ءبىلىم جانە عىلىم ءمينيسترى اسحات ايماعامبەتوۆ ۇكىمەتتىڭ سەلەكتورلىق وتىرىسىندا 2020-2021 وقۋ جىلىنىڭ باستالۋىنا دايىندىق ماسەلەسى جونىندە باياندادى. 

ءمينيستردىڭ ايتۋىنشا، سانيتارلىق-ەپيدەميولوگيالىق جاعدايعا بايلانىستى 1 قىركۇيەكتەن باستاپ وقۋ جىلى جالپى قاشىقتان وقىتۋ فورماتىندا باستالادى.

قابىلدانعان شەشىمگە سايكەس بۇل جەردە ەكى ەرەكشەلىك بار. شالعايداعى ەلدى مەكەندەردەگى شاعىن جيناقتالعان مەكتەپتەر ەپيدەميالىق احۋالعا بايلانىستى وقۋدى ءداستۇرلى شتاتتىق رەجيمدە باستايدى، سونداي-اق باستاۋىش سىنىپ وقۋشىلارى ءۇشىن، اتا-انالاردىڭ ءوتىنىشى نەگىزىندە، قاتاڭ سانيتارلىق تالاپتاردى ساقتاي وتىرىپ، كەزەكشى سىنىپتار اشىلادى. كەزەكشى سىنىپتارعا وتىنىشتەر قولجەتىمدى بايلانىس قۇرالدارى ارقىلى ەلەكتروندى تۇردە قابىلدانادى.

سونىمەن، الدىن الا بولجام بويىنشا، ينتەرنەت پلاتفورمالار مەن تەلەديداردى پايدالانا وتىرىپ، قاشىقتان وقىتۋ فورماتىندا 2,6 ملن وقۋشى (79%), كەزەكشى سىنىپتاردا 530 مىڭ بالا (17%), شتاتتىق تۇردە اۋىلداردا 157 مىڭنان استام وقۋشى (4%) ءبىلىم الادى دەپ كۇتىلۋدە.

«مەكتەپكە دەيىنگى ۇيىمداردا اتا-انالاردىڭ قالاۋى بويىنشا بالالاردى كەزەكشى توپتارعا قابىلداۋ ۇيىمداستىرىلادى. سايكەسىنشە بۇل توپتارداعى بالالاردىڭ سانى ون بەستەن اسپاۋى ءتيىس. بالالار اتا-انالاردىڭ ءوتىنىشى نەگىزىندە قاشىقتان نەمەسە جەكە تارتىپپەن وقۋعا، سونىمەن قاتار بەس بالادان اسپايتىن شاعىن توپتارداعى ۇيىرمەلەرگە قاتىساتىن بولادى»، — دەدى ا. ايماعامبەتوۆ.

ارنايى ءبىلىم بەرۋ ۇيىمدارىنىڭ جۇمىسى مينيسترلىك ءۇشىن ەرەكشە ماڭىزعا يە. وسى ەرەكشە بۇلدىرشىندەر قازىرگى جاعدايدا ۇلكەن نازاردى قاجەت ەتەدى. سوندىقتان اتا-انالارىنىڭ تاڭداۋى بويىنشا ارنايى ونلاين كەڭەس بەرۋ نەمەسە مامانداردىڭ جەكە قابىلداۋلارى ۇيىمداستىرىلادى. دەنساۋلىعىندا كۇردەلى پروبلەمالارى بار بالالاردى قابىلداۋ الدىن الا جازىلۋ تارتىبىمەن جەكە جۇرگىزىلەدى.

كوللەدجدەرگە كەلەر بولساق، پەداگوگيكالىق، اT, الەۋمەتتىك، گۋمانيتارلىق، تەحنولوگيالىق، اگرارلىق، مەديتسينا، ونەر باعىتتارى بويىنشا قاشىقتان وقىتۋ ۇسىنىلادى.

«سايكەسىنشە زەرتحانالىق جۇمىستار مەن وندىرىستىك تاجىربيەنى شتاتتى رەجيمدە جۇرگىزۋگە مۇمكىندىك بەرەمىز. بۇعان قوسا الىس اۋىلدىق جەرلەردە جانە شاعىن قالالاردا ورنالاسقان، ءبىر توپتاعى ستۋدەنت سانى 15-تەن اسپايتىن 102 كوللەدج دە شتاتتىق رەجيمدە جۇمىس ىستەيدى»،— دەدى مينيستر.

جوعارى وقۋ ورىندارىندا وقىتۋ نەگىزىنەن قاشىقتان جۇرگىزىلەدى.

