4 تامىزدا ليۆان استاناسى بەيرۋتتا ءىرى جارىلىس بولىپ، كەمىندە 73 ادام قازا بولعان، بىرنەشە مىڭ ادام جاراقاتتانعان. جارىلىس تولقىنى ون مىڭ شاقىرىم جەرگە دەيىنگى اۋماقتا ورنالاسقان ۇيلەر مەن عيماراتتاردى قيراتىپ، بۇلدىرگەن. ەل ۇكىمەتى تەڭىز پورتىنداعى قويمادا جارىلعىش زات جارىلعانىن ايتقان.

مينيسترلىك سارسەنبىلىك حابارلاماسىندا ليۆانداعى قازاقستاندىق بىتىمگەرلەردىڭ جاعدايى تۋرالى دا اقپارات بەرگەن.

"ليۆاندا بۇۇ بىتىمگەرلىك كونتينگەنتى بار، ونىڭ قۇرامىنا 120 قازاقستاندىق جاۋىنگەر كىرەدى. قازىر ولاردىڭ روتاتسياسى ءجۇرىپ جاتىر جانە الدىڭعى كۇنى (3 تامىز – رەد.) قازاقستاندىق بىتىمگەرلەر قىزمەت ەتەتىن ورىندارىنا امان-ەسەن جەتتى" دەلىنگەن حابارلامادا.

بۇعان دەيىن جارىلىستان قازاقستان ەلشىلىگىنىڭ عيماراتىندا بولعان كونسۋلدىڭ جەڭىل جاراقاتتانعانى ايتىلعان ەدى. جارىلىس بولعان كەزدە ول كەڭسەدە بولعان. ينتەرنەتتە تاراعان ۆيدەودا (ۆيدەونى كونسۋل تۇسىرگەنگە ۇقسايدى) ەلشىلىكتىڭ كەڭسەسىندەگى جيھازداردىڭ قيراپ، تەرەزەلەردىڭ سىنعانى كورىنەدى.

جارىلىس ليۆان ءۇشىن وتە قيىن شاقتا بولدى. ەلدە ەكونوميكالىق داعدارىس. بۇعان قوسا، جارىلىس بۇۇ-نىڭ تريبۋنالىندا "10 جىل بۇرىن ليۆاننىڭ ەكس-پرەمەرى رافيك ءحاريريدى ءولتىردى" دەپ ايىپتالعان ءتورت ادامنىڭ سوتى قارساڭىندا بولدى. ءتورت ايىپتالۋشى دا "حەزبوللا" توبىنىڭ مۇشەسى. ولار وزدەرىنە تاعىلعان ايىپتى جوققا شىعارادى. سوت شەشىمى جۇما شىعۋى ءتيىس.

Abai.kz