمىزدەگى پرەمەر-ليگادان ءبىرجولاتا قوش ايتىسقان «ەرتىس» فۋتبول كومانداسىنىڭ ورنىنا جاڭادان «پاۆلودار» اتتى كوماندانىڭ قۇرىلاتىنىن ايتىپ، قالىڭ كوپشىلىكتى قۋانتىپ جاتىر. ەندى قارجىدان ابدەن جۇتاعان قازاقى «ەرتىستىڭ» ورنىن ورىسشا اتۋدى يەلەنگەن «پاۆلودار» باسىپتى. مىنە، وسى حاباردى  «KazFootbaII.kz» سايتىنان كوشىرىپ باسقان الگى سايتتار وسىلايشا حالىقتان ءسۇيىنشى سۇراپ جاتىر. 

ولارعا بۇل ۇلكەن قۋانىش شىعار، ارينە. الايدا، جاڭادان قۇرىلاتىن كوماندا نە سەبەپتى بۇرىنعى قازاقشا اتۋدان باس تارتىپ، اياق استىنان ورىسشا اتاۋدى يەلەتىندىگىنىڭ قۇپياسىن تۇسىنە المادىق. سوندا ولارعا «ءاي دەيتىن اجە، قوي دەيتىن قوجا» بولماعانى ما؟ ەگەر ول بۇرىنعىداي وبلىس بيۋدجەتىنەن ميللياردتاعان قارجى الىپ، قۇرىلتايشىسى اكىم بولسا، مۇنداي «ەركىنسۋشىلىككە»، ياعني قازاقشا اتاۋعا جويىپ جىبەرۋگە دەگەن ارەكەتكە كىم جول بەرىپ وتىر؟ ەلىمىزدىڭ سولتۇستىك وڭىرلەرىن قازاقشالاۋعا ءتىسىمىز باتپاي وتىرعاندا، مۇنىسى نەسى؟ الدە سونداعى سەپاراتيستىك اۋرۋعا ۇشىراعان ءبىر مىقتى توپتاردىڭ بىزگە كورسەتكەن قىرى ما؟ ەگەر مۇندايلارعا نەمقۇرايلى قاراي بەرەتىن بولساق، ءتۇبى تاۋەلسىزدىگىمىزدىڭ تۇعىرىنا سىزات ءتۇسۋى دە عاجاپ ەمەس.

ايتپاقشى، بۇل جەردە دۇرىس ءتارتىپ ورناتىلماسا، كۇنى ەرتەڭ «قىزىلجارىڭىز» قايتادان «پەتروپاۆەل» بولىپ، جاڭادان تۇلەپ شىعا كەلمەسىنە، كىم كەپىل؟ ونسىز دا ءبىزدىڭ قوستانايدا «توبىل» دەگەن سوزگە ءتىلىمىز كەلمەيدى» دەپ، بۇل كوماندانى رەسەيدەگى وزەننىڭ اتىمەن «توبول» دەپ وزگەرتكەنىمىز دە بار.

جالپى، وسى «ەرتىستىڭ» قارجىدان قىسىلىپ، جابىلىپ قالۋىنىڭ ءوزى دە ۇلكەن كۇمان تۋدىرادى. ول بيۋدجەتتەن دە ءبولىنىپ، وزگە دە دەمەۋشىلەر بەرگەن ميللياردتاعان قارجىنىڭ مۇقيات ەسەپتەلمەي، ورىنسىز، بەي-بەرەكەت جۇمسالعاندىعىنان، اسىرەسە شەتەلدەن شاقىرىلعان لەگيونەر دەگەن «كەلىمسەكتەرگە» مىرزالىقپەن شاشىلعاندىقتان بولۋى دا عاجاپ ەمەس. ءبىر عانا مىسال. ەلىمىزدىڭ بەلگىلى ءبىر سايتى بيىلعى جىل باسىندا وسى «ەرتىستىڭ» فرانتسيادان شاقىرىلعان فۋتبولشىسى جەرەمي مانزوررو «قازاقستان - اقشاسى كوپ ەل» دەگەن ماقالاسىن باسقان. سوندا ول «ەرتىستىڭ» «وزگەلەرگە دەگەن «اسقان مىرزالىعىن» قالىڭ جۇرتقا قىسىلماستان جايىپ سالعان.

"تە، كتو يگراەت ۆ لۋچشيح كلۋباح، وني موگۋت، ناسكولكو يا پونيمايۋ، زاراباتىۆات 60 000 يلي 70 000 ەۆرو ۆ مەسياتس. نە گوۆوريا ۋجە و پرەمياح، كوتورىە موگۋت بىت دوۆولنو ۆىسوكيمي. وني يگرايۋت ۆ سۆوەي سترانە، وني زۆەزدى ي وني نە حوتيات ۋحوديت. ا لۋچشيە كلۋبى موگۋت پرەدلوجيت وچەن حوروشۋيۋ زارپلاتۋ ينوسترانتسام", - زاياۆيل فۋتبوليست, - دەگەن ونىڭ ءسوزىن مۇرتىن بۇزباستان باسقان. مىنە، وسىدان-اق قورىتىندى شىعارا بەرىڭىز.

جەرەمي مانزوررو

 شىندىعىندا دا، قازاقستاندا اقشا شاش-ەتەكەن شىعار. بۇعان ءتىپتى شەتەلدىكتەر ريزا بولىپ جاتقانىنا قاراعاندا. اڭگىمە، ءتىپتى سول «كەلىمسەكتەرگە» كەتىپ جاتقان ەسەپسىز كوك قاعازدا دا ەمەس. ماسەلە، قازاقشا اتاۋلاردىڭ بىرتە-بىرتە ورىسشاعا كوشە باستاسا دا، وعان ءمان بەرەتىن جەرگىلىكتى بيلىك بايقالماي وتىرعاندىعىندا. مۇمكىن وسى «پاۆلودار» سول كەرى كەتۋدىڭ باستاماسى دا شىعار. وسىندايدا، اتام قازاقتىڭ «قارنىمنىڭ اشقانىنان ەمەس، قادىرىمنىڭ قاشقانىنان جىلايمىن» دەگەن ەكەن. ءبىز دە قازىر وسىنداي جىلارمان حالدە تۇرمىز با دەپ قورقامىن.

جايبەرگەن بولاتوۆ

Abai.kz