«تەحنيكالىق، اگرارلىق جانە تابيعي باعىتتار، مەديتسينا جانە ونەر ماماندىقتارى بويىنشا دارىستەر مەن سەمينارلار (70 %) ونلاين فورماتتا، ال زەرتحانالىق جانە پراكتيكالىق ساباقتار (30%) كۇشەيتىلگەن سانيتارلىق شارالاردى قاتاڭ ساقتاي وتىرىپ، ءداستۇرلى فورماتتا وتكىزىلەدى», — دەدى ا. ايماعامبەتوۆ.

ماگيستراتۋرا مەن دوكتورانتۋراداعى ساباقتار ارالاس پرينتسيپپەن وقىتىلادى. وسى بەرىلگەن باعدارلار شەڭبەرىندە ءاربىر ۇيىم وزدەرى دەربەس شەمىم قابىلدايدى.

«قاشىقتان وقىتۋ كەزىندە وقۋ پروتسەسىنىڭ پرينتسيپتەرى مەن تەحنولوگيالارى سايكەسىنشە وزگەرەدى. وسىعان بايلانىستى ءتورتىنشى توقسان تاجىريبەسىن ەسكەرىپ، باعالاۋ نورمالارىن، وقىتۋ ادىستەمەسىن وزگەرتۋ جانە كەرى بايلانىستى جۇزەگە اسىرۋ بويىنشا دا بىرقاتار جۇمىس جۇرگىزىلۋدە»، — دەدى مينيستر.

بۇعان قوسا، شىلدە ايىنان باستاپ قاشىقتان وقىتۋ جۇيەسىنىڭ نەگىزگى باعىتتارىن ءتۇسىندىرۋ، سانيتارلىق-ەپيدەميولوگيالىق جاعدايعا بايلانىستى ءارتۇرلى فورماتقا كوشۋ بويىنشا كۇندەلىكتى ۆەبينارلار وتكىزىلىپ كەلەدى. جەكە كەستە بويىنشا 7 مىڭنان اسا قازاقستاندىق مەكتەپ ديرەكتورىنا، ولاردىڭ 12 مىڭداي ورىنباسارىنا جانە 2 مىڭعا جۋىق ادىسكەرگە قاشىقتان وقىتۋدى ۇيىمداستىرۋ بويىنشا ءتۇسىندىرۋ سەمينارلارى وتكىزىلدى.

ەلىمىزدىڭ بارلىق مۇعالىمدەرى ءۇشىن قاشىقتان وقىتۋ تەحنولوگيالارى بويىنشا بىلىكتىلىكتى ارتتىرۋ كۋرستارى باستالدى. ولارمەن مۇعالىمدەر 100% قامتىلاتىن بولادى.

ا. ايماعامبەتوۆ اتاپ وتكەندەي، اتا-انالار مەن وقۋشىلار ءۇشىن ادىستەمەلىك قولداۋ كورسەتۋ ماڭىزدى. سوندىقتان تامىز ايىندا بالالارعا جانە اتا-انالارعا «ۇيدە قالاي وقۋ كەرەك؟»، «گيگيەنا نەگىزدەرى»، «كيبەرمادەنيەت»، «ينتەرنەت ارقىلى قالاي وقۋ كەرەك؟»، «دەنە جاتتىعۋلارىنىڭ ماڭىزى» تاقىرىپتارىندا بىرىڭعاي سىنىپ ساعاتتارى، اتا-انالار جينالىستارى وتكىزىلەدى.

ءبىلىم كۇنىن 1 قىركۇيەكتە ونلاين رەجيمىندە وتكىزۋ جوسپارلانعان. جەرگىلىكتى اتقارۋشى ورگاندارمەن بىرلەسىپ، مەكتەپتەرگە كومپيۋتەر ساتىپ الۋ جۇمىسى جۇرگىزىلۋدە.

«جالپى، تاپشىلىق بار. بۇل تۋرالى اشىق ايتۋ كەرەك. بۇگىنگى تاڭدا رەسپۋبليكا بويىنشا 185 مىڭ ءبىلىم الۋشىنىڭ كومپيۋتەرى جوق. تاپشىلىق اسىرەسە كوپ بالالى، از قامتىلعان وتباسىلاردا بايقالادى. 1 قىركۇيەككە دەيىن اتالعان ساناتتاعى 500 مىڭنان استام بالا كومپيۋتەر تەحنيكاسىمەن قامتاماسىز ەتىلەدى»، — دەدى ا. ايماعامبەتوۆ.

