قوستاناي قالاسىندا وتكەن اق جول پارتياسىنىڭ بارلىق دەڭگەيدەگى ءماسليحات دەپۋتاتتارىنىڭ فورۋمى بيىلعى ساياسي ءومىردىڭ ەلەۋلى وقيعاسىنا اينالدى. ەلدىڭ تۇكپىر-تۇكپىرىنەن كەلگەن حالىق قالاۋلىلارى مەن پارتيا مۇشەلەرى ءبىر الاڭدا باس قوسىپ، ەل دامۋى مەن كاسىپكەرلىكتى قولداۋ باعىتىنداعى وزەكتى ماسەلەلەردى تالقىلادى.

پارتيا توراعاسى ازات پەرۋاشەۆ فورۋمدا بەلسەندى مۇشەلەرگە جوعارى مەملەكەتتىك ناگرادالار مەن پارتيالىق ماراپاتتاردى تابىستاپ، ءار ايماقتان كەلگەن دەپۋتاتتاردىڭ تاجىريبەسى مەن قوعامدىق ەڭبەگىن اتاپ ءوتتى.

فورۋمنىڭ باستى وزەگى – پارتيانىڭ ەلدىڭ ساياسي جۇيەسىندەگى جاۋاپكەرشىلىگىن كۇشەيتۋ جانە ايماقتارداعى حالىقتىڭ مۇددەسىن ناقتى ىسپەن قورعاۋ.

سوڭعى جىلدارى «اق جول» پارتياسى تەك پارلامەنتتىك مىنبەردە عانا ەمەس، جەرگىلىكتى ءماسليحاتتار دەڭگەيىندە دە ءوز پوزيتسياسىن ايقىن كورسەتە باستادى. پارتيا قاتارىندا شاعىن جانە ورتا بيزنەستىڭ وكىلدەرى، زاڭگەرلەر، اۋىل اكىمدەرى مەن قوعامدىق ۇيىم جەتەكشىلەرى بار. فورۋمدا ءسوز العان سەرگەي گوريانوي، ەۆگەني كينتسەل، قايرات بورانباەۆ، ەرجان حاسانوۆ سىندى ايماق دەپۋتاتتارى ءوز وڭىرلەرىندەگى تاجىريبەنى ورتاعا سالىپ، بيزنەستى دامىتۋ، اۋىلدىڭ الەۋمەتتىك الەۋەتىن ارتتىرۋ، جەرگىلىكتى ءوزىن-ءوزى باسقارۋ جۇيەسىن جەتىلدىرۋ ماسەلەلەرىنە توقتالدى.

اسىرەسە كاسىپكەرلەر مەن دەپۋتاتتاردىڭ بىرلەسە جۇمىس ىستەۋى قوعامداعى تۇراقتىلىق پەن ءادىل باسەكەنىڭ باستى كەپىلى ەكەنى ايتىلدى.

ازات پەرۋاشەۆ ءوز سوزىندە ەل دامۋىنا ۇلەس قوسقان ازاماتتارعا قۇرمەت كورسەتۋ ءداستۇرىن پارتيا ساياساتىنىڭ ماڭىزدى بولىگى رەتىندە اتاپ ءوتتى.

ماراپاتتالعانداردىڭ قاتارىندا شىمكەنت قالالىق ءماسليحاتىنىڭ دەپۋتاتى مۇحتار شيميروۆ، جامبىل وبلىسىنىڭ كاسىپكەرى سەرىك ماقاجانوۆ، زاڭگەر ەۆگەني كينتسەل، پاۆلودار ءوڭىرىنىڭ وكىلى ازامات وتەپباەۆ، تۇركىستاندىق ارداق مانسۇروۆ سياقتى ەلگە تانىمال تۇلعالار بار. ولار العان «قۇرمەت» وردەنى مەن «ەرەن ەڭبەگى ءۇشىن» مەدالدارىن ءوز ەڭبەكتەرىنىڭ عانا ەمەس، قوعام تاراپىنان سەنىم مەن مويىنداۋدىڭ بەلگىسى دەپ قابىلدادى.

سونداي-اق فورۋمدا پارتيانىڭ جاستار قاناتى مەن وڭىرلىك فيليالدارىنىڭ جۇمىسى دا جوعارى باعالاندى. حانزا ناسرۋللاەۆ باستاعان جاس بەلسەندىلەر قوعامدىق جوبالاردى ىسكە اسىرىپ، جاڭا بۋىننىڭ ساياسي مادەنيەتىن قالىپتاستىرۋدا ەڭبەك ەتىپ كەلەدى. پارتيانىڭ قاراعاندى، شىعىس قازاقستان جانە تۇركىستان وبلىستارىنداعى فيليالدارى ۇزدىك دەپ تانىلىپ، ارنايى ماراپاتتارعا يە بولدى.

بۇل – پارتيانىڭ وڭىرلىك ساياساتتا جۇيەلى تۇردە جۇمىس ىستەپ، قوعاممەن تىكەلەي بايلانىس ورناتۋعا ۇمتىلىپ وتىرعانىنىڭ ايعاعى.

قوستانايداعى فورۋم «اق جولدىڭ» ءداستۇرلى ءيميدجىن جاڭارتىپ، ساياسي جانە الەۋمەتتىك جاۋاپكەرشىلىكتى قاتار الىپ ءجۇرۋدىڭ ۇلگىسىن كورسەتتى. پارتيانىڭ نەگىزگى ۇستانىمى – ەلدىڭ ەكونوميكالىق تاۋەلسىزدىگىن نىعايتۋ، كاسىپكەرلىككە ەركىندىك بەرۋ، ءاربىر ازاماتتىڭ ەڭبەگىن باعالاۋ. فورۋمدا ايتىلعان پىكىرلەر مەن ۇسىنىستار الداعى ساياسي ناۋقان مەن وڭىرلەردەگى الەۋمەتتىك-ەكونوميكالىق باستامالاردا ءوز جالعاسىن تابارى ءسوزسىز.

Abai.kz