24 مىڭ پەداگوگتىڭ جەكە كومپيۋتەرى جوق، 2 مىڭ پەداگوگ ءۇشىن ينتەرنەت جەلىسى قولجەتىمدى ەمەس. بۇل ماسەلە مەكتەپتەگى كومپيۋتەرلەردى ولارعا ۋاقىتشا پايدالانۋعا بەرۋ ارقىلى شەشىلەتىن بولادى.

IV توقساندا ءوز ينتەرنەت-پلاتفورمالارىن ۇسىنعان اT-كومپانيالار جازعى ۋاقىتتا ايتىلعان ۇسىنىستار بويىنشا وقۋ پروتسەسىنە قاجەتتى جاڭا فۋنكتسيونالدار جاساپ، قاشىقتىقتان وقىتۋ ساپاسىن ارتتىرۋ بويىنشا بىرقاتار جۇمىستار اتقاردى.

مازمۇن ماتەريالدارىن تولىقتىرۋمەن قاتار، ات-كومپانيالار ساباقتاردى جازۋ مۇمكىندىگى بار ستريمينگتىك بەينە كونفەرەنتسيا مودۋلدەرىن دايىندادى. وقۋ پروتسەسىن باسقارۋدىڭ اۆتوماتتاندىرىلعان جۇيەلەرى، اناليتيكا، باعالاۋ جانە ت. ب. ازىرلەندى.

بۇگىنگى كۇنى ءار مەكتەپ اT كومپانيالاردىڭ ينتەرنەت پلاتفورمالارىندا پەداگوگتاردىڭ سۇرانىستارىنا جاۋاپ بەرەتىن كەز كەلگەن پلاتفورمانى تاڭداۋعا قۇقىلى. وسى قىسقا مەرزىمدە بىرنەشە جاڭا پلاتفورمالار دا نارىققا شىقتى، باسەكەلەستىك پەن تاڭداۋ بار.

كوكتەمدەگى تاجىربيەگە سايكەس تەلەساباقتار ازىرلەنۋدە. تەلەساباقتار — وتە قولجەتىمدى قۇرال. بارلىعى 6 مىڭنان استام تەلەساباق تۇسىرىلۋدە.

تەلەديدار ساباقتارى «ءال-فارابي» مەن «ەل-ارنا» ارنالارىندا كورسەتىلەدى. كەم دەگەندە ارقايسىسىندا 9 ساعاتتان ەفير بەرىلدى. وعان قوسا بارلىق تەلەساباقتار ينتەرنەتتە ورنالاستىرىلىپ بارلىق وقۋشىلار ءۇشىن تەگىن جانە قولجەتىمدى بولادى.

قازىر اقپارات جانە قوعامدىق دامۋ مينيسترلىگىمەن، اكىمدىكتەرمەن بىرلەسىپ وسى ارنالارمەن قامتىلۋ كارتاسى دايىندالدى. سونىڭ نەگىزىندە 604 ەلدى مەكەن ءۇشىن وسى كانالداردىڭ قولجەتىمسىز ەكەنى انىقتالدى، بىراق ونىڭ 314-ىندە عانا وقۋشىلار بار. بۇل ماسەلە جەرگىلىكتى تەلەارنالارعا رەترانسلياتسيالاۋ، سپۋتنيكتىك انتەننالار ورناتۋ ارقىلى شەشىلەدى.

وقۋلىقتارمەن قامتاماسىز ەتۋگە قاتىستى جۇمىس جۇرگىزىلۋدە. 11 سىنىپ ءۇشىن 160 239 وقۋلىق جيىنتىعى ساتىپ الىندى. جونەلتۋ كەستەسى جاسالدى جانە كەلىسىلدى، جالپى جونەلتۋ كورسەتكىشى 50%، جەتكىزۋ 35% قۇرايدى. شىلدە ايىنان باستاپ وقۋلىقتار بالالارعا تاراتىلا باستادى.

وقۋلىقتاردىڭ ەلەكتروندىق نۇسقاسى وقۋشىلار مەن مۇعالىمدەرگە QR-كود ارقىلى قولجەتىمدى.

ءسوز سوڭىندا ا. ايماعامبەتوۆ ىندەتپەن سىرقاتتانۋ دەڭگەيىنىڭ تۇراقتى تومەندەۋىنە بايلانىستى ءبىلىم بەرۋ ۇيىمدارى سانيتارلىق تالاپتاردى ساقتاي وتىرىپ، وقىتۋدىڭ ارالاس جانە شتاتتىق فورماتىنا بىرتىندەپ كوشۋدى جۇزەگە اسىراتىنىن جەتكىزدى.

Abai.